ភ្ជាប់​ទៅ​គេហទំព័រ​ទាក់ទង

ប្រជាជន​ជប៉ុន​ធ្វើ​បាតុកម្ម​ធំ​មួយ​ប្រឆាំង​សេចក្តី​ព្រាង​ច្បាប់​យោធា​


ហ្វូង​មនុស្ស​ធ្វើបាតុកម្ម​នៅ​ខាង​មុខ​អាគារ National Diet នៅ​ក្រុង​តូក្យូ​ កាល​ពី​ថ្ងៃ​អាទិត្យ​ ទី៣០ ខែ​សីហា ឆ្នាំ​២០១៥។

ប្រជាជនជប៉ុន​រាប់ម៉ឺន​នាក់​បាន​ប្រមូលផ្តុំ​គ្នា​នៅ​ជិតសភា​ក្នុង​ក្រុង​តូក្យូ​កាល​ពី​ថ្ងៃ​អាទិត្យ​ដើម្បី​ធ្វើបាតុកម្ម​ប្រឆាំង​នឹង​សេចក្តី​ព្រាង​ច្បាប់​មួយ​ដែល​នឹង​អនុញ្ញាត​ឲ្យ​ពួក​យោធា​ទៅប្រយុទ្ធ​នៅ​ឯ​ប្រទេស​ក្រៅ​ជា​លើកដំបូង​ចាប់​តាំង​ពី​សង្គ្រាម​លោក​លើកទី​ពីរ​មក។​

នៅ​ក្នុង​បាតុកម្ម​មួយ​ក្នុង​បណ្តា​បាតុកម្ម​ធំៗ​កាល​ពី​ប៉ុន្មាន​ឆ្នាំ​ថ្មីៗនេះ​ ហ្វូង​មនុស្ស​បានស្រែក​បន្ទរថា«កុំធ្វើសង្គ្រាម» និង​ថា «Abe ចុះចេញពី​តំណែងទៅ» នៅ​ពេល​មាន​ក្រុម​ប៉ូលិស​មួយ​ចំនួន​ខិតខំព្យាយាម​ថែរក្សា​របៀប​រៀបរយ។​

បាតុកម្ម​នៅ​ក្នុងក្រុង​តូក្យូ​ជា​បាតុកម្មមួយ​ក្នុង​បណ្តា​បាតុកម្ម​រាប់រយ​ដែល​បាន​ត្រូវ​គ្រោង​ធ្វើ​នៅ​ទូទាំង​ប្រទេសជប៉ុន​ប្រឆាំង​នឹង​គោលនយោបាយ​សន្តិសុខ និង​គម្រោង​របស់​លោក​នាយករដ្ឋមន្ត្រី Shinzo Abe ក្នុង​ការ​កែប្រែ​រដ្ឋធម្មនុញ្ញ​សន្តិភាព​និយម​បន្ទាប់​ពីសង្គ្រាម​របស់​ប្រទេស​ ​ដែល​ដាក់​កំហិត​លើ​ក្រុម​យោធា។

កាល​ពី​ខែ​កក្កដា​សភា​ជាន់ទាប​របស់​ប្រទេស​ជប៉ុន​បានអនុម័ត​សេចក្តី​ព្រាង​ច្បាប់​មួយ​ចំនួន​ដែល​នឹង​អនុញ្ញាត​ឲ្យ​កង​កម្លាំង​ស្វ័យការពារ​របស់​ប្រទេស​ចូល​រួម​ក្នុង​ការ​ប្រយុទ្ធ​ដើម្បី​ការពារ​សម្ព័ន្ធមិត្ត​ណាមួយ​ដែល​បាន​ឋិត​នៅ​ក្រោម​ការ​វាយ​ប្រហារ។​

នៅ​ពេល​នេះ​សភា​ជាន់ខ្ពស់​កំពុង​ជជែក​ដេញ​ដោល​គ្នា​អំពី​សេចក្តីពា្រង​ច្បាប់ទាំង​នោះ ​ហើយគេរំពឹង​ថា​ សភា​នេះនឹង​អនុម័ត​សេចក្តី​ព្រាង​ច្បាប់​ទាំង​នោះ​ឲ្យ​ទៅ​ជាច្បាប់មិន​ហួស​ពី​ដំណាច់​ខែ​កញ្ញាទេ។ តាមរយៈ​រដ្ឋធម្មនុញ្ញ​ប្រទេស​ជប៉ុន​អាច​ប្រើ​កម្លាំង​តែ​ក្នុង​ករណីយ​ការពារ​ខ្លួនប៉ុណ្ណោះ៕

XS
SM
MD
LG