ក្រុមមន្ត្រីអាហ្វហ្គានីស្ថានបាននិយាយថា ខ្មាន់កាំភ្លើងដែលមិនស្គាល់អត្តសញ្ញាណរួមទាំងអ្នកបំផ្ទុះគ្រាប់បែកអត្តឃាតបានវាយលុកអគាររដ្ឋាភិបាលមួយនៅក្រុងកាប៊ុល កាលពីថ្ងៃចន្ទដោយបានសម្លាប់មនុស្សយ៉ាងហោចណាស់២៥នាក់ និងរងរបួសជាង២០នាក់ទៀត។
ការវាយឆ្មក់នេះបានចាប់ផ្ដើមនៅពេលរសៀល ដោយអ្នកបំផ្ទុះគ្រាប់បែកអត្តឃាតបានបំផ្ទុះរថយន្តដែលផ្ទុកគ្រឿងផ្ទុះនៅខាងក្រៅអគារ។ ការផ្ទុះអាវុធនេះបានជួយឱ្យបក្ខពួករបស់ជននេះអាចចូលក្នុងអគារដែលមានផ្ទះជាច្រើនរបស់ក្រុមជនពិការនិងក្រុមគ្រួសាររបស់អ្នកស្លាប់។
លោក Najib Danish អ្នកនាំពាក្យក្រសួងមហាផ្ទៃ បានប្រាប់ក្រុមអ្នកយកព័ត៌មាននៅក្នុងទីក្រុងកាប៊ុលថា អគារនេះត្រូវបានគេបោសសម្អាត បន្ទាប់ពីការវាយប្រហារដែលមានរយៈពេល៧ម៉ោង។ ក្រុមមន្ត្រីបាននិយាយថា និយោជិកជាង២០០នាក់របស់នាយកដ្ឋានត្រូវបានជម្លៀសចេញដោយសុវត្ថិភាព បន្ទាប់ពីការវាយប្រហារបានចាប់ផ្តើម។ អគារ និងនាយកដ្ឋានសំខាន់ៗផ្សេងទៀតក៏ស្ថិតនៅភាគខាងកើតទីក្រុងកាប៊ុលដែរគឺទីដែលអំពើហិង្សានេះបានផ្ទុះឡើង។
មិនមានការអះអាងទទួលខុសត្រូវជាបន្ទាន់ចំពោះការវាយប្រហារកាលពីថ្ងៃចន្ទនេះទេ។ ក្រុមបះបោរតាលីបង់ និងក្រុមសកម្មប្រយុទ្ធរដ្ឋឥស្លាមតែងតែប្រកាសទទួលខុសត្រូវចំពោះការវាយប្រហារមុនៗនៅក្រុងកាប៊ុល៕
