សមាជិកគណបក្សសាធារណរដ្ឋសំខាន់ៗនៅសហរដ្ឋអាមេរិក បានសម្តែងការគាំទ្រយ៉ាងខ្លាំងកាលពីថ្ងៃអាទិត្យ ចំពោះចំណាត់ការរបស់លោករដ្ឋអាជ្ញាពិសេស Robert Mueller ទៅលើការស៊ើបអង្កេតករណីរុស្ស៊ីជ្រៀតជ្រែកក្នុងការបោះឆ្នោតប្រធានាធិបតីអាមេរិកកាលពីឆ្នាំ២០១៦ ប៉ុន្តែពួកគេនៅតែមានការខ្វែងគំនិតគ្នាទៅលើថាតើសភាគួរតែអនុម័តទៅលើច្បាប់ដែលហាមឃាត់មិនឲ្យលោកប្រធានាធិបតីអាមេរិក ដូណាល់ ត្រាំ បណ្តេញលោក Mueller ចេញពីតំណែងឬយ៉ាងណា។
លោក Lindsey Graham សមាជិកព្រឹទ្ធសភាតំណាងរដ្ឋ South Carolina និងលោកស្រី Susan Collins សមាជិកព្រឹទ្ធសភាតំណាងរដ្ឋ Maine មានការខ្វែងគំនិតគ្នានឹងសមាជិកគណបក្សសាធារណរដ្ឋដទៃទៀតនៅក្នុងសភា ដែលបានបង្ហាញក្នុងសារព័ត៌មានផ្សេងគ្នាកាលពីថ្ងៃអាទិត្យថា ពួកគេគាំទ្រច្បាប់ ដែលភាគច្រើនគាំទ្រដោយតំណាងរាស្ត្រខាងគណបក្សប្រជាធិបតេយ្យ ដែលតម្រូវឲ្យមានការវាយតម្លៃឡើងវិញពីតុលាការ ប្រសិនបើលោក ត្រាំ ព្យាយាមបណ្តេញលោក Mueller ចេញពីតំណែងមែននោះ។
តំណាងរាស្ត្រខាងគណបក្សសាធារណរដ្ឋដ៏សំខាន់ពីររូបនៃរដ្ឋសភា គឺលោក Kevin McCarthy នៃរដ្ឋកាលីហ្វ័រញ៉ា និងលោក Trey Gowdy នៃរដ្ឋ South Carolina និយាយថា ពួកគេឯកភាពទៅលើការងាររបស់លោក Mueller នៅក្នុងការស៊ើបអង្កេតករណីឧក្រិដ្ឋកម្មដែលកំពុងបន្តនេះ។ ប៉ុន្តែលោក McCarthy ថ្លែងថា លោកមើលឃើញថា មិនចាំបាច់ត្រូវអនុម័តលើច្បាប់មួយដើម្បីការពារលោក Mueller ដែលជាអតីតប្រធានការិយាល័យស៊ើបអង្កេតសហព័ន្ធ FBI នោះទេ៕
