បាតុកររាប់ម៉ឺននាក់នៅក្នុងទីក្រុងសេអ៊ូលបានប្រមូលផ្តុំកាលពីថ្ងៃសៅរ៍ម្សិលម៉ិញនេះ ដើម្បីទាមទារឲ្យលោកស្រីប្រធានាធិបតី Park Geun-hye ចុះចេញពីតំណែង។
ប៉ូលិសរំពឹងថា មានមនុស្សប្រមាណ២សែន៦ម៉ឺននាក់បានចូលរួម ដែលបានធ្វើឲ្យបាតុកម្មនេះក្លាយជាបាតុកម្មដ៏ធំបំផុតមួយនៅក្នុងរដ្ឋធានីក្នុងរយៈពេលបីទសវត្សរ៍កន្លងមកនេះ។
សិស្សវិទ្យាល័យ ដូនជីកាតូលិក កសិករ ក្រុមអ្នកចូលនិវត្តន៍ រួមទាំងគូស្វាមីភរិយាដែលមានកូនតូចផងដែរ បានចូលរួមធ្វើបាតុកម្មនៅតាមដងផ្លូវនៅខាងមុខរបងវិមានប្រធានាធិបតីដោយស្រែកថា «លោកស្រី Park Geun-hye ចុះចេញទៅ» អមជាមួយនឹងសំឡេងត្រែនិងស្គរផងដែរ។
នៅពេលថ្ងៃលិច ក្រុមបាតុករបានគ្រវីទៀននិងបដា ហើយបន្តស្រែកខ្លាំងៗអំពាវនាវឲ្យលោកស្រី Park លាលែងពីតំណែង។
ប្រជាពលរដ្ឋកូរ៉េនៅទូទាំងប្រទេសបានមកប្រមូលផ្តុំគ្នានៅក្នុងរដ្ឋធានីដើម្បីចូលរួមធ្វើបាតុកម្មនេះ។
លោក Cho Joo-Pyo ដែលបានចូលរួមធ្វើបាតុកម្មជាមួយនឹងប្រពន្ធនិងកូនរបស់លោក និងបានធ្វើដំណើរជិត ២០០គីឡូម៉ែត្រនោះ បានប្រាប់ទីភ្នាក់ងារព័ត៌មានបារាំងថា៖«ម្សិលម៉ិញនេះគឺជាថ្ងៃខួបអាពាហ៍ពិពាហ៍របស់យើង ប៉ុន្តែយើងលុបដំណើរកំសាន្តរបស់យើងចោលដើម្បីធ្វើដំណើរមកកាន់រដ្ឋធានី សេអ៊ូល ដោយសារតែយើងគិតថាវាមានសារៈសំខាន់ជាងសម្រាប់កូនស្រីរបស់យើង»។
ការតវ៉ានេះគឺជាការតវ៉ាចុងក្រោយបង្អស់ដើម្បីទាមទារឲ្យលោកស្រី Park ចុះចេញពីតំណែងជុំវិញរឿងអាស្រូវពុករលួយដែលបានប៉ះពាល់ដល់រដ្ឋបាលរបស់លោកស្រី។
ការស៊ើបអង្កេតទៅលើករណីប្រាក់រាប់លានដុល្លារ ដែលត្រូវបានចោទប្រកាន់ថាបានធ្វើឡើងដោយលោកស្រី Choi Soon-sil ដែលជាមិត្តយូរអង្វែងរបស់លោកស្រីប្រធានាធីបតី Park បានធ្វើឲ្យកិត្តិនាមរបស់លោកស្រី Park ក្លាយជាមេដឹកនាំពុករលួយម្នាក់ និងរឹតតែធ្វើឲ្យលោកស្រីឯកោនិងបាត់បង់អំណាច៕
