- ដោយ ម៉ែន គឹមសេង
ស្ថានទូតជួយសិស្ស-និស្សិតដែលចង់ចាកចេញពេលជំងឺកូវីដ១៩ឆ្លងនៅសហរដ្ឋអាមេរិក
វ៉ាស៊ីនតោន — ស្ថានទូតកម្ពុជាអំពាវនាវដល់និស្សិតខ្មែរដែលកំពុងតែសិក្សានៅសហរដ្ឋអាមេរិក ឱ្យមកទាក់ទងដើម្បីជួយសម្រួល បើសិនជាពួកគេជួបការលំបាកក្នុងការរៀបចំដំណើរវិលត្រឡប់ទៅប្រទេសកម្ពុជាវិញ ក្នុងគ្រាដែលមានការឆ្លងរាលដាលយ៉ាងលឿននៃជំងឺកូវីដ១៩នៅសហរដ្ឋអាមេរិក។
សេចក្តីជូនដំណឹងរបស់ស្ថានទូតកម្ពុជាប្រចាំនៅរដ្ឋធានីវ៉ាស៊ីនតោន កាលពីថ្ងៃអាទិត្យ បានបញ្ជាក់ថា ចំណាត់ការនេះគឺដើម្បីគិតគូរដល់សុវត្ថិភាពជាចម្បងរបស់និស្សិតទាំងនោះ ដោយសារតែ«កន្លងមក ទាំងសាលា ក៏ដូចជា Sponsorមួយចំនួនបានសម្រេចបញ្ចប់វគ្គ/កម្មវិធីសិក្សា និងតម្រូវឱ្យសិស្ស-និស្សិតបរទេសត្រឡប់ទៅប្រទេសខ្លួនវិញឱ្យបានឆាប់បំផុត ដើម្បីបង្ការការឆ្លងជំងឺកូវីដ១៩ ដល់សិស្ស-និស្សិតទាំងនោះ ក៏ដូចជាដើម្បីជៀសវាងករណីការឃុំខ្លួននៅមួយកន្លែង ការរឹតត្បិតសេរីភាពដើរហើរ ឬការបិទជើងយន្តហោះជាដើម»។
លោក ជុំ សុន្ទរី ឯកអគ្គរាជទូតកម្ពុជាប្រចាំនៅសហរដ្ឋអាមេរិក បានបញ្ជាក់ប្រាប់វីអូអេនៅថ្ងៃច័ន្ទថា សេចក្តីជូនដំណឹងនេះមិនមែនជាការអំពាវនាវឱ្យនិស្សិតខ្មែរវិលត្រឡប់ទៅវិញទេ គឺស្ថានទូតគ្រាន់តែជួយសម្រួលដល់និស្សិតណា ដែលជួបប្រទះការលំបាក ពេលព្យាយាមវិលត្រឡប់ទៅវិញប៉ុណ្ណោះ ដោយសារតែមានក្រុមហ៊ុនយន្តហោះខ្លះបានផ្អាកការហោះហើរ។ ទន្ទឹមនឹងនោះ ក៏មានប្រទេសមួយចំនួនបានបិទមិនឱ្យយន្តហោះចូលផងដែរ។ ដូច្នេះ ស្ថានទូតនឹងខិតខំស្វែងរកជើងយន្តហោះណា ដែលអាចនឹងជួយដឹកនិស្សិតទាំងនោះត្រឡប់ទៅប្រទេសវិញបាន។
ស្ថានឯកអគ្គរាជទូតក៏បានអំពាវនាវដល់សិស្សនិស្សិតកម្ពុជា ដែលមានបំណងបន្តការស្នាក់នៅ ឬមិនអាចធ្វើដំណើរបាន ដោយសារតែហេតុផលផ្សេងៗឱ្យមានការប្រុងប្រយ័ត្ន ការពារខ្លួន និងជៀសវាងការជួបជុំគ្នា និងការចេញទៅក្រៅ ហើយឱ្យគោរពតាមបទបញ្ជា និងគោលការណ៍ណែនាំតាមរដ្ឋនីមួយៗដែលពួកគេស្នាក់នៅ។ ប៉ុន្តែ ស្ថានទូតមិនបានបញ្ជាក់ថា តើមាននិស្សិតប៉ុន្មាននាក់ នៅបន្តស្នាក់នៅទេ។
- ដោយ ទុំ ម្លិះ
មន្រ្តីសុខាភិបាល៖ ពលរដ្ឋខ្មែរ៣៥នាក់វិលត្រឡប់ពីថៃត្រូវបានធ្វើតេស្តរកវីរុសកូរ៉ូណា
ភ្នំពេញ —
ពលរដ្ឋខ្មែរដែលបានត្រឡប់ចូលកម្ពុជាតាមច្រកព្រំដែនប៉ោយប៉ែតនៃខេត្តបន្ទាយមានជ័យចំនួន៣៥នាក់ ក្នុងចំណោមអ្នកវិលត្រឡប់ជាង ១ម៉ឺន៥ពាន់នាក់ ត្រូវបានមន្រ្តីសុខាភិបាលធ្វើតេស្តរកវីរុសកូវីដ១៩ ខណៈពួកគេសម្រុកមកកម្ពុជាវិញ នៅពេលថៃបានចាប់ផ្តើមបិទច្រកព្រំដែន។ នេះបើយោងតាមលោក កែវ សុភ័ក្ត្រា ប្រធានមន្ទីរសុខាភិបាលខេត្តបន្ទាយមានជ័យនៅថ្ងៃអង្គារនេះ។
លោក កែវ សុភ័ក្ត្រា បានថ្លែងប្រាប់ VOA តាមទូរស័ព្ទថា មនុស្សចំនួន៣៥នាក់ ក្នុងចំណោមមនុស្សរាប់រយនាក់ដែលបានចូលមកកម្ពុជាវិញ កាលពីថ្ងៃច័ន្ទ ត្រូវបានយកសំណាកទៅធ្វើតេស្តរកវីរុសមួយនេះ។ លោកបន្តថា លទ្ធផលនៃការធ្វើតេស្តអាចនឹងប្រកាសនៅយប់ថ្ងៃអង្គារនេះ។
លោកមានប្រសាសន៍ថា៖ «អ្នកដែលមានកម្តៅក្នុងចំណោមដែលមកនេះ យើងឃើញមាន៣៥នាក់ហើយ ដែលយើងយកសំណាកផ្ញើទៅភ្នំពេញតាំងពីយប់មិញម៉្លេះ។ យប់នេះបែបដឹងហើយលទ្ធផល»។
មន្រ្តីសុខាភិបាលរូបនោះឲ្យដឹងថាពួកគេមានកម្តៅខ្ពស់ និងស្អកកជាដើម ហើយបច្ចុប្បន្នពួកគេកំពុងស្ថិតក្នុងមន្ទីរពេទ្យខេត្តបន្ទាយមានជ័យ និងមន្ទីរពេទ្យក្រុងប៉ោយប៉ែតនិងរង់ចាំលទ្ធផលនៃការធ្វើតេស្ត។
ប្រជាពលរដ្ឋខ្មែររាប់ពាន់នាក់បានវិលត្រឡប់ចូលមកកម្ពុជាវិញពីប្រទេសថៃ តាមរយៈច្រកព្រំដែនប៉ោយប៉ែត កាលពីចុងសប្តាហ៍ បន្ទាប់ពីប្រទេសថៃបានប្រកាសបិទច្រកព្រំដែនចាប់ពីថ្ងៃច័ន្ទ ដើម្បីបង្ការការរាតត្បាតវីរុសកូវីដ១៩។ ការណ៍នេះធ្វើឲ្យមានការព្រួយបារម្ភអំពីលទ្ធភាពឆ្លងក្នុងប្រទេសកម្ពុជាកាន់តែច្រើន នៅពេលដែលពលរដ្ឋខ្មែរសម្រុកមកបែបនេះ។
ព័ត៌មានចុងក្រោយ៖ ការទប់ទល់នឹងការឆ្លងវីរុសកូរ៉ូណានៅកម្ពុជា
នៅថ្ងៃអង្គារនេះ កម្ពុជាមិនទាន់មានករណីឆ្លងថ្មីនៃវីរុសកូរ៉ូណានៅឡើយទេ ដែលករណីឆ្លងសរុបក្នុងពេលនេះមានចំនួន ៨៧នាក់។ យ៉ាងណាមិញ រដ្ឋាភិបាលកម្ពុជាបានឲ្យដឹងថា ពលករចំណាកស្រុកពីប្រទេសថៃ ចំនួន ៣៥នាក់ ត្រូវបានធ្វើតេស្តរកវីរុសកូរ៉ូណា ហើយលទ្ធផលនៃការធ្វើតេស្តនេះនឹងរួចរាល់នៅយប់ថ្ងៃអង្គារនេះ។
កាលពីចុងសប្តាហ៍កន្លងទៅនេះ ពលករចំណាកស្រុកកម្ពុជារាប់ពាន់នាក់ ដែលធ្វើការនៅប្រទេសថៃ បានធ្វើដំណើរវិលត្រឡប់មកស្រុកកំណើតរបស់ខ្លួនវិញ បន្ទាប់ពីរដ្ឋាភិបាលថៃបានប្រកាសបិទព្រំដែនរបស់ខ្លួន។ ការសម្រុកចូលប្រទេសកម្ពុជាក្នុងពេលតែមួយនេះ បានបង្កជាផលលំបាកដល់អាជ្ញាធរមានសមត្ថកិច្ចរបស់កម្ពុជា ក្នុងការធ្វើតេស្តលើពលករទាំងអស់នោះ។
យ៉ាងណាមិញ នៅថ្ងៃអង្គារនេះ លោក ស ខេង រដ្ឋមន្ត្រីក្រសួងមហាផ្ទៃ បានអះអាងថា ក្នុងករណីដែលពលករចំណាកស្រុកណាម្នាក់ត្រូវបានរកឃើញថាមានផ្ទុកវីរុសកូរ៉ូណា អាជ្ញាធរនឹងរឹតបន្តឹងការធ្វើដំណើរចេញចូលក្នុងសហគមន៍នោះ ដើម្បីគ្រប់គ្រងការឆ្លងរាលដាលក្នុងសហគមន៍។
ដោយឡែក លោកនាយករដ្ឋមន្ត្រី ហ៊ុន សែន កាលពីម្សិលមិញនេះ បានអំពាវនាវឲ្យអាជ្ញាធរតាមមូលដ្ឋាន ប្រែក្លាយសាលារៀន ទៅជាមន្ទីរពេទ្យ ដើម្បីត្រៀមជាវិធានការថែទាំ និងព្យាបាលអ្នកជំងឺនៃវីរុសកូរ៉ូណា។
កាលពីម្សិលមិញ ស្ថានទូតកម្ពុជាប្រចាំសហរដ្ឋអាមេរិក បានប្រកាសអំពាវនាវឲ្យសិស្សនិស្សិតកម្ពុជា ដែលកំពុងសិក្សានៅសហរដ្ឋអាមេរិក ធ្វើដំណើរវិលត្រឡប់មកកម្ពុជាវិញ ខណៈសហរដ្ឋអាមេរិក កំពុងប្រឈមនឹងការឆ្លងវីរុសកូរ៉ូណាកាន់តែខ្លាំងឡើង។
- ដោយ វីអូអេ ខ្មែរ
គ្រូពេទ្យចិន៧នាក់ផ្តល់ការបណ្តុះបណ្តាលវិជ្ជាជីវៈដល់កម្ពុជាអំពីការព្យាបាលជំងឺកូវីដ១៩
វ៉ាស៊ីនតោន — នៅថ្ងៃច័ន្ទនេះ ក្រុមគ្រូពេទ្យជំនាញចិនចំនួន ៧នាក់ បានធ្វើដំណើរមកដល់កម្ពុជា ដោយនាំមកជាមួយនូវសម្ភារៈបរិក្ខាពេទ្យ ដើម្បីផ្តល់ការបណ្តុះបណ្តាលខាងផ្នែកវេជ្ជសាស្ត្រអំពីការព្យាបាលវីរុសកូរ៉ូណា ឬកូវីដ១៩ ដល់កម្ពុជា។ នេះបើយោងតាមសម្តីរបស់លោកនាយករដ្ឋមន្ត្រី ហ៊ុន សែន ដែលបានសរសេរលើទំព័រហ្វេសប៊ុកផ្លូវការរបស់លោក។
នៅកម្ពុជា ករណីឆ្លងវីរុសកូរ៉ូណា ដែលដំបូងផ្ទុះឡើងនៅទីក្រុងវូហាន ប្រទេសចិន បានកើនឡើងខ្លាំងនៅក្នុងខែមីនានេះ ដែលករណីភាគច្រើនគឺកើតមានលើអ្នកដែលបានធ្វើដំណើរទៅក្រៅប្រទេស និងទេសចរបរទេសដែលបានមកដល់កម្ពុជា។ គិតត្រឹមថ្ងៃច័ន្ទនេះ ករណីឆ្លងសរុបមានចំនួន ៨៦នាក់ ក្នុងនោះមានពលរដ្ឋកម្ពុជា ចំនួន៣៥នាក់។
ក្រសួងសុខាភិបាលកម្ពុជាបន្តអះអាងថា នៅកម្ពុជាមិនទាន់មានករណីឆ្លងក្នុងសហគមន៍នៅឡើយទេ។ ស្របពេលជាមួយគ្នានោះ ក្រសួងសុខាភិបាលក៏បានអំពាវនាវឲ្យពលរដ្ឋកម្ពុជាទាំងអស់ រួបរួមគ្នាធ្វើយ៉ាងណាទប់ស្កាត់កុំឲ្យមានការឆ្លងពីបុគ្គលដែលមានវីរុស ទៅកាន់បុគ្គលផ្សេងទៀត ដោយធ្វើតាមការណែនាំរបស់គ្រូពេទ្យអ្នកជំនាញ តាមរយៈការរក្សាអនាម័យ ជាពិសេសការលាងដៃឲ្យបានញឹកញាប់ជាមួយនឹងសាប៊ូ និងជៀសវាងការប្រមូលផ្តុំមនុស្សច្រើនជាដើម។
ក្រៅពីប្រទេសកម្ពុជា រដ្ឋាភិបាលចិនក៏បានបញ្ជូនក្រុមគ្រូពេទ្យជំនាញរបស់ខ្លួនទៅកាន់ប្រទេសមួយចំនួន ដូចជាអ៊ីតាលីជាដើម ដើម្បីជួយដល់កិច្ចខិតខំប្រឹងប្រែងក្នុងការព្យាបាលការឆ្លងរាលដាលនៃវីរុសកូរ៉ូណា ដែលមិនទាន់មានវ៉ាកសាំង ឬថ្នាំព្យាបាលផ្លូវការណាមួយនៅឡើយទេ។ ដោយឡែក ករណីឆ្លងថ្មីនៅប្រទេសចិនបានថយចុះគួរឲ្យកត់សម្គាល់៕