ភ្ជាប់​ទៅ​គេហទំព័រ​ទាក់ទង

site logo
ព័ត៌មាន​​ថ្មី

លោក Macron ឈ្នះ​ការ​បោះឆ្នោត​​ប្រធានាធិបតី​បារាំង​​​សម្រាប់​អាណត្តិ​ទី២


ប្រធានាធិបតី​បារាំង​លោក Emmanuel Macron (ស្តាំ) ដែល​ជា​បេក្ខជន​របស់​គណបក្ស La Republique en Marche (LREM) ផង​នោះ កាន់​ដៃ​ភរិយា​គឺ​លោកស្រី​ Brigitte Macron នៅ​ក្នុង​ទី​ក្រុង​ប៉ារីស កាល​ពី​ថ្ងៃ​ទី​២៤ ខែ​មេសា ឆ្នាំ​២០២២ ក្រោយ​ទទួល​បាន​ជ័យជម្នះ​នៅ​ក្នុង​ការ​បោះឆ្នោត។ (AFP)

ប្រធានាធិបតី​បារាំង​លោក Emmanuel Macron បាន​ឈ្នះ​ការបោះឆ្នោត​ប្រធានាធិបតី​បារាំង​នៅ​ជុំទី២ ដែល​ជាជុំ​ផ្តាច់​ព្រ័ត្រ​កាលពី​ថ្ងៃ​អាទិត្យម្សិលមិញលើ​គូ​ប្រកួតប្រជែង​របស់​លោក​គឺ​លោកស្រី Marine Le Pen នៃ​គណបក្ស​ស្តាំនិយម​ជ្រុល។

បេក្ខជន​ទាំង​ពីរ​មាន​ទស្សនៈ​ផ្ទុយ​គ្នា​យ៉ាង​ខ្លាំង មិន​គ្រាន់តែ​បញ្ហាក្នុង​ប្រទេសនោះ​ទេ ប៉ុន្តែ​ក៏​មាន​បញ្ហា​ស្តី​ពី​តួនាទី​របស់បារាំង​នៅក្នុង​ទ្វីបអឺរ៉ុប អង្គការ​អូតង់​និងបញ្ហា​មួយ​ចំនួនផ្សងៗ​ទៀត​នៅជុំវិញ​ពិភពលោក​ផង​ដែរ។

នៅ​ក្នុង​សុន្ទរកថា​ទទួល​ជ័យជម្នះ​លោក Macron បាន​និយាយ​ថា៖ «អ្នក​បោះឆ្នោតជា​ច្រើននៅ​ក្នុង​ប្រទេស​បារាំង​បាន​បោះឆ្នោត​ឱ្យ​ខ្ញុំ មិន​មែន​ដោយ​សារពួក​គេ​គាំទ្រនូវ​គំនិត​របស់​ខ្ញុំនោះ​ទេ ក៏ប៉ុន្តែ​មក​ពី​ពួកគេ​មិន​ចង់ឱ្យ​បេក្ខជន​មក​ពី​គណបក្ស​ស្តាំនិយម​ជ្រុល​ឡើង​កាន់អំណាចតែ​ប៉ុណ្ណោះ។ ខ្ញុំ​សូម​អរគុណដល់​ពួក​គេ​ហើយ​ខ្ញុំ​ដឹង​ថា ខ្ញុំ​ជំពាក់​គុណពួកគេនៅ​ក្នុងបណ្តា​ឆ្នាំ​ខាង​មុខ»។

ដោយ​សន្លឹកឆ្នោត​ចំនួន​៩៧​ភាគរយ​បាន​រាប់រួច​នោះ លោកMacronទទួលបាន​សំឡេង​គាំទ្រ​ចំនួន​៥៧,៤ភាគរយ។ នេះ​បើ​តាម​តួលេខ​របស់ក្រសួង​មហាផ្ទៃបារាំង​ដែល​ត្រូវ​បានផ្សាយដោយ​ទីភ្នាក់ងារ​ព័ត៌មាន Reuters។

ប្រធានាធិបតី​សហរដ្ឋអាមេរិក​លោក Joe Biden បាន​បង្ហោះ​សារអបអរសាទរ​ដល់​ជ័យជម្នះ​របស់​លោកMacron នៅ​លើ Twitter ដោយ​និយាយ​ថា លោក​ទន្ទឹង​រង់ចាំ​បន្ត​នូវ​កិច្ចសហប្រតិបត្តិការ​ដ៏​ជិតស្និទ្ធ​ជាមួយមេដឹកនាំ​បារាំង​រូប​នេះ។

មេដឹកនាំអឺរ៉ុប​ផ្សេងៗ​ទៀត​ក៏​បាន​ផ្ញើ​សារជូនពរ​និងអបអរសាទរជ័យជម្នះ​ដល់​លោក Macron ផង​ដែរ​ដែល​ក្នុង​នោះក៏​រួម​មាន​ប្រធានាធិបតី​អ៊ុយក្រែន​លោក Volodymyr Zelenskyy ដែល​បាន​បង្ហោះ​សារលើ Twitterជា​ភាសាបារាំង​ថា៖ «ខ្ញុំ​មាន​ជំនឿ​ជឿជាក់​ថា​ យើងនឹងឆ្ពោះ​ទៅ​មុខ​ជាមួយ​នឹង​ជ័យ​ជម្នះ​រួម​គ្នា។ ការ​ឆ្ពោះ​ទៅមុខសម្រាប់អឺរ៉ុប​មួយដែល​មាន​លក្ខណៈ​រឹងមាំ​និង​រួបរួម​គ្នា»។

ការ​បោះឆ្នោត​ប្រធានាធិបតី​បារាំង​នៅ​ថ្ងៃ​អាទិត្យ​ម្សិលមិញ​នេះអាច​ត្រូវបាន​សម្រេច​ដោយអ្នក​បោះឆ្នោត​ក្នុង​ទី​ប្រជុំជន​ជា​ច្រើន​ដូច​ជា​នៅ​ក្នុង​សង្កាត់ Pantin ជាដើម​ដែលមិន​បាន​បោះឆ្នោត​ឱ្យលោក Macron ឬ​ក៏​លោក​ស្រី Le Pen ឡើយ​កាលពី​ជុំ​ទី១។ អ្នក​បោះ​ឆ្នោតជិត៦នាក់​ក្នុង​ចំណោម​១០នាក់​បាន​គាំទ្រ​បេក្ខជន​មក​ពី​គណបក្សឆ្វេងនិយម​ជ្រុលលោក Jean-Luc Melenchon ហើយ​បេក្ខជន​រូប​នេះ​ក៏​មិន​បាន​គាំទ្រ​បេក្ខជន​ណាមួយ​ក្នុង​ចំណោម​បេក្ខជន​ទាំង​ពីរ​ផង​ដែរ​នៅ​ក្នុងការ​បោះឆ្នោតនៅ​ជុំ​ទី​២​នេះ។ ទោះ​បីយ៉ាង​ណា​ក៏ដោយ​លោក Jean-Luc ​បាន​ប្រាប់​អ្នក​គាំទ្រ​របស់​លោកកុំ​ឱ្យ​បោះ​ឆ្នោតគាំទ្រ​លោក​ស្រី Le Pen ។

អ្នក​បោះឆ្នោត​ជនជាតិ​បារាំង​ម្នាក់ដែល​មានវ័យ៣៨​ឆ្នាំ​ជាអ្នក​ប្រឹក្សា​យោបល់​ផ្នែក​ទី​ផ្សារនៃ​ក្រុមហ៊ុន Fatime និយាយ​ថា៖ «ខ្ញុំ​គិត​ថា​យើង​ត្រូវ​តែ​ជួយ​សង្គ្រោះ​ប្រទេស​បារាំង។ ដូច្នេះ​ហើយ​បានជា​ខ្ញុំ​សម្រេច​ចិត្តបោះ​ឆ្នោត​ឱ្យ​លោក Macron»។

ដូច​ជា​អ្នក​បោះ​ឆ្នោត​ជន​ជាតិ​បារាំង​ដទៃ​ទៀត​ដែរ ស្រ្តី​ជន​ជាតិ​បារាំង​រូប​នេះ​មិន​ពេញ​ចិត្ត​ចំពោះ​បេក្ខជនទាំង​ពីរ​រូប​នេះ។

លោក​ស្រីបាន​និយាយ​ថា៖ «ខ្ញុំ​មិនសប្បាយ​ចិត្ត​ជា​ពិសេស​ជាមួយ​លោកMacron ហើយ​ក៏​មិន​សប្បាយ​ចិត្តជា​មួយ​នឹង​លោកស្រី Le Pen ដែរ។ ប្រសិន​បើ​លោកស្រី Le Pen ជាប់ឆ្នោត​នោះ​ ខ្ញុំ​បារម្ភ​ថា វា​អាច​នឹង​មាន​សង្គ្រាម​ស៊ីវិល​ឬ​រឿង​អ្វី​មួយ​កើត​ឡើង»៕

XS
SM
MD
LG