ប្រធានាធិបតីបេឡារុស លោក Alexander Lukashenko បានធ្វើដំណើរទៅកន្លែងលំហែកាយ Sochi នៃសមុទ្រខ្មៅ នៅថ្ងៃចន្ទ ដើម្បីជួបពិភាក្សាជាមួយប្រធានាធិបតីរុស្ស៊ីលោក Vladimir Putin។
លោក Lukashenko ត្រូវគេរំពឹងថា នឹងស្វែងរកការគាំទ្រដ៏សំខាន់ពីមេដឹកនាំប្រទេសរុស្ស៊ី ដែលនេះជាជំនួបប្រជុំលើកទីមួយរបស់ប្រធានាធិបតីប្រទេសទាំងពីរ បន្ទាប់ពីលោក Lukashenko បានជាប់ឆ្នោតឡើងវិញ នៅក្នុងការបោះឆ្នោតដ៏មានជម្លោះមួយកាលពីខែសីហាកន្លងទៅ។
ទន្ទឹមនឹងនេះដែរ នៅក្នុងទីក្រុងហ្សឺណែវ ប្រទេសស្វ៊ីសឯណោះវិញប្រធានក្រុមប្រឹក្សាសិទ្ធិមនុស្សអង្គការសហប្រជាជាតិ បានលើកឡើងនៅថ្ងៃចន្ទថា ការចោទប្រកាន់នៃការធ្វើទារុណ្ឌកម្ម ក្នុងអំឡុងពេលនៃការធ្វើបាតុកម្មប្រឆាំងតវ៉ាទៅលើការជាប់ឆ្នោតជាថ្មីរបស់លោក Lukashenko ត្រូវតែមានការស៊ើបអង្កេត។
ថ្លែងក្នុងឱកាសនៃការបើកកិច្ចប្រជុំក្រុមប្រឹក្សាសិទ្ធិមនុស្សអ.ស.ប. លោកស្រី Michelle Bachelet លើកឡើងក្នុងសម្តីដើមថា ដោយសារទំហំនឹងចំនួននៃអ្នករងគ្រោះមានចំនួនច្រើននោះ រាល់ការចោទប្រកាន់ទាំងអស់នៃការធ្វើទារុណ្ឌកម្ម និងទម្រង់នៃការប្រព្រឹត្តមិនសមរម្យផ្សេងដោយកម្លាំងសន្តិសុខនោះ គួរត្រូវបានកត់ត្រា និងស៊ើបអង្កេត និងនាំជនដែលបានប្រព្រឹត្តទៅកាត់ទោស។
ក្រុមប្រឹក្សាសិទ្ធិមនុស្សអសបថា ខ្លួននឹងបើកកិច្ចប្រជុំជាបន្ទាន់មួយ ដើម្បីពិភាក្សាទៅលើកអំពើហិង្សាដែលបានកើតមានឡើង។
យ៉ាងហោចណាស់មានពលរដ្ឋបេឡារុសប្រមាណ១០០.០០០ បានចេញធ្វើបាតុកម្មប្រឆាំងតវ៉ានៅតាមដងផ្លូវ ក្នុងរដ្ឋធានី Minsk នៃប្រទេសបេឡារុស កាលពីថ្ងៃអាទិត្យ ដែលនេះជាបាតុកម្មដ៏ធំបំផុតមួយក្នុងចំណោមការប្រឆាំងតវ៉ាកន្លងមក ប្រឆាំងប្រធានាធិបតីលោក Lukashenko បន្ទាប់ពីលោកបានប្រកាសទទួលជ័យជម្នះក្នុងការបោះឆ្នោត ប៉ុន្តែគណបក្សប្រឆាំងថាជាការបោះឆ្នោតដែលមានការលួចបន្លំសន្លឹកឆ្នោត។
ប៉ូលិសក្នុងប្រទេសបេឡារុសថា គេបានចាប់ក្រុមអ្នកប្រឆាំងតវ៉ាប្រមាណជាង៤០០នាក់ក្នុងរដ្ឋធានី ហើយការចាប់នោះនៅបន្តធ្វើរហូតដល់ល្ងាចថ្ងៃអាទិត្យ។
ប្រទេសរុស្ស៊ីបានសម្តែងការគាំទ្រចំពោះប្រទេសបេឡារុស ដោយអាចពិនិត្យឡើងវិញនូវបំណុលដែលបេឡារុសជំពាក់ខ្លួន ព្រមទាំងបានស្នើបញ្ជូនប៉ូលិសបង្ក្រាបកុបកម្មទៅក្នុងបេឡារុសផងដែរ ប្រសិនបើមានការចាំបាច់នោះ៕
