ប៉ូលិសរបស់ម៉ាឡេស៊ីកាលពីថ្ងៃច័ន្ទ បានប្រកាសថា ពួកគេនឹងធ្វើការស៊ើបអង្កេតទៅលើក្រុមអ្នកស៊ើបអង្កេតដែលកំពុងធ្វើការស៊ើបអង្កេត អំពីការចោទប្រកាន់ដែលថា ថវិការបស់រដ្ឋរាប់លានដុល្លារត្រូវបានគេបញ្ជូនទៅក្នុងគណនីធនាគាររបស់លោកនាយករដ្ឋមន្រ្តី Najib Razak។
អគ្គស្នងការប៉ូលិសរបស់ប្រទេសម៉ាឡេស៊ីលោក Khalid Abu Bakar និយាយថា ក្រុមមន្រ្តីប៉ូលិសនឹងព្យាយាមកំណត់និងបញ្ជាក់ថា អ្នកណាដែលបានធ្វើឲ្យបែកធ្លាយ «ឯកសារសម្ងាត់ឲ្យទៅជនបរទេស» និងថាតើឯកសារទាំងនោះពិតឬក៏ក្លែងក្លាយ។
កាសែត The Wall Street Journal ចេញផ្សាយកាលពីថ្ងៃទី៣ ខែកក្កដា បានដកស្រង់ខ្លឹមសារពីឯកសារការស៊ើបអង្កេតរបស់រដ្ឋាភិបាលមួយ ដែលបានរាយការណ៍អំពីថវិកាចំនួន៧០០លានដុល្លារ ប្រហែលជាត្រូវបានផ្ទេរតាមរយៈទីភ្នាក់ងារនិងក្រុមហ៊ុនដែលមានជាប់ពាក់ព័ន្ធនឹងក្រុមហ៊ុនយុទ្ធសាស្ត្រអភិវឌ្ឍ 1MDB ដែលគ្រប់គ្រងដោយរដ្ឋាភិបាលរបស់ប្រទេសម៉ាឡេស៊ី មុនពេលត្រូវបានដាក់បញ្ចូលទៅក្នុងគណនីធនាគារដែលមានឈ្មោះរបស់លោកនាយករដ្ឋមន្ត្រី។
ភាគច្រើននៃប្រាក់ទាំងនោះត្រូវបានគេរាយការណ៍ថា បានហូរចូលទៅក្នុងគណនីរបស់លោកនាយករដ្ឋមន្រ្តី Najib មុនពេលមានការបោះឆ្នោតជាតិចុងក្រោយ (កាលពីឆ្នាំ២០១៣) ក៏ប៉ុន្តែ វានៅមិនទាន់មានភាពច្បាស់លាស់ថាតើមានអ្វីកើតឡើងចំពោះថវិកាទាំងនោះបន្ទាប់មកទៀតនោះទេ។
លោកអគ្គស្នងការប៉ូលិស Khalid បាននិយាយថា ការបែកធ្លាយឯកសារនេះអាចជាផ្នែកមួយនៃ «ការសមគំនិតដើម្បីបង្ខូចដំណើរការលទ្ធិប្រជាធិបតេយ្យរបស់ម៉ាឡេស៊ីនិងដើម្បីផ្តួលរំលំនាយករដ្ឋមន្ត្រី»។
នាយករដ្ឋមន្រ្តីដែលកាន់តំណែងយូរជាងគេបំផុតរបស់ប្រទេសម៉ាឡេស៊ី លោក Mahathir Mohamad បានធ្វើការរិះគន់យ៉ាងខ្លាំងទៅលើ លោក Najib អ្នកស្នងតំណែងដែលត្រូវបានជ្រើសរើសយ៉ាងល្អិតល្អន់នោះ ថាបានទទួលបរាជ័យក្នុងការធ្វើឲ្យប្រទេសម៉ាឡេស៊ីក្លាយជាប្រទេសដែលមានការអភិវឌ្ឍឲ្យបានពេញលេញ ដែលនេះបណ្តាលឲ្យអន្តរជាតិបាត់បង់នូវទំនុកចិត្តផងដែរ។
លោកសាស្រ្តាចារ្យ James Chin គឺជានាយកនៃវិទ្យាស្ថានអាស៊ីនៅឯសាកលវិទ្យាល័យ Tasmania ប្រទេសអូស្ត្រាលី។
«រឿងរ៉ាវទាំងអស់ដែលអ្នកបានឮពីអំពើពុករលួយទាក់ទិននឹងលោកនាយករដ្ឋមន្រ្តីនិងភរិយារបស់លោក អំពីថវិការាប់លានដុល្លារដែលកំពុងត្រូវបានគេផ្ទេរមកពីក្រុមហ៊ុនរដ្ឋនោះ គឺគ្រាន់តែជាផ្នែកមួយនៃឆាកល្ខោនដណ្តើមអំណាចនយោបាយរវាងលោក Mahathir អតីតនាយករដ្ឋមន្រ្តីនិងលោក Najib Razak នាយករដ្ឋមន្ត្រីនាពេលបច្ចុប្បន្នប៉ុណ្ណោះ»។
លោក Chin បានពន្យល់ថា ស្ថាប័ន(រដ្ឋ)របស់ប្រទេសម៉ាឡេស៊ីត្រូវបំពុលដោយដំណើរការនយោបាយ ហើយសូម្បីតែមន្ត្រីរដ្ឋាភិបាលក៏មិនទុកចិត្តក្រុមប៉ូលិសឬអាជ្ញាធរក្នុងស្រុកផ្សេងទៀត ក្នុងការស៊ើបអង្កេតបញ្ហានេះឲ្យបានពេញលេញនោះទេ។
«ថវិកាដែលត្រូវបានយកចេញពីសហគ្រាសចំណុះរដ្ឋនេះ ត្រូវបានប្រើប្រាស់ចម្បងសម្រាប់ការបោះឆ្នោតជាតិចុងក្រោយ។ ដូច្នេះគ្មាននរណាម្នាក់ចង់បើកកកាយរឿងទាំងនេះនោះទេ ព្រោះអ្វីដែលអាចនឹងកើតឡើងនោះ គឺអាចនឹងលាតត្រដាងពីរឿងល្បិចកលនានាដែលបានកើតមានឡើងកាលពីអំឡុងពេលការបោះឆ្នោតចុងក្រោយនេះ»។
ក្នុងការបោះឆ្នោតកាលពីពីរឆ្នាំមុន រដ្ឋាភិបាលចម្រុះដែលកំពុងកាន់អំណាចបានទទួលលទ្ធផលអាក្រក់បំផុតដែលមិនធ្លាប់មានពីមុនមក។ ប៉ុន្តែរដ្ឋាភិបាលនេះ នៅតែអាចរក្សាបាននូវសំឡេងភាគច្រើននៅក្នុងសភាដែលខ្លួនមានចាប់តាំងពីឆ្នាំ១៩៥៧មក៕
ប្រែសម្រួលដោយ ស្រេង លក្ខិណា
