ប្រជាជនរាប់រយនាក់បានចូលរួមការហែក្បួនមួយទៅកាន់រដ្ឋសភានៅទីក្រុងលីឡុងវ៉េ (Lilongwe)។ នៅលើបដាមួយរបស់ពួកគេសរសេរថា៖ «ភ្ញាក់ឡើង សមាជិកសភាទាំងឡាយ!»។
លោក Edward Chileka Banda ដែលកំពុងចាត់ចែងឲ្យមានប្រធានសម្រាប់ការហែក្បួននេះ និយាយថា៖ «ការប្រគល់ញត្តិទៅរដ្ឋសភានេះបង្ហាញពីការប្តេជ្ញាចិត្តរបស់ពួកយើងក្នុងនាមជាប្រជាពលរដ្ឋ និងជាសង្គមស៊ីវិល ដើម្បីទាមទារឲ្យបញ្ឈប់ភ្លាមៗ និងបញ្ចប់ការសម្លាប់មនុស្សដែលមានលក្ខណៈភឿក»។
ញត្តិដែលបានដាក់ជូននេះ ទាមទារឲ្យមានការដាក់ទោសទណ្ឌជនល្មើសដែលវាយប្រហារមនុស្សភឿកឲ្យជាប់ពន្ធនាគារអស់មួយជិវិត។
សមាជិកសភាម្នាក់ គឺលោកស្រី Ester Jailosi Jolobala បានទទួលញត្តិនោះក្នុងនាមជាអ្នកតំណាងនៃអ្នកនាំពាក្យរដ្ឋសភា។ លោកស្រីនិយាយថា សមាជិកសភានឹងចាត់វិធានការឆាប់ៗនេះ។
«វាជាការរំខានខ្លាំងណាស់ ដែលយើងឃើញជនល្មើសត្រូវបានដោះលែងឲ្យរួចខ្លួន ដោយសារការបង់ប្រាក់ធានា ឬការដាក់ទោសដោយមានការអត់ឱន។ ការធ្វើដូច្នេះ ធ្វើឲ្យមនុស្សភឿកនៅម៉ាឡាវីមានការភ័យខ្លាចកាន់តែខ្លាំង»។
មនុស្សភឿកចំនួន១៧នាក់ត្រូវបានសម្លាប់នៅម៉ាឡាវីក្នុងអំឡុងពេល២ឆ្នាំកន្លងទៅនេះ។ ប៉ុន្តែមានតែជនល្មើសពីរបីនាក់ប៉ុណ្ណោះត្រូវបានចាប់ខ្លួន។
ប្រធានសមាគមមនុស្សភឿក ក្នុងប្រទេសម៉ាឡាវី លោក Boniface Massah និយាយថា ជាច្រើនឆ្នាំមកហើយដែលរដ្ឋាភិបាលម៉ាឡាវីបានសន្យាតែនៅលើបបូមាត់អំពីដំណោះស្រាយលើការវាយប្រហារទាំងនេះ។
«ដំណាក់កាលនៃការត្រួតពិនិត្យច្បាប់ដែលនឹងមាននោះ ត្រូវតែធ្វើបានឲ្យកាន់តែលឿន។ ហើយគួរតែមានធនធានដើម្បីអនុវត្តដំណើរការនេះ»។
មនុស្សភឿកដែលជាមនុស្សគ្មានពណ៌នៅលើស្បែក សក់ និងភ្នែក បានក្លាយជាមុខសញ្ញាក្នុងប្រទេសម៉ាឡាវីនិងផ្នែកផ្សេងៗនៃទ្វីបអាហ្រ្វិក ដោយសារតែជំនឿមិនពិតមួយដែលជឿថា ផ្នែកមួយនៃខ្លួនប្រាណរបស់មនុស្សភឿក អាចនឹងផ្តល់ឲ្យនូវសំណាងល្អ និងទ្រព្យសម្បត្តិស្តុកស្តម្ភដល់ពួកគេ។
ប្រទេសម៉ាឡាវីបានចំណាយពេលមួយសប្តាហ៍កាលពីសប្តាហ៍មុន ដើម្បីបង្កើនការយល់ដឹងលើបញ្ហានេះ។ ក្រុមបាល់ទាត់កំពូលៗរបស់ប្រទេសនេះបានចាប់ផ្តើមយុទ្ធនាការមួយឈ្មោះថា «ហ្គេមបានចប់ហើយ»។
ក្រុមបាល់ទាត់ទាំងនេះ បានអញ្ជើញមនុស្សភឿកទៅទស្សនាការប្រកួតពិសេសមួយនេះ ហើយបានបិទបដាជុំវិញពហុកីឡដ្ឋានប្រកាសកុំឲ្យមានការវាយប្រហារលើមនុស្សភឿកតទៅទៀត៕
ប្រែសម្រួលដោយ វិញ សុជាតា
