សមត្ថកិច្ចម៉ាឡេស៊ីបានចាប់និងឃុំខ្លួនសកម្មជនគណបក្សសង្គ្រោះជាតិពីរនាក់ នៅពេលដែលពួកគេកំពុងរង់ចាំធ្វើដំណើរតាមយន្តហោះពីម៉ាឡេស៊ីឆ្ពោះទៅកាន់ប្រទេសថៃ។ នេះបើយោងតាមសារព័ត៌មាន Reuters ដែលបានចេញផ្សាយសេចក្តីរាយការណ៍របស់ខ្លួននៅថ្ងៃអង្គារនេះ។
សកម្មជនគណបក្សប្រឆាំងទាំងពីរនេះ ដែលមានឈ្មោះ ហេង ស៊ាងលាង និងងឹម គាថា ត្រូវបានសាកសួរនិងឃុំខ្លួនដោយមន្ត្រីអន្តោប្រវេសន៍ម៉ាឡេស៊ី កាលពីយប់ថ្ងៃច័ន្ទ ហើយគ្រោងនឹងត្រូវបញ្ជូនខ្លួនទៅកាន់ប្រទេសកម្ពុជាវិញនៅថ្ងៃអង្គារ។ ក៏ប៉ុន្តែ គណៈកម្មការសិទ្ធិមនុស្សម៉ាឡេស៊ីបានតវ៉ាកុំឲ្យអាជ្ញាធរម៉ាឡេស៊ីបញ្ជូនខ្លួនអ្នកទាំងពីរនេះ។
លោក Jerald Joseph សមាជិកនៃគណៈកម្មការសិទ្ធិមនុស្សម៉ាឡេស៊ី បានប្រាប់សារព័ត៌មាន Reuters ដែលត្រូវបានដកស្រង់ពាក្យសម្តីថា៖«នាពេលនេះ យើងកំពុងព្យាយាមជួបសកម្មជនទាំងពីរនាក់នៅមន្ទីរឃុំឃាំង ដើម្បីកំណត់ស្ថានភាពរបស់ពួកគេ។ ប៉ុន្តែ យើងរីករាយដែលក្រសួងមហាផ្ទៃម៉ាឡេស៊ី បានសម្រេចមិនបញ្ជូនខ្លួនអ្នកទាំងពីរនេះ ហើយខ្ញុំគិតថា នេះគឺជាសញ្ញាណល្អមួយ»។
យោងតាមឯកសាររបស់ឧត្តមស្នងការអង្គការសហប្រជាជាតិសម្រាប់ជនភៀសខ្លួន ឬហៅកាត់ថា UNHCR ដែល VOA ទទួលបាន កញ្ញា ងឹម គាថា ដែលជាសកម្មជនបក្សប្រឆាំងប្រចាំខេត្តព្រះសីហនុ បានដាក់ពាក្យស្នើសុំសិទ្ធិជ្រកកោននៅប្រទេសទីបី តាមរយៈអង្គការ UNHCR ប្រចាំប្រទេសម៉ាឡេស៊ី កាលពីខែតុលាកន្លងទៅនេះ បន្ទាប់ពីរូបនាងត្រូវបានតុលាការខេត្តព្រះសីហនុចោទប្រកាន់បទ«រួមគំនិតក្បត់» តាមក្រមព្រហ្មទណ្ឌកម្ពុជា។
រីឯលោក ហេង ស៊ាងលាង ដែលជាអតីតចៅសង្កាត់រងទី១នៃសង្កាត់វាលវង់ ខណ្ឌ៧មករា រាជធានីភ្នំពេញ បានធ្វើដំណើរមកកាន់ប្រទេសម៉ាឡេស៊ី កាលពីថ្ងៃទី២៣ ខែកញ្ញា ដោយសារលោកបានរងការគំរាមកំហែងខាងសុវត្ថិភាពនៅក្នុងប្រទេសកម្ពុជា។ លោក ហេង ស៊ាងលាង បានធ្វើដំណើរទៅកាន់ប្រទេសថៃកាលពីថ្ងៃទី១៨ ខែតុលា ដើម្បីស្នើសុំទិដ្ឋាការសារជាថ្មីមកកាន់ប្រទេសម៉ាឡេស៊ីវិញ ហើយក្រោយមកក៏ត្រូវបានឃុំខ្លួនជាមួយកញ្ញា ងឹម គាថា នៅពេលពួកគេគ្រោងធ្វើដំណើរទៅប្រទេសថៃ។
លោក Phil Robertson អនុប្រធានប្រចាំតំបន់អាស៊ីនៃអង្គការឃ្លាំមើលសិទ្ធិមនុស្ស Human Rights Watch បានបញ្ជាក់ប្រាប់សារព័ត៌មាន Reuters ថា កញ្ញា ងឹម គាថា និងលោក ហេង ស៊ាងលាង គឺពិតជាសកម្មជននៃគណបក្សសង្គ្រោះជាតិ ដែលត្រូវបានតុលាការកំពូលរំលាយកាលពីចុងឆ្នាំ២០១៧។
យ៉ាងណាមិញ សកម្មជនទាំងពីរនេះ អាចនឹងត្រូវបានបញ្ជូនខ្លួនមកកម្ពុជាវិញនៅថ្ងៃពុធនេះ បើទោះបីជាមានការតវ៉ាពីគណៈកម្មការសិទ្ធិមនុស្សម៉ាឡេស៊ីក្តី។
ចាប់តាំងពីខែសីហា បន្ទាប់ពីលោក សម រង្ស៊ី ប្រធានស្តីទីនៃគណបក្សសង្គ្រោះជាតិបានប្រកាសធ្វើមាតុភូមិនិវត្តន៍នៅថ្ងៃទី៩ ខែវិច្ឆិកាខាងមុខនេះ គេឃើញថា សកម្មជនគណបក្សប្រឆាំងយ៉ាងហោចណាស់ ៤៨នាក់ ត្រូវបានចាប់ឃុំខ្លួននិងរងការចោទប្រកាន់ពីបទ «រួមគំនិតក្បត់» ក្រោមគម្រោងមួយដែលរដ្ឋាភិបាលកម្ពុជាបានចាត់ទុកថា ជាគម្រោងផ្តួលរំលំរដ្ឋាភិបាល។
កាលពីថ្ងៃសុក្រសប្តាហ៍មុននេះ រដ្ឋាភិបាលកម្ពុជាបានដាក់ពង្រាយកងកម្លាំងសន្តិសុខ ប៉ូលិស និងយោធា នៅតាមច្រកព្រំដែនឆ្លងពីប្រទេសទីពីរមកកាន់ប្រទេសកម្ពុជា ជាពិសេសនៅប្រទេសថៃ ដើម្បីត្រៀមចាប់ខ្លួនលោក សម រង្ស៊ី និងសមាជិកនៃក្រុមគណបក្សរបស់លោក ដែលគ្រោងធ្វើដំណើរមកកម្ពុជាវិញ បន្ទាប់ពីបាននិរទេសខ្លួនរស់នៅក្រៅប្រទេស។ បន្ថែមលើនេះ រដ្ឋាភិបាលកម្ពុជាក៏បានហាមមិនឲ្យក្រុមហ៊ុនអាកាសចរណ៍ទាំងអស់ដឹកលោក សម រង្ស៊ី និងមន្រ្តីជាន់ខ្ពស់មួយចំនួនទៀត ចូលក្នុងប្រទេសកម្ពុជាផងដែរ។
នៅថ្ងៃអង្គារនេះដែរ អង្គការសិទ្ធិមនុស្ស Amnesty International ក៏បានអំពាវនាវឲ្យរដ្ឋាភិបាលកម្ពុជាដោះលែងសកម្មជនគណបក្សសង្គ្រោះជាតិ ដែលត្រូវបានឃុំខ្លួន ដោយសារតែពួកគេបានអនុវត្តសិទ្ធិរបស់ខ្លួនដោយសន្តិវិធី ហើយស្នើឲ្យរដ្ឋាភិបាលកម្ពុជាទម្លាក់បទចោទមកលើពួកគេជាបន្ទាន់។ អង្គការសិទ្ធិមនុស្សអន្តរជាតិមួយនេះ ក៏ស្នើឲ្យសហគមន៍អន្តរជាតិឃ្លាំមើលឲ្យបានដិតដល់លើស្ថានភាពសិទ្ធិមនុស្សនៅកម្ពុជា ដែលកំពុងតែធ្លាក់ចុះយ៉ាងខ្លាំងផងដែរ៕
