ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

លោក​លឺ ឡាយស្រេង ​បាន​មក​ដល់​ភ្នំពេញ​ មុន​បុណ្យ​ចូលឆ្នាំ​ខ្មែរ


រូបឯកសារ៖ លោក​លឺ ឡាយស្រេង​ អតីត​មន្ត្រី​ជាន់ខ្ពស់​នៃ​គណបក្ស​ហ៊្វុនស៊ិនប៉ិច​ នៅក្នុង​ពិធីបង្សុកូល​រំឭក​ខួប​លើកទី២០​ នៃ​ព្រឹត្តិការណ៍​រដ្ឋ​ប្រហារ​ ៥-៦​ កក្កដា​ នៅស្នាក់ការ​គណបក្ស​សង្គ្រោះជាតិ​ រាជធានីភ្នំពេញ​ នៅថ្ងៃទី៦​ ខែកក្កដា​ ឆ្នាំ២០១៧។ (ហ៊ាន សុជាតា/VOA)

លោក​លឺ ឡាយស្រេង ​បាន​បញ្ជាក់​ប្រាប់​សារព័ត៌មាន​ដើម​អំពិល​ថា​លោក‍ «សប្បាយ​ចិត្ត‍»​ ដែល​បាន​វិល​មក​មាតុភូមិ​វិញ​ និង​បាន​ថ្វាយ​ព្រះពរ​ដល់​ព្រះមហាក្សត្រ​ នៅ​ឱកាស​ចូល​ឆ្នាំ​ថ្មី និង​ក៏ថ្លែង​អំណរគុណ​ដល់​លោក​នាយក​រដ្ឋ​មន្ត្រី​ ហ៊ុន សែន ​ផង​ដែរ។

លោក លឺ ឡាយស្រេង ​អតីត​ឧបនាយក​រដ្ឋមន្ត្រី​ដែល​មក​ពី​កូតា​គណបក្ស​ហ៊្វុនស៊ិនប៉ិច បានវិលត្រឡប់​ចូល​ប្រទេស​កម្ពុជាវិញ​ហើយ​ កាលពីថ្ងៃអាទិត្យ​ បន្ទាប់ពី​បាន​និរទេស​ខ្លួន​ទៅ​បរទេស​អស់​ជិត ២ ​ឆ្នាំ​ ដោយសារតែ​បាន​ប្រមាថ​ព្រះមហាក្សត្រ។​ នេះ​បើ​តាម​សេចក្តីរាយការណ៍​របស់​បណ្តាញ​សារព័ត៌មាន​ក្នុង​ប្រទេស​កម្ពុជា។

ការ​វិលត្រឡប់​ចូល​ប្រទេសវិញ គឺ​កើតឡើង​តែ​១សប្តាហ៍​ប៉ុណ្ណោះ ​បន្ទាប់ពី​លោក​នាយក​រដ្ឋមន្ត្រី​ ​ហ៊ុន សែន​ ​បានធានា​ថាមិន​មាន​ការ​ចាប់​ខ្លួន​ទេ​ ដោយ​សារ​តែ​លោក​ ​លឺ ឡាយ​ស្រេង​ បាន​បង្ហោះ​វីដេអូ​សុំ​អនុញ្ញាត​ចូល​ប្រទេស​វិញ ខណៈ​កំពុង​រស់នៅ​និរទេសខ្លួន​នៅ​ប្រទេស​ថៃ ដើម្បី​គេច​ចេញ​ពី​ការ​ដាក់​ទោស។

នៅក្នុង​សារមួយ​ពេល​មក​ដល់​អាកាស​យានដ្ឋាន​អន្តរជាតិ​ភ្នំពេញ​ លោក​លឺ ឡាយស្រេង ​បាន​បញ្ជាក់​ប្រាប់​សារព័ត៌មាន​ដើម​អំពិល​ថា​លោក‍ «សប្បាយ​ចិត្ត‍»​ ដែល​បាន​វិល​មក​មាតុភូមិ​វិញ​ និង​បាន​ថ្វាយ​ព្រះពរ​ដល់​ព្រះមហាក្សត្រ​ នៅ​ឱកាស​ចូល​ឆ្នាំ​ថ្មី និង​ក៏ថ្លែង​អំណរគុណ​ដល់​លោក​នាយក​រដ្ឋ​មន្ត្រី​ ហ៊ុន សែន ​ផង​ដែរ។​

លោក​បន្ថែម​ទៀត​ថា៖

«ខ្ញុំ​ស្មានតែ​មិន​បាន​មក​តើស៍ ​ប៉ុន្តែ​ដល់​សំណាង​មានភ័ព្វ​វាសនា​បាន​ចូល​មក​ធ្វើ​បុណ្យ​ចូលឆ្នាំ​ជាមួយ​នឹង​បងប្អូន​ទាំងអស់​គ្នា»។

កាល​ពី​ខែ​មករា ​ឆ្នាំ​២០១៨​ ចៅក្រម​តុលាការ​ភ្នំពេញ បាន​សម្រេច​ឲ្យ​លោក​ លឺ ឡាយស្រេង​ ចាញ់​ក្ដី​ ​និង​សង​ជំងឺ​ចិត្ត​ទៅ​លោក​ ​ហ៊ុន សែន​ ​ចំនួន​៥០០​លាន​រៀល​ ​ពី​បទ​ប្រមាថ​ព្រះ​មហាក្សត្រ និង​បរិហារកេរ្តិ៍​លោក​នាយករដ្ឋមន្ត្រីជា​សាធារណៈ​តាម​រយៈ​ការសន្ទនា​តាម​ទូរស័ព្ទ​ឯកជន ដែល​ត្រូវ​គេ​លួច​ថត​បាន​ និង​បង្ហោះ​លើ​បណ្ដាញ​អ៊ីនធឺណិត។

លោក​ ​លឺ ឡាយស្រេង​ ​បាន​លើក​ឡើង​ពី​គម្រោង​ដែល​គណ​បក្ស​ហ៊្វុនស៊ិនប៉ិច​ ​ត្រៀម​ទទួល​យក​អាសនៈ​របស់​គណបក្ស​សង្គ្រោះ​ជាតិ​ ​ដែល​ប្រឈម​នឹង​ការ​រំលាយ​នា​ពេល​នោះ​ ​និង​ថា​ ​លោក​នាយក​រដ្ឋមន្ត្រី​ ​ហ៊ុន សែន​ បានឲ្យ​លុយ​ទៅ​មន្ត្រី​គណបក្ស​ហ៊្វុនស៊ិនប៉ិច​ម្នាក់​ ២ម៉ឺន​ដុល្លារ ​សហរដ្ឋ​អាមេរិក។

លោក​ ​លឺ ឡាយស្រេង​ នា​ពេល​នោះ ​ក៏​បាន​ហៅ​ព្រះ​បាទ​ នរោត្តម​ សីហមុនី​ ​ថា​ជា «មាន់​គ្រៀវ»​ ​ដោយ​មិន​ហ៊ាន​ធ្វើ​អន្តរាគមន៍​ដោះស្រាយ​វិបត្តិ​នយោបាយ​ប្រទេស​ជាតិ។​ ប៉ុន្តែ​ពេលនេះ​ លោក​បាន​សន្យា​ថា​លែង​ហ៊ាន​និយាយ​ពី​បញ្ហា​នយោបាយ​ទៀត​ហើយ គឺ​ទៅតែវត្ត​ និង​ធ្វើ​បុណ្យ​ទាន​ប៉ុណ្ណោះ៕

សេចក្តីរាយការណ៍ពិសេស

  • VOA Khmer Special Report Section

    សេចក្តីរាយការណ៍ពិសេស

XS
SM
MD
LG