នៅក្នុងថ្ងៃបើកសន្និបាតជាតិគណបក្សប្រជាធិបតេយ្យកាលពីថ្ងៃច័ន្ទម្សិលមិញ អ្នកស្រី Michelle Obama ដែលជាភរិយារបស់លោកអតីតប្រធានាធិបតី Barack Obama បានថ្លែងសរសើរបេក្ខជនប្រធានាធិបតីគណបក្សប្រជាធិបតេយ្យលោក Joe Biden ថា ជាមេដឹកនាំដែលមានសមត្ថភាពសម្រាប់ប្រទេសមួយដែលមាន «សេចក្តីមេត្តា មិនចេះទ្រុឌទ្រោម និងមានពលរដ្ឋល្អ»។ ស្របពេលនោះដែរ អ្នកស្រីបានរិះគន់ខ្លាំងៗលើលោកប្រធានាធិបតី Donald Trump ដោយថា លោក Trump ជាប្រធានាធិបតីដែលខ្វះការយល់ដឹងពីអារម្មណ៍ និងបទពិសោធន៍របស់អ្នកដទៃ។
អ្នកស្រី Michelle Obama បានលើកឡើងថា លោក Trump បានបរាជ័យក្នុងការឆ្លើយតបឲ្យបានគ្រប់គ្រាន់ចំពោះវិបត្តិសេដ្ឋកិច្ច និងសង្គម និងការឆ្លងរាតត្បាតនៃជំងឺកូវីដ១៩ នៅក្នុងសហរដ្ឋអាមេរិក ក៏ដូចជាបានងាកចេញពី [ការមានទំនាក់ទំនងល្អជាមួយ] សម្ព័ន្ធមិត្តអន្តរជាតិ ដែលបានកសាងឡើងដោយរដ្ឋបាលមុនៗ។
អ្នកស្រី Michelle Obama បានថ្លែងនៅក្នុងសុន្ទរកថាដែលថតទុកជាមុនថា៖ «ខ្ញុំសូមនិយាយដោយស្មោះត្រង់ និងឲ្យបានច្បាស់ថា លោក Donald Trump មិនស័ក្តិសមជាប្រធានាធិបតីសម្រាប់ប្រទេសយើងឡើយ។ លោកមានពេលលើសពីគ្រប់គ្រាន់ទៅទៀតដើម្បីបង្ហាញថា លោកអាចធ្វើបាន ប៉ុន្តែលោកពិតជាទៅមិនរួចឡើយ»។ អ្នកស្រីបន្ថែមថា លោក Trump «មិនអាចក្លាយជាប្រធានាធិបតី ដែលយើងចង់បាននោះទេ»។
ទោះជាយ៉ាងនេះក្ដី លោក Trump បានសើចចំអកចំពោះការប្រឹងប្រែងរបស់គណបក្សប្រជាធិបតេយ្យនេះ នៅឯការជួបជុំនយោបាយមួយនៅក្នុងទីក្រុង Mankato រដ្ឋMinnesota ដោយលោកថ្លែងទៅកាន់អ្នកគាំទ្រថា៖ «នៅពេលដែលអ្នកឮការថ្លែងដែលថតទុកមុន វាដូចជាគ្មានអ្វីគួរឲ្យរំភើបសោះ មែនទេ?
វិបត្តិជំងឺកូវីដ១៩ បានជំរុញឲ្យគណបក្សប្រជាធិបតេយ្យលះបង់គម្រោងក្នុងការរៀបចំសន្និបាតជាតិគណបក្សដើម្បីតែងតាំងលោក Joe Biden ជាបេក្ខជនប្រធានាធិបតីជាផ្លូវការ ដោយផ្ទាល់នៅទីក្រុង Milwaukee រដ្ឋ Wisconsin ដោយបានងាកទៅធ្វើតាមអនឡាញវិញ៕
