សភាជាតិម៉ាឡេស៊ីនឹងធ្វើការបោះឆ្នោតជ្រើសរើសបេក្ខជននាយករដ្ឋមន្ត្រីថ្មី នៅថ្ងៃច័ន្ទសប្តាហ៍ក្រោយ ហើយប្រសិនបើមិនមានបេក្ខជនណាទទួលបានការគាំទ្រភាគច្រើននោះ ទេ ប្រទេសម៉ាឡេស៊ីនឹងធ្វើការបោះឆ្នោតថ្មីភ្លាមៗ។ នេះបើយោងតាមការបញ្ជាក់របស់លោក Mahathir Mohamad ដែលជានាយករដ្ឋមន្ត្រីស្តីទីនៅថ្ងៃព្រហស្បតិ៍នេះ។
ប្រទេសនៅក្នុងតំបន់អាស៊ីអាគ្នេយ៍មួយនេះ បានធ្លាក់ចូលទៅក្នុងវិបត្តិនយោបាយក្នុងសប្តាហ៍នេះ ដោយសារការលាលែងដែលមិនគ្រោងទុករបស់លោក Mahathir អាយុ៩៤ឆ្នាំ ដែលជាមេដឹកនាំវ័យចំណាស់ជាងគេក្នុងពិភពលោក។ ការណ៍នេះបាននាំឲ្យមានការប្រជែងអំណាចរវាងលោក Mahathir ជាមួយអតីតសត្រូវនយោបាយរបស់លោក គឺលោក Anwar Ibrahim អាយុ៧២ឆ្នាំ។
លោក Mahathir ថ្លែងថា សភាម៉ាឡេស៊ីនឹងមានសិទ្ធិបោះឆ្នោតជ្រើសរើសនាយករដ្ឋមន្ត្រីថ្មី ក្រោយពីព្រះមហាក្សត្រម៉ាឡេស៊ី បានកំណត់ថាមិនមានបេក្ខជនណាម្នាក់ទទួលបានការគាំទ្រគ្រប់គ្រាន់ដើម្បីធ្វើជានាយករដ្ឋមន្ត្រីថ្មីបាន។
ការលាលែងរបស់លោក Mahathir បានធ្វើឲ្យបែកបាក់ទាំងស្រុងនូវសម្ព័ន្ធភាពនយោបាយរបស់លោកជាមួយលោក Anwar ដែលលោកទាំងពីរបានរួមកម្លាំងគ្នារហូតទទួលបានជ័យជម្នះដ៏គួរឲ្យភ្ញាក់ផ្អើលក្នុងការបោះឆ្នោតជាតិកាលពីឆ្នាំ២០១៨ ដែលបានឲ្យលោក Mahathir ត្រឡប់មកកាន់តំណែងជាមេដឹកនាំវិញក្រោយការដឹកនាំប្រទេសម៉ាឡេស៊ីពីឆ្នាំ១៩៨១ដល់២០០៣៕
