កាលពីថ្ងៃពុធម្សិលមិញ លោក Paul Manafort ដែលជាអតីតប្រធានយុទ្ធនាការបោះឆ្នោតរបស់លោកប្រធានាធិបតី Donald Trump ត្រូវបានតុលាការកាត់ទោសឲ្យជាប់ពន្ធនាគារ៣ឆ្នាំកន្លះបន្ថែមទៀត ពីបទឃុបឃិតទាក់ទិននឹងការងាររបស់លោកនៅក្នុងប្រទេសអ៊ុយក្រែនសម្រាប់គណបក្សនយោបាយ ដែលគាំទ្ររុស្ស៊ី ដែលទោសនេះបានបន្ថែមទៅលើស្ថានទង្ងន់ទោស ដែលតុលាការបានកាត់ទោសលោកកាលពីសប្តាហ៍មុន។
ដោយមានបញ្ហាសុខភាព លោក Manafort បានជិះលើកៅអីរុញនិងបាននិយាយសូមទោសដល់លោកស្រីចៅក្រម Amy Berman Jackson នៅក្នុងបន្ទប់សវនាការក្នុងរដ្ឋធានីវ៉ាស៊ីនតោន ដោយលោកបាននិយាយថា លោកមានការខ្មាស់អៀនយ៉ាងខ្លាំងចំពោះទង្វើរបស់លោក និងបានសារភាពទទួលកំហុស។
លោកManafort បាននិយាយនៅចំពោះមុខចៅក្រមថា៖ «ខ្ញុំសូមអភ័យទោសចំពោះអ្វីៗទាំងអស់ដែលខ្ញុំបានប្រព្រឹត្ត។ ដោយសារតែខ្ញុំមិនអាចត្រឡប់ក្រោយបាន ខ្ញុំនឹងធានាថាអនាគតនឹងមានសភាពផ្សេងពីនេះ»។ ក៏ប៉ុន្តែលោកស្រី Jackson បានប្រាប់លោក Manafort ដែលមានវ័យ៦៩ឆ្នាំថា លោកស្រីមិនអាចព្រងើយកន្តើយចំពោះទង្វើខុសឆ្គងរបស់លោកបានទេ។
លោកស្រីចៅក្រម Jackson បានដកហូតការអនុញ្ញាតឃុំខ្លួនលោកនៅក្នុងផ្ទះ និងបានសម្រេចឃុំខ្លួនលោកក្នុងពន្ធនាគារបន្ទាប់ពីសវនាការលើបទចោទថា លោកបានច្រឡោតដាក់សាក្សី និងបានសម្រេចឲ្យលោក Manafort ជាប់ពន្ធនាគារ៧៣ខែ។ ក៏ប៉ុន្តែ លោកស្រីបាននិយាយថា លោកបានជាប់ឃុំ៣០ខែរួចមកហើយ ដូច្នះលោកត្រូវនៅសល់៤៧ខែទៀត។ សរុបទៅលោក Manafort នឹងត្រូវជាប់ពន្ធនាគារ៧ឆ្នាំកន្លះ៕
