- ដោយ កាន់ វិច្ឆិកា
ភ្នំពេញ — ក្នុងរយៈពេល៣ថ្ងៃចុងក្រោយនេះ កម្ពុជាមិនមានករណីធ្វើតេស្តវិជ្ជមានឆ្លងថ្មីនៃវីរុសកូរ៉ូណាឬជំងឺកូវីដ១៩នោះទេ ប៉ុន្តែមន្រ្តីក្រសួងសុខាភិបាលប្រកាសឲ្យប្រជាពលរដ្ឋបន្តការប្រុងប្រយ័ត្នដដែលដើម្បីទប់ស្កាត់ការរាតត្បាតជាបន្ត។
ក្នុងសេចក្តីប្រកាសព័ត៌មានចេញនៅថ្ងៃច័ន្ទនេះ ក្រសួងសុខាភិបាលកម្ពុជាបញ្ជាក់ថា គិតត្រឹមម៉ោង៧:០០ព្រឹកថ្ងៃទី៦ ខែមេសានេះគឺមានរយៈពេលបីថ្ងៃហើយ ដែលមិនមានករណីវិជ្ជមានជំងឺកូវីដ១៩ថ្មី។ សេចក្តីប្រកាសព័ត៌មាននោះបន្តថា អ្នកដែលមានវីរុសកូវីដ១៩ដែលត្រូវបានរកឃើញ សរុបមានចំនួន១១៤នាក់ ក្នុងនោះអ្នកជាសះស្បើយមានចំនួន៥៣នាក់ និងអ្នកកំពុងសម្រាកព្យាបាល មានចំនួន៦១នាក់។
កាលពីថ្ងៃទី៥ ខែមេសា ដែលជាថ្ងៃទីពីរនៃការរកមិនឃើញករណីវិជ្ជមាននៃវីរុសនេះ លោកស្រីវេជ្ជបណ្ឌិត ឱ វណ្ណឌីនបានប្រាប់ក្រុមអ្នកសារព័ត៌មានតាមបណ្តាញសង្គមតេឡេក្រាម ថា ក្រសួងនៅមិនទាន់អាចវាយតម្លៃបាននៅឡើយថា តើស្ថានភាពល្អប្រសើរឬយ៉ាងណា។ លោកស្រីបន្តថា តាមបច្ចេកទេស លទ្ធផលនេះគ្រាន់តែជាការបង្ហាញនូវប្រសិទ្ធភាពអន្តរាគមន៍ជាបណ្តើរៗតែប៉ុណ្ណោះ ប៉ុន្តែ «ស្ថានភាពនៅផុយស្រួយ» ដែលចាំបាច់ត្រូវមានការចូលរួមពីបុគ្គលម្នាក់ៗដើម្បីឈានទៅរកភាពជោគជ័យពិតប្រាកដ។
លោកស្រីបញ្ជាក់តាមន័យដើមថា៖ «បើយើងភ្លេចខ្លួន សត្រូវនេះនឹងវាយលុកមកយើងវិញក្នុងរយៈពេលដ៏ខ្លីបំផុត។ ពេលខ្លះមានការស្ងប់ស្ងាត់បន្តិច តែក៏អាចមានការរាតត្បាតជាបន្តទៀតដែរ ដែលគេហៅថា second wave[ការរាតត្បាតវគ្គទី២]។ ដូច្នេះ ត្រូវបោះជំហានសកម្មទប់ស្កាត់ជាបន្តទៀត ទើបអាចសង្កត់សត្រូវវីរុសកូវីដ១៩នេះបាន»។
VOA មិនអាចសុំការអត្ថាធិប្បាយពីលោកស្រី ឱ វណ្ណឌីន និងលោក លី សូវ៉ាន់ អ្នកនាំពាក្យក្រសួងសុខាភិបាលបានទេនៅថ្ងៃច័ន្ទនេះ។
រហូតមកដល់ត្រឹមថ្ងៃទី៣១ ខែមីនា កម្ពុជាបានធ្វើតេស្តមនុស្សចំនួន៥៧៦៨នាក់ ទាំងជនជាតិកម្ពុជា និងជនបរទេស ក្នុងនោះមានជនបរទេសដែលធ្វើដំណើរកម្សាន្តតាមនាវាអន្តរជាតិWesterdam ដែលសុំចតនៅកម្ពុជា។ នេះបើតាមអ្នកនាំពាក្យក្រសួងសុខាភិបាល លោក លី សូវ៉ាន់ប្រាប់VOAកាលពីសប្តាហ៍មុន។
ភ្នំពេញ — ក្បែររបងវត្តប្រយូរវង្ស ដែលជាវត្តមួយនៅកណ្តាលរាជធានីភ្នំពេញ ក្នុងខណ្ឌចម្ការមន ប្រជាពលរដ្ឋរាប់រយគ្រួសារ មកតាំងទីលំនៅខាងក្នុងបរិវេណវត្តអស់រយៈពេលជាច្រើនឆ្នាំមកហើយ។ ពួកគេជួលផ្ទះ ឬក៏កាន់កាប់ផ្ទះនៅទីនេះជាបណ្តុំៗនៅជិតៗគ្នា។
នៅចម្ងាយប្រមាណ១០ម៉ែត្រពីខ្លោងទ្វារវត្តអ្នកស្រី បូ ផល្លី កំពុងអង្គុយលក់ស្វាយនៅខាងមុខផ្ទះដែលស្ថិតនៅក្នុងវត្តនោះ កាលពីរសៀលមួយ។ ប៉ុន្តែស្ត្រី អាយុ៥២ឆ្នាំ នេះមិនបានពាក់ម៉ាស់ការពារខ្លួនទេ ខណៈកម្ពុជាកំពុងរាតត្បាតដោយវីរុសកូរ៉ូណា ដែលពិភពលោកកំពុងមានការព្រួយបារម្ភយ៉ាងខ្លាំង។
អ្នកស្រី បូ ផល្លី បានដើរទៅយកម៉ាស់ស្តើងមួយ ដែលអ្នកស្រីហាលនៅខាងមុខផ្ទះ បន្ទាប់ពីបានប្រើហើយ និងបោកហាល ដើម្បីប្រើម្តងទៀត។ ជាមួយម៉ាស់មួយនេះ អ្នកស្រីបានយកក្រដាសអនាម័យដាក់ខាងក្នុង ដើម្បីជាការការការពារបន្ថែម។ អ្នកស្រីមានប្រសាសន៍ថា ម៉ាស់និងទឹកលាងបានឡើងថ្លៃ តាំងពីវីរុសកូរ៉ូណាបានវាយលុកពិភពលោក ហើយកម្ពុជាចាប់ផ្តើមព្រួយបារម្ភកាន់តែខ្លាំង។
អ្នកស្រីបានថ្លែងថា៖ «ថ្លៃណាស់ ថ្លៃលើសលុបមែនទែន។ បើនិយាយពីថ្លៃនោះ គ្មានលទ្ធភាពនឹងការទិញទេ។ នេះអីសុទ្ធតែគេឲ្យទេ»។
ខណៈមានការព្រួយបារម្ភអំពីការរាតត្បាតវីរុសកូរ៉ូណានៅកម្ពុជា ប្រជាពលរដ្ឋត្រូវបានណែនាំឲ្យកាន់ខ្ជាប់អនាម័យ និងមានសម្ភារៈប្រើប្រាស់ ដូចជាម៉ាស់ និងអាល់កុលសម្អាតដៃ ដើម្បីចៀសផុតពីការឆ្លង។ ប៉ុន្តែតំបន់ក្រីក្រ ដែលមានការរស់នៅជិតៗគ្នា ដូចកន្លែងដែលអ្នកស្រី ផល្លី រស់នៅនេះ ប្រឈមនឹងហានិភ័យខ្ពស់។ បន្ថែមពីនេះទៀត ពួកគេមិនមានលទ្ធភាពទិញម៉ាស់ និងអាល់កុលលាងដៃ ទេ ខណៈការចេញទៅក្រៅប្រកបមុខរបរ ជារឿងសំខាន់ដែល មិនអាចខានបានសម្រាប់ពួកគេនោះ។
តម្រូវការម៉ាស់ និងទឹកអាកុលសម្រាប់សម្អាតដៃ បានកើនឡើង បន្ទាប់ពីវីរុសកូរ៉ូណាឬកូវីដ១៩ បានរាតត្បាតពេញសាកលលោក ដែលជាហេតុធ្វើឲ្យតម្លៃសម្ភារៈទាំងនោះ កើនឡើងខ្លាំងផងដែរ។ នៅកម្ពុជា តម្លៃម៉ាស់បានឡើង ដែលពីមុនធ្លាប់មានតម្លៃតែ ៥០០រៀល កើនទៅដល់ ២ពាន់រៀលក្នុងម៉ាស់ មួយឬតម្លៃ ១ម៉ឺនរៀលក្នុងមួយប្រអប់ មកដល់ជិត ៧ម៉ឺនរៀលក្នុងមួយប្រអប់។
ប្រជាពលរដ្ឋដែលមានជីវភាពក្រីក្រ ប្រឈមនឹងការឆ្លងវីរុសថ្មីមួយនេះ ដោយសារពួកគេមិនមានលទ្ធភាពក្នុងការទិញសម្ភារៈ ដើម្បីការពារខ្លួនពីការរាតត្បាតវីរុសកូរ៉ូណា ខណៈការយល់ដឹងនៅមានកម្រិតនៅឡើយ។
- ដោយ ស៊ុន ណារិន
កម្ពុជារកឃើញជនបរទេស៤នាក់ឆ្លងវីរុសកូរ៉ូណា ករណីសរុបកើនដល់១១៤
ក្រសួងសុខាភិបាលបានប្រកាសថារកឃើញករណីឆ្លងវីរុសកូរ៉ូណា៤នាក់ទៀត ដែលជាជនបរទេស នាំឲ្យករណីឆ្លងទូទាំងប្រទេសកើនឡើងដល់ទៅ១១៤។ នេះបើយោងតាមសេចក្តីប្រកាសព័ត៌មានរបស់ក្រសួងសុខាភិបាលដែលចេញផ្សាយនៅព្រឹកថ្ងៃសុក្រនេះ។
ក្រសួងបញ្ជាក់ថា ជនបរទេសទាំងនោះ មានបារាំង៣នាក់ និងជនជាតិម៉ាឡេស៊ីម្នាក់។ ក្នុងចំណោមជនជាតិបារាំង៣នាក់នោះ មាន២នាក់ ប្រុសម្នាក់ ស្រ្តីម្នាក់អាយុ៦៧ឆ្នាំដូចគ្នា ស្ថិតនៅក្រុមទេសចរបារាំងគ្នាសរុប៣៦នាក់ ដែលមកលេងខេត្តព្រះសីហនុ។
កាលពីខែមីនាជនជាតិបារាំងជាង៣០នាក់ក្នុងក្រុមទេសចរនោះ ត្រូវបានរកឃើញថាមានផ្ទុកវីរុសកូរ៉ូណា។ ពួកគេស្នាក់នៅសណ្ឋាគារឯករាជ្យក្នុងខេត្តព្រះសីហនុ។
ចំណែកជនជាតិបារាំងម្នាក់ទៀតជាស្រ្តី អាយុ៥៩ឆ្នាំ ដែលជាអ្នកទេសចរក្នុងក្រុមផ្សេងទៀត មកលេងក្នុងខេត្តព្រះសីហនុដែរ។
ចំណែកជនជាតិម៉ាឡេស៊ីអាយុ៤០ឆ្នាំ ជាអ្នកដំណើរស្នាក់នៅបណ្តោះអាសន្ននៅ ឃុំពាមជីកង ស្រុកកងមាស ខេត្តកំពង់ចាម។ បុរសនេះជាក្រុមមកធ្វើការងារសាសនា មានគ្នា៨នាក់ ដែលចំនួន៧នាក់លើកមុន ត្រូវបានរកឃើញថាផ្ទុកវីរុសកូរ៉ូណា។ នេះបើតាមការបញ្ជាក់របស់ក្រសួងសុខាភិបាល។
បើតាមសេចក្តីប្រកាសព័ត៌មានដដែលទារកម្នាក់អាយុ៤ខែ បានជាសះស្បើយ និងត្រូវបានឲ្យចេញពីមន្ទីរពេទ្យកុមារជាតិ។ ទារកនោះជាកូនបង្កើតរបស់ជនជាតិបារាំងដែលទើបបានព្យាបាលជាសះស្បើយ។ គិតត្រឹមថ្ងៃសុក្រនេះ សរុបអ្នកជាសះស្បើយ មានទៅដល់៣៥នាក់៕
- ដោយ សុខ ខេមរា
ការប៉ះទង្គិចដោយសារវីរុសកូរ៉ូណាផ្លាស់ប្តូរទម្លាប់សហគមន៍ខ្មែរអាមេរិកាំងនៅសហរដ្ឋអាមេរិក
វ៉ាស៊ីនតោន — កំណើននៃការឆ្លងរីករាលដាលយ៉ាងខ្លាំងនៃវីរុសកូរ៉ណា ឬកូវីដ១៩ ក្នុងពិភពលោក ជាពិសេសនៅសហរដ្ឋអាមេរិក បានធ្វើឲ្យសហគមន៍ខ្មែររងផលប៉ះពាល់ដល់របៀបរបបនៃការរស់នៅ ការធ្វើកិច្ចការ ការប្រាស្រ័យទាក់ទងគ្នា កិច្ចការសាសនា ការជួបប្រជុំនិងមុខរបររបស់អ្នកធ្វើការ និងអ្នកជំនួញជាដើម។
លោក ធីម៉ូធី ឈឹម ជាម្ចាស់ក្រុមហ៊ុនហិរញ្ញវត្ថុ និងធានារ៉ាប់រងផ្ទាល់ខ្លួន ហៅថា T. Chhim Agency ក្នុងសង្កាត់ ណាញូអិត (Nanuet) ភាគខាងជើងនៃទីក្រុងញូវយ៉ក (New York) បានថ្លែងថាវីរុសកូរ៉ូណា បានធ្វើឲ្យធ្លាក់ចុះអតិថិជន និងប្រាក់ចំណូលលោក ដោយសារស្ថានការណ៍តម្រូវឲ្យលោកបិទទ្វារក្រុមហ៊ុនជាង២សប្តាហ៍ ហើយធ្វើការតាមផ្ទះ តាមការណែនាំរបស់រដ្ឋាភិបាល ដើម្បីទប់ស្កាត់វីរុសកូរ៉ណា ដែលកំពុងឆ្លងរាលដាលនៅសហរដ្ឋអាមេរិក ជាពិសេសការរាតត្បាតខ្លាំងជាងគេក្នុងទីក្រុងនេះ។
«ធ្វើការពីផ្ទះប្រាក់ចំណូលប៉ះពាល់ ពីព្រោះយើងអត់បានធ្វើពេញលេញ ហើយជាពិសេសការងារបើកត្រូវមានមនុស្សទៅមកទៅមក ដើម្បីងាយធ្វើការងារអីចឹង ដល់អីចឹងទៅយើងបាត់ចំណូលមួយផ្នែកធំត្រង់ថា មនុស្សថ្មីយើងមានការពិបាក ទាល់តែយើងរកមធ្យោបាយស្អីផ្សេងទៀត ទាក់ទងមនុស្សតាមផ្ទះ។ ឥឡូវហ្នឹងមនុស្សទៅមក ទៅមកស្ងាត់ជ្រងំអីចឹង ហើយចំពោះខ្ញុំវិញ ប៉ះពាល់ប្រហែលជាពាក់កណ្តាលការងារ»។
លោកថា ការងាររៀបចំកញ្ចប់ហិរញ្ញវត្ថុជូនដល់ភ្ញៀវដែលចង់ចូលនិវត្តន៍ ចង់ទិញការធានារ៉ាប់រង អាយុជីវិត សុខភាព ធានារ៉ាប់រងផ្ទះ រថយន្តជាដើមនោះ គឺលោករកប្រាក់ចំណូលដោយសារមានភ្ញៀវ ដែលឧទាហរណ៍គឺថា មានភ្ញៀវចាស់ ១០នាក់ ត្រូវថែទាំភ្ញៀវចាស់កុំឲ្យបាត់បង់ និងរកភ្ញៀវថ្មីបន្ថែម តែបើគ្មានភ្ញៀវថ្មីចូលមក នេះជាបញ្ហា។
«ហើយបើអ្នកទិញផ្ទះក៏អត់ទិញ ឧបមាថា ឥឡូវអ្នកទិញផ្ទះក៏អត់ទិញ អីចឹងធានារ៉ាប់រងក៏គ្នាអត់ទិញដែរ មិនអីចឹង ហើយអ្នកទិញផ្ទះហ្នឹង ជួនកាលត្រូវការទិញធានារ៉ាប់រងផង ត្រូវការធានារ៉ាប់រងអាយុជីវិតផង (life insurance) ធានារ៉ាប់រងសម្រាប់ប្រាក់កម្ចីទិញផ្ទះផង (Mortgage insurance) អីចឹងវាបាត់មួយខ្សែរផ្ទះហ្នឹង ក៏អស់មួយចំនួនទៅ ហើយអ្នកខ្លះក៏រើចេញទៅរដ្ឋផ្សេងទៅ ចេញពីញូវយ៉កអីចឹងទៅ អីចឹងវាទាក់ទងគ្នារសេមរសាម ហើយយើងមិនដឹងជាជួយម៉េចបាន បើជួនកាលហៅទៅធនាគារ ក៏គេពិបាកនឹងទាក់ទងជាមួយយើងដែរ»។