រដ្ឋមន្ត្រីការពារប្រទេសសហរដ្ឋអាមេរិក លោក Jim Mattis ថ្លែងថាសហរដ្ឋអាមេរិកកំពុងបាត់បង់អត្ថប្រយោជន៍នៃការប្រកួតប្រជែងទាហានរបស់ខ្លួន ទៅលើចិន និងរុស្ស៊ី ដែលការណ៍នេះបង្ហាញពីការប្រឈមផ្នែកកម្លាំងប្រដាប់អាវុធរបស់អាមេរិក។
លោក Mattis បានថ្លែងកាលពីថ្ងៃសុក្រម្សិលមិញ ខណៈដែលលោកបញ្ចេញផ្នែកខ្លះនៃយុទ្ធសាស្រ្តការពារជាតិរបស់រដ្ឋបាលលោក ត្រាំ នៅក្នុងរដ្ឋធានីវ៉ាស៊ីតោន ដោយលោកបានថ្លែងថា «ការប្រកួតប្រជែងផ្នែកអំណាចយោធា ដែលមិនជាបញ្ហាភេរវកម្មនោះ ឥឡូវនេះបានក្លាយជាការផ្តោតយ៉ាងសំខាន់របស់សហរដ្ឋអាមេរិកទៅជាបញ្ហាសន្តិសុខជាតិ»។
លោកបានថ្លែងបន្ថែមទៀតថា យុទ្ធសាស្ត្រនេះមានគោលបំណងបង្កើតកម្លាំងឲ្យបានខ្លាំងជាងមុន នៅស្របពេលកំពុងពង្រីកអត្ថប្រយោជន៍នៃការប្រកួតប្រជែងរបស់អាមេរិក និងការកំណត់អទិភាពពីការត្រៀមខ្លួនរួចជាស្រេចរបស់សហរដ្ឋអាមេរិកនៅពេលមានសង្គ្រាមកើតឡើង។
លោករដ្ឋមន្រ្តីការពារប្រទេស Jim Mattis បានថ្លែងទៀតថា៖ «ទាហានរបស់យើងនៅតែរឹងមាំ ក៏ប៉ុន្តែការមានប្រៀបរបស់យើងបានធ្លាក់ចុះនៅគ្រប់ផ្នែកទាំងអស់ មិនថាតាមអាកាស លើដី តាមសមុទ្រ និងតាមបណ្តាញអ៊ីនធឺណិតនោះទេ ហើយយើងនៅតែបន្តធ្លាក់ចុះ។ ប្រវត្តិសាស្ត្របានបង្ហាញយ៉ាងច្បាស់ថា អាមេរិកាំងគ្មានបុព្វសិទ្ធិណាដែលត្រូវបានកំណត់ថា នឹងឈ្នះនៅក្នុងសមរភូមិសង្គ្រាមនោះទេ។
មានឯកសារមួយចំនួនបានចោទប្រកាន់ប្រទេសចិនពីការកេងប្រវ័ញ្ជផ្នែកសេដ្ឋកិច្ច ដើម្បីធ្វើឲ្យប្រទេសជិតខាងមានការភ័យខ្លាច ខណៈពេលដែលខ្លួនកំពុងកសាងទីតាំងផ្ទុកយន្តហោះចម្បាំង និងសព្វាវុធយោធានៅក្នុងកោះសិប្បនិម្មិតនៅសមុទ្រចិនខាងត្បូង ដែលកំពុងមានជម្លោះនោះ។
ឯកសារនោះក៏បានបញ្ជាក់ពីការរំលោភបំពានរបស់រុស្ស៊ីទៅលើព្រំដែនរបស់ប្រទេស
ជិតខាង និងព្យាយាមកម្ទេចសម្ព័ន្ធមិត្តរបស់អង្គការអូតង់ ក្នុងគោលបំណងផ្លាស់ប្តូរសន្តិសុខនិងរចនាសម្ព័ន្ធសេដ្ឋកិច្ចនៅក្នុងតំបន់អ៊ឺរ៉ុប និងតំបន់មជ្ឈិមបូព៌ាទៅតាមការចង់បានរបស់ខ្លួន៕
