ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ក្រសួង​សុខាភិបាល៖ ​​ពលរដ្ឋ​ត្រូវ​បន្ត​ប្រុង​ប្រយ័ត្ន​នឹង​វីរុស​កូរ៉ូណា​ ទោះ​មិន​ទាន់​រក​ឃើញ​ករណី​ឆ្លង​ថ្មី


មន្ត្រីសុខាភិបាលមួយក្រុមស្ថិតក្នុងសម្លៀកបំពាក់តាមក្បួនខ្នាត ខណៈពួកគេកំពុងបំពេញកិច្ចការគ្រប់គ្រង និងទប់ទល់ការឆ្លងរាលដាលនៃវីរុសកូរ៉ូណានៅកម្ពុជា។ (រូបថតដោយ៖ នាយកដ្ឋានប្រយុទ្ធនឹងជំងឺឆ្លង CDC)

ក្នុង​រយៈ​ពេល​៣​ថ្ងៃ​ចុង​ក្រោយ​នេះ ​ កម្ពុជា​មិន​មាន​ករណី​ធ្វើ​តេស្តវិជ្ជមាន​ឆ្លង​ថ្មី​នៃ​វីរុស​កូរ៉ូណា​ឬ​ជំងឺ​កូវីដ​១៩​នោះ​ទេ​ ប៉ុន្តែ​មន្រ្តី​ក្រសួង​សុខា​ភិបាល​ប្រកាស​ឲ្យ​ប្រជា​ពលរដ្ឋ​បន្តការ​ប្រុង​ប្រយ័ត្ន​ដដែល​ដើម្បី​ទប់​ស្កាត់​ការ​រាត​ត្បាត​ជា​បន្ត។​

ក្នុងសេចក្តី​ប្រកាស​ព័ត៌មាន​ចេញ​នៅ​ថ្ងៃ​ច័ន្ទ​នេះ​ ក្រសួង​សុខាភិបាល​កម្ពុជា​បញ្ជាក់​ថា ​ គិត​ត្រឹម​ម៉ោង​៧:០០​ព្រឹក​ថ្ងៃ​ទី​៦ ខែមេសា​នេះ​គឺ​មាន​រយៈ​ពេល​បី​ថ្ងៃ​ហើយ​ ដែល​មិន​មាន​ករណី​វិជ្ជមាន​ជំងឺ​កូវីដ​១៩​ថ្មី។​ សេចក្តី​ប្រកាស​ព័ត៌មាន​នោះ​បន្ត​ថា​ អ្នក​ដែល​មាន​វីរុស​កូវីដ​១៩​ដែល​ត្រូវ​បាន​រក​ឃើញ​ សរុប​មាន​ចំនួន​១១៤​នាក់​ ក្នុង​នោះ​អ្នក​ជា​សះ​ស្បើយ​មាន​ចំនួន​៥៣​នាក់​ និង​អ្នក​កំពុង​សម្រាក​ព្យាបាល​ មាន​ចំនួន​៦១​នាក់។​

កាល​ពី​ថ្ងៃ​ទី​៥​ ខែ​មេសា ​ដែល​ជា​ថ្ងៃ​ទី​ពីរ​នៃ​ការ​រក​មិន​ឃើញ​ករណី​វិជ្ជមាន​នៃ​វីរុស​នេះ លោកស្រី​វេជ្ជ​បណ្ឌិត ​ឱ វណ្ណឌីន​បាន​ប្រាប់​ក្រុម​អ្នកសារ​ព័ត៌មាន​តាម​បណ្តាញ​សង្គម​តេឡេក្រាម ​ថា ​ ក្រសួង​នៅ​មិន​ទាន់​អាច​វាយ​តម្លៃ​បាន​នៅ​ឡើយ​ថា​ តើ​ស្ថានភាព​ល្អ​ប្រសើរ​ឬ​យ៉ាងណា។ ​លោកស្រី​បន្ត​ថា ​តាម​បច្ចេកទេស​ លទ្ធផល​នេះ​គ្រាន់​តែ​ជា​ការ​បង្ហាញ​នូវ​ប្រសិទ្ធ​ភាព​អន្តរាគមន៍​ជា​បណ្តើរៗ​តែ​ប៉ុណ្ណោះ ​ ប៉ុន្តែ ​«ស្ថាន​ភាព​នៅ​ផុយ​ស្រួយ» ​ដែល​ចាំ​បាច់​ត្រូវ​មាន​ការ​ចូលរួម​ពី​បុគ្គល​ម្នាក់ៗ​ដើម្បី​ឈាន​ទៅ​រក​ភាព​ជោគជ័យ​ពិត​ប្រាកដ។

លោកស្រីបញ្ជាក់​តាម​ន័យ​ដើម​ថា៖ «បើ​យើង​ភ្លេច​ខ្លួន ​សត្រូវ​នេះ​នឹង​វាយ​លុក​មក​យើង​វិញ​ក្នុង​រយៈ​ពេល​ដ៏​ខ្លី​បំផុត។ ​ ពេល​ខ្លះ​មាន​ការ​ស្ងប់​ស្ងាត់​បន្តិច ​ តែ​ក៏​អាច​មាន​ការរាត​ត្បាត​ជា​បន្ត​ទៀត​ដែរ ​ដែល​គេ​ហៅ​ថា​ second wave​[ការរាតត្បាតវគ្គទី២]។​ ដូច្នេះ ​ត្រូវ​បោះ​ជំហាន​សកម្ម​ទប់ស្កាត់​ជា​បន្ត​ទៀត ទើប​អាច​សង្កត់​សត្រូវ​វីរុស​កូវីដ​១៩​នេះ​បាន»។

VOA មិន​អាច​សុំ​ការ​អត្ថា​ធិប្បាយ​ពី​លោក​ស្រី​ ឱ វណ្ណឌីន និង​លោក លី សូវ៉ាន់​ អ្នក​នាំ​ពាក្យ​ក្រសួង​សុខាភិបាល​បាន​ទេ​នៅ​ថ្ងៃ​ច័ន្ទ​នេះ។​

រហូត​មក​ដល់​ត្រឹម​ថ្ងៃ​ទី​៣១ ខែមីនា កម្ពុជា​បាន​ធ្វើ​តេស្ត​មនុស្ស​ចំនួន​៥៧៦៨​នាក់ ទាំង​ជន​ជាតិ​កម្ពុជា និង​ជន​បរទេស ក្នុង​នោះ​មាន​ជន​បរទេស​ដែល​ធ្វើ​ដំណើរ​កម្សាន្ត​តាម​នាវា​អន្តរ​ជាតិ​Westerdam ​ដែល​សុំ​ចត​នៅ​កម្ពុជា។ ​នេះ​បើ​តាម​អ្នក​នាំពាក្យ​ក្រសួង​សុខាភិបាល​ លោក លី សូវ៉ាន់​ប្រាប់​VOAកាល​ពី​សប្តាហ៍​មុន។​

លោក ​ភុន បណ្ឌិត ​ពលរដ្ឋ​រស់​នៅ​រាជធានី​ភ្នំពេញ​ដែល​បាន​ទៅ​ធ្វើ​តេស្ត​រក​វីរុស​កូរ៉ូណា ​ប្រាប់ VOA​ នៅ​ថ្ងៃ​ច័ន្ទ​នេះ​ថា​ លោក​បាន​សម្រេច​ចិត្ត​ទៅ​ធ្វើ​តេស្ត​នៅ​មន្ទីរពេទ្យមិត្តភាព​ខ្មែរ-សូវៀត​កាល​ពី​ថ្ងៃ​សៅរ៍ ​បន្ទាប់​ពី​លោកបាន​ធ្វើ​ដំណើរ​ទៅ​កាន់​ខេត្ត​ជាច្រើន​ និង​មាន​ទំនាក់​ទំនង​ការងារ​ជាមួយ​ជន​បរទេស ​តាំង​ពី​ដើម​ខែ​មីនា​មក។ ​លោក​បន្ត​ថា ​លោក​បាន​ត្រឡប់​មក​ពី​ខេត្ត​វិញ ​នៅ​ថ្ងៃ​ទី​១៨ ​ខែ​មីនា ​និង​សម្រេច​នៅ​ដាច់​ពី​ក្រុម​គ្រួសារ​ចំនួន​១៤​ថ្ងៃ​រួច​មក​ហើយ។​ ប៉ុន្តែ​លោក​ថា​ ក្រោយ​រយៈ​ពេល​១៤​ថ្ងៃ​នេះ​ លោក​មាន​បញ្ហា​ស្ងួត​បំពង់​ក ​ទើប​លោក​សម្រេច​ទៅ​ធ្វើ​តេស្ត​ដើម្បី​ឲ្យ​ប្រាកដ​ក្នុង​ចិត្ត ​មុន​នឹង​ត្រឡប់​ទៅ​ជួប​ក្រុម​គ្រួសារ​វិញ។​

បុរស​វ័យ​៣៨​ឆ្នាំ ​ដែល​មាន​កូន​២​នាក់​រូប​នេះ​បន្ត​ថា ការ​ទៅ​ធ្វើ​តេស្ត​កាល​ពី​រសៀល​ថ្ងៃ​សៅរ៍​នោះ​ លោក​សង្កេត​ឃើញ​អ្នក​ស្នើ​សុំ​ធ្វើ​តេស្ត​ប្រមាណ​ជា​២០​ទៅ​៣០​នាក់​ ដោយ​ខ្លះ​ត្រូវ​បាន​គ្រូពេទ្យ​អនុញ្ញាត​ឲ្យ​ធ្វើ​តេស្ត​និង​ខ្លះ​គ្រូពេទ្យ​មិន​ធ្វើ​តេស្ត​ឲ្យ ​ក្រោយ​ការ​សួរ​នាំ​ពី​រោគ​សញ្ញា ​និង​ប្រវត្តិ​នៃ​ការ​ធ្វើ​ដំណើរ​។​ លោក​បន្ថែម​ថា ​ ក្រោយ​ទៅ​ធ្វើ​តេស្ត គ្រូពេទ្យ​បាន​ប្រាប់​លោក​ឲ្យ​រង់​ចាំ​លទ្ធផល​យ៉ាង​តិច​៣​ថ្ងៃ ​ដោយ​ណែនាំ​ឲ្យ​លោក​នៅ​ដាច់​ដោយ​ឡែក ​ឬ​នៅ​ឆ្ងាយ​ពី​សមាជិក​គ្រួសារ ​រហូត​ទទួល​បាន​លទ្ធផល។​

លោក​បន្ត​ថា​ រហូត​មក​ដល់​ពេល​នេះ ​លោក​នៅ​រង់​ចាំ​លទ្ធផល​នៅ​ឡើយ​ រហូត​ដល់​ថ្ងៃ​ពុធ​ទី​៨​ខែ​មេសា ​ទើប​លោក​ត្រឡប់​ទៅ​ជួប​គ្រួសារ​វិញ។

«ដោយ​សារ​មនុស្ស​តេស្ត​ច្រើន ​ ហើយ​អ្នកខ្លះ​គ្រាន់តែ​សង្ស័យ​តិច​តួច​ អ្នក​ខ្លះ​គ្រាន់តែ​ក្តៅ​ខ្លួន​តិច​តួច​ អ្នក​ខ្លះ​ភ័យ​ច្រើន​ អ៊ីចឹង​បាន​មាន​អ្នក​តេស្ត​ច្រើន។​ អ៊ីចឹង​ដើម្បី​កុំ​ឲ្យ​ខាត​ការងារ​ពេទ្យ អ្នក​ណា​ដែល​វិជ្ជមាន​បាន​គេ​ខល​ទៅ។​ អ៊ីចឹង​ក្នុង​រយៈ​ពេល​ពី​ពីរ​ទៅ​បី​ថ្ងៃ​ហ្នឹង ​អង្គុយ​ចាំ​ទូរស័ព្ទ​គេ​ខល​ទៅ។​ បើ​គេ​ខល​ទៅ ​ហើយ​យើង​ទទួល​បាន​សេវា​ VIP ​គេ​ទៅ​ដឹក​ដល់​ផ្ទះ​ហើយ»​ បើ​ថា​យើង​អត់​បាន​ទទួល​ទូរស័ព្ទ​ទេ​ សប្បាយ​ចិត្ត​ទៅ!»

បើ​តាម​ទិន្នន័យ​ខេត្ត​ព្រះ​សីហនុ​ មាន​ចំនួន​អ្នក​ឆ្លង​ច្រើន​ជាង​គេ​នៅ​កម្ពុជា ​គឺ​មាន​រហូត​ដល់​៤០​នាក់ ​ដែល​ភាគ​ច្រើន​ជា​ជន​បរទេស។​

លោកស្រី ​លឹម​ សាមាន​ ប្រធាន​មន្ទីរ​សុខាភិបាល​ខេត្ត​ព្រះ​សីហនុ​ ប្រាប់​VOA​នៅ​ថ្ងៃ​ច័ន្ទ​នេះ​ថា ​ជាទូទៅ​អ្នក​ដែល​មកស្នើ​សុំ​ធ្វើ​តេស្ត​រក​វីរុស​កូរ៉ូណា​នេះ​ នឹង​ត្រូវ​ធ្វើ​តេស្ត​ឲ្យ ​ ប្រសិន​បើ​ពួកគេ​មាន​រោគ​សញ្ញា ​ឬ​មានប្រវត្តិ​ប៉ះពាល់​អ្នក​ជំងឺ ​ ហើយ​ពួកគេ​ត្រូវប្រាប់​ឲ្យស្នាក់​នៅ​ដាច់​ដោយ​ឡែក រហូត​ទទួល​បាន​លទ្ធផល។​ លោកស្រី​បន្ត​ថា ​ ករណី​ខ្លះ ​មន្រ្តី​សុខាភិបាល​ទៅ​យក​សំណាក​ពី​អ្នក​ពាក់​ព័ន្ធ​ដល់​ផ្ទះប្រសិន​បើ​ពួកគេ​ធ្លាប់​បាន​ប៉ះពាល់​អ្នក​ជំងឺ​ដោយ​ផ្ទាល់។​

«បើ​គាត់​មាន​ពាក់ព័ន្ធ​ជាមួយ​អ្នក​ជំងឺ ​ហើយ​ធ្វើ​តេស្ត​ទៅ​គាត់​អវិជ្ជមាន ​ឲ្យ​គាត់​នៅ​ដាច់​ដោយ​ឡែក​១៤​ថ្ងៃ ​ហើយ​ឲ្យ​គាត់​តាម​ដាន​សុខភាព។ ក្នុង​ករណី​គាត់​មាន​រោគ​សញ្ញា​ណា​មួយ​ គឺ​គាត់​ប្រាប់​មក​ ​ក្រុម​ការងារ​នឹង​ចុះ​ទៅ​យក​សំណាក​គាត់​មួយ​សា​ទៀត»។​

ប្រធាន​មន្ទីរ​សុខាភិបាល​ខេត្ត​ព្រះ​សីហនុ​រូប​នោះ​មាន​ប្រសាសន៍​ថា​ អ្នក​ដែល​កំពុង​សម្រាក​ព្យាបាល​ជំងឺ​កូវីដ​១៩​នៅ​ខេត្ត​ព្រះ​សីហនុ​មាន​ភាព​ប្រសើរ​ឡើង​ពី​មួយ​ថ្ងៃ​ទៅ​មួយ​ថ្ងៃ។​

ការ​ធ្វើ​តេស្ត​រក​វីរុស​កូរ៉ូណា​ក្នុង​តំបន់​អាស៊ី​អាគេ្នយ៍​ ក្នុង​នោះ​មាន​ប្រទេស​កម្ពុជា​ផង​ដែរ​ ត្រូវ​បាន​អ្នក​ជំនាញ​សុខាភិបាល​ក្នុង​តំបន់​សង្ស័យ​ថា​ការ​ធ្វើ​តេស្ត​មាន​កម្រិត​ទាប​នេះ​ ប្រហែល​ជា​មិន​អាច​បង្ហាញ​អំពី​អត្រា​ពិត​ប្រាកដ​នៃ​អ្នកឆ្លង​ជំងឺ​កូវីដ​១៩​បាន​ទេ។ ​ ក្រុម​អ្នក​ជំនាញ​បារម្ភ​ថា ​បើ​សិន​ជា​ការ​បង្ហាញ​ចំនួន​មិន​ពិត​ប្រាកដ​នៃ​អ្នក​ឆ្លង​ជំងឺ​កូវីដ​១៩​ បង្ក​ឲ្យ​មាន​ភាពមិន​សូវ​ខ្វាយខ្វល់​នោះ​ នោះ​វា​អាច​ធ្វើ​ឲ្យ​វីរុស​នេះ​កាន់តែ​រីក​រាលដាល។​

ក្រោយ​ការ​រាល​ដាល​នៃ​វីរុស​កូរ៉ូណា​នៅ​កម្ពុជា​ជា​បន្ត​បន្ទាប់ ​ រដ្ឋាភិបាល​បាន​ប្រកាស​បិទ​ការ​ជួប​ជុំ​ទ្រង់​ទ្រាយ​ធំ ដូច​ជា​ការ​ប្រគំ​តន្រ្តី ​កន្លែង​ច្រៀង​កម្សាន្ត​ ខារ៉ាអូខេ​ ក្លឹប​កម្សាន្ត ​បៀរ​ហ្គាឌិន​ និង​កាស៊ីណូ​ជាដើម។ ​ រដ្ឋាភិបាល​ក៏​បាន​ប្រកាស​បិទ​មិន​ឲ្យ​មាន​ការ​នាំ​អង្ករ​ស​ និង​ស្រូវ​ចេញ​ទៅ​ក្រៅ​ប្រទេស​ ដើម្បី​រក្សា​ទុក​ស្បៀង​ក្នុង​ប្រទេស​ក្នុង​ករណី​ជំងឺ​កូវីដ​១៩​នេះ​រាល​ដាល​កាន់​តែ​ខ្លាំង៕​

តួលេខនៃករណីឆ្លងជំងឺកូវីដ១៩

XS
SM
MD
LG