នៅថ្ងៃចន្ទនេះ តុលាការកំពូលបានសម្រេចបន្តឃុំខ្លួនយុវជន គង់ រ៉ៃយ៉ា ឲ្យជាប់ពន្ធនាគារព្រៃស ដោយបានច្រានចោលការស្នើសុំរបស់យុវជនរូបនេះឲ្យរូបខ្លួនបាននៅក្រៅឃុំ ដោយសារស្ថានភាពគ្រួសារលំបាក។
ចាប់តាំងពីដើមខែកក្កដាមក លោក គង់ រ៉ៃយ៉ា បានជាប់ក្នុងពន្ធនាគាររយៈពេលជាង ៣ខែមកហើយ បន្ទាប់ពីលោកត្រូវបានចាប់ខ្លួន ដោយសារតែលោកបានប្រកាសតាមបណ្តាញសង្គមហ្វេសប៊ុក លក់អាវយឺតដែលមានរូបលោក កែម ឡី ក្នុងឱកាសគម្រប់ខួបបីឆ្នាំនៃការស្លាប់របស់អ្នកវិភាគនយោបាយនិងសង្គមរូបនេះ។
លោក គង់ រ៉ៃយ៉ា រួមទាំងលោក សួង នាគព័ន្ធ ដែលត្រូវបានអាជ្ញាធរចាប់ឃុំខ្លួនពាក់ព័ន្ធនឹងការចូលរួមរបស់ពួកគេក្នុងពិធីគម្រប់ខួបការស្លាប់របស់លោកកែម ឡី ត្រូវបានចោទប្រកាន់ពីបទញុះញង់ឲ្យប្រព្រឹត្តបទឧក្រិដ្ឋជាអាទិ៍ តាមមាត្រា ៤៩៤ និង៤៩៥ នៃក្រមព្រហ្មទណ្ឌ ដែលអាចឲ្យពួកគេជាប់ទោសពី៦ខែ ដល់២ឆ្នាំ បើសិនតុលាការរកឃើញថាពួកគេមានពិរុទ្ធភាព។
អង្គការសិទ្ធិមនុស្សជាតិ និងអន្តរជាតិ បានបន្តអំពាវនាវដល់រដ្ឋាភិបាលកម្ពុជាឲ្យដោះលែងយុវជនទាំងពីរនាក់នេះ និងទម្លាក់បទចោទមកលើពួកគេទាំងពីរនាក់នេះ។ អង្គការ Amnesty International បានចាត់ទុកយុវជនទាំងពីរនេះ ថាជា «អ្នកទោសមនសិការ»៕
