ក្រុមអ្នកតវ៉ាគ្រោងប្រមូលផ្ដុំគ្នានៅថ្ងៃចន្ទនេះនៅអាគារសភារបស់រដ្ឋ Georgia ដើម្បីទាមទារឲ្យមានកំណែទម្រង់ប្រព័ន្ធយុត្តិធម៌ព្រហ្មទណ្ឌ និងវិធានការដោះស្រាយបញ្ហាបោះឆ្នោត។
ការតវ៉ានេះត្រូវបានគ្រោងធ្វើឡើងមុនពេលដែលមន្ត្រីប៉ូលិសទីក្រុង Atlanta ម្នាក់ បានបាញ់លោក Rayshard Brooks បណ្ដាលឲ្យស្លាប់នៅខាងក្រៅភោជនីយដ្ឋានមួយកន្លែង កាលពីថ្ងៃសុក្រសប្ដាហ៍មុន។
ការស្លាប់នេះគឺជាហេតុការណ៍ថ្មីចុងក្រោយបង្អស់នៃការស្លាប់របស់ពលរដ្ឋអាមេរិកាំងដើមកំណើតអាហ្វ្រិកមួយចំនួនទៀត ដែលបានជំរុញឲ្យមានការតវ៉ានៅទូទាំងប្រទេសទាមទារឲ្យមានការដោះស្រាយបញ្ហាទង្វើមិនត្រឹមត្រូវរបស់ប៉ូលិស និងបញ្ហារើសអើងជាតិសាសន៍ជាប្រព័ន្ធ។
អ្នកពិនិត្យផ្នែកវេជ្ជសាស្ត្រម្នាក់នៅសង្កាត់ Fulton រដ្ឋ Georgia បានសម្រេចបញ្ជាក់ថា ការស្លាប់របស់លោក Brooks គឺជាអំពើមនុស្សឃាត។
ទាក់ទិននឹងហេតុការណ៍នេះ លោក Brooks បានសហការជាមួយប៉ូលិសក្នុងពេលប៉ូលិសធ្វើតេស្តជាតិស្រវឹង ប៉ុន្តែក្រោយមក បានជម្នះមិនឲ្យប៉ូលិសចាប់ខ្លួន និងបានរត់គេច។ ការធ្វើកោសល្យវិច័យរបស់អ្នកពិនិត្យផ្នែកវេជ្ជសាស្ត្របានរកឃើញថា លោក Brooks ត្រូវគ្រាប់កាំភ្លើងចំនួនពីរគ្រាប់នៅចំខ្នង និងបានស្លាប់ដោយសារការខូចខាតសរីរាង្គ និងបាត់បង់ឈាម៕
