- ដោយ ទុំ ម្លិះ
ថៃបិទច្រកព្រំដែន នាំឲ្យព្រួយបារម្ភលទ្ធភាពឆ្លងវីរុសកូរ៉ូណានៅកម្ពុជាបន្ថែមទៀត
ភ្នំពេញ — រដ្ឋាភិបាលថៃ នៅថ្ងៃចន្ទនេះ បានចាប់ផ្តើមបិទច្រកព្រំដែនកម្ពុជាថៃសំខាន់ៗ ដែលនាំឲ្យពលករ និងពលរដ្ឋខ្មែររាប់ពាន់នាក់ ធ្វើដំណើរត្រឡប់ចូលមកប្រទេសកម្ពុជាវិញ ដែលការណ៍នេះនាំឲ្យមានការព្រួយបារម្ភអំពីលទ្ធភាពខ្ពស់នៃការរីករាលដាលនៃវីរុសកូរ៉ូណា។
បើតាមកាសែតបាងកកប៉ុស្តិ៍របស់ប្រទេសថៃ ច្រកព្រំដែនសរុបចំនួន១៩ ក្នុងនោះមានច្រកធំៗចំនួន២ ដូចជាច្រកអន្តរជាតិប៉ោយប៉ែត និងច្រកល្បៀងចំនួន១៧ទៀត ត្រូវបិទចាប់ពីថ្ងៃទី២៣ មីនា ដល់ថ្ងៃទី៥ ខែមេសា ដើម្បីទប់ស្កាត់នឹងវីរុសកូរ៉ូណា។ កាសែតបាងកកប៉ុស្តិ៍លើកឡើងថា អ្នកធ្វើដំណើរ និងរថយន្តមិនត្រូវបានអនុញ្ញាតឲ្យធ្វើដំណើរចូល និងចេញគ្រប់ច្រកទាំងនេះទេ លើកលែងតែរថយន្ត និងរទេះដឹកអីវ៉ាន់ និងអ្នកបើករថយន្ត ដឹកទំនិញប៉ុណ្ណោះ។
នៅថ្ងៃចន្ទនេះ អាជ្ញាធររបស់ប្រទេសថៃបានរាយការណ៍ថាខ្លួនបានរកឃើញ១២២ករណីទៀតនៃវីរុសកូរ៉ូណា ដែលធ្វើឲ្យចំនួនសរុបកើនឡើងដល់៧២១រហូតមកដល់ពេលនេះ។
មុនថ្ងៃចន្ទនេះ ពលរដ្ឋខ្មែរបានត្រឡប់ចូលមកក្នុងប្រទេសវិញជាបន្តបន្ទាប់។
លោក ម៉េង ហ៊ុយ អាយុ៤៣ឆ្នាំ ជាអាជីវករម្នាក់នៅក្នុងផ្សាររ៉ុងក្លឿនៅព្រំដែនថៃនិងកម្ពុជា មានប្រសាសន៍ថា លោក និងភរិយា បានចាកចេញពីផ្សារនេះ កាលពីថ្ងៃពីថ្ងៃអាទិត្យ ក្រោយទទួលបានសេចក្តីជូនដំណឹងពីការបិទច្រកព្រំដែន។ លោកមានប្រសាសន៍ថា លោកជឿជាក់ថាលោក និងភរិយា មិនមានផ្ទុកវីរុសកូរ៉ូណានោះទេ ប៉ុន្តែលោកបារម្ភចំពោះប្រជាពលរដ្ឋដែលមកពីទីក្រុងបាងកកនៃប្រទេសនេះ។
លោកបានថ្លែងប្រាប់VOAតាមទូរសព្ទថា៖ «ខ្ញុំព្រួយបារម្ភខ្លាចតែអ្នកដែលមកពីបាងកក ឬក៏គាត់មកពីខាងណាផ្សេងទៀត មកពីប្រទេសចិនឬថៃអ៊ីចឹងទៅខ្លាចគាត់ចូលមក។ យើងព្រួយបារម្ភតែប៉ុណ្ណឹងទេ។ ប៉ុន្តែដូចគ្រួសារខ្ញុំ មិនព្រួយបារម្ភទេ ព្រោះចេញពេលព្រឹក ល្ងាចចេញមកវិញ ហើយមានការវាស់កម្តៅមានអីត្រឹមត្រូវពីអាជ្ញាធរមូលដ្ឋានអ៊ីចឹងណា៎ ទាំងខាងថៃ និងខាងខ្មែរ»។
- ដោយ កាន់ វិច្ឆិកា
ជនជាតិបារាំងជាង៣០នាក់ផ្ទុកវីរុសកូរ៉ូណា ដើរកម្សាន្តខេត្តមួយចំនួនមុនទៅក្រុងព្រះសីហនុ
ក្រោយអ្នកទេសចរជាជនបរទេសចំនួន៣១នាក់ដែលធ្វើដំណើរកម្សាន្តនៅភ្នំពេញនិងខេត្តចំនួន៣ផ្សេងទៀតត្រូវបានរកឃើញថា មានផ្ទុកមេរោគកូរ៉ូណាឬកូវីដ-១៩ សមត្ថកិច្ចបាននិងកំពុងបន្តស្វែងរកអ្នកដែលទាក់ទងជាមួយជនបរទេសទាំងនោះ។
កាលពីយប់ថ្ងៃអាទិត្យ ក្រសួងសុខាភិបាលកម្ពុជាប្រកាសថាមនុស្ស៣១នាក់ដែលមានជនជាតិបារាំង២៩នាក់និងបុរសខ្មែរ២នាក់នៅខេត្តព្រះសីហនុត្រូវបានរកឃើញថាផ្ទុកវីរុសកូរ៉ូណា។ ជនជាតិបារាំងទាំង២៩នាក់ ដែលបានធ្វើតេស្តនិងរកឃើញថាមានមេរោគកូរ៉ូណានោះ ជាអ្នកទេសចរជាក្រុមដែលមានគ្នាសរុបចំនួន៣៦នាក់។ ពួកគេត្រូវបាននាំយកទៅធ្វើតេស្ត ក្រោយជនជាតិបារាំងពីរនាក់ទៀតស្ថិតក្នុងក្រុមរបស់ពួកគេធ្វើតេស្តមានមេរោគកូរ៉ូណាកាលពីថ្ងៃសៅរ៍។ ចំណែកបុរសជនជាតិខ្មែរពីរនាក់នោះជាមគ្គុទេសក៍ទេសចរណ៍។
បើតាមក្រសួងសុខាភិបាល អ្នកដែលផ្ទុកមេរោគកូវីដ-១៩ទាំង៣៣នាក់ ត្រូវបានដាក់ឲ្យស្ថិតក្នុងសណ្ឋាគារមួយក្នុងខេត្តព្រះសីហនុ ដែលពួកគេបានស្នាក់នៅពេលមកលេងក្នុងខេត្តជាប់មាត់សមុទ្រនេះ។
មគ្គុទេសក៍ទេសចរណ៍មួយរូបលោក ហៃ ដែលកំពុងផ្ទុកមេរោគកូវីដ-១៩ប្រាប់ VOA នៅរសៀលថ្ងៃច័ន្ទនេះថា លោកនិងមគ្គុទេសក៍ម្នាក់ទៀតព្រមទាំងក្រុមអ្នកទេសចរទាំងជាង៣០នាក់ កំពុងស្ថិតក្នុងបន្ទប់ដាច់ដោយឡែកគ្នា ក្នុងសណ្ឋាគារតារាឯករាជ្យដែលជាសណ្ឋាគារអ្នកទេសចរទាំងនោះស្នាក់នៅចុងក្រោយ។ លោកបន្តថា ក្រុមអ្នកទេសចរជនជាតិបារាំងទាំងនោះ គ្រោងហោះពីប្រទេសបារាំង ប៉ុន្តែត្រូវប្តូរជើងយន្តហោះដោយសារបារាំងបិទ ហើយពួកគេបានហោះមកពីប្រទេសអាល្លឺម៉ង់ជំនួសវិញ ដោយប្តូរជើងយន្តហោះនៅប្រទេសសិង្ហបុរី។ ពួកគេបានស្នាក់នៅប្រទេសឡាវពីរយប់ មុននឹងបន្តដំណើរមកខេត្តសៀមរាប។
ករណីឆ្លងវីរុសកូរ៉ូណានៅកម្ពុជាកើនឡើងដល់ ៨៧នាក់
នៅចុងសប្តាហ៍កន្លងទៅនេះ ករណីឆ្លងថ្មីនៃវីរុសកូរ៉ូណា ឬកូវីដ១៩ ត្រូវបានរកឃើញលើអ្នកទេសចរជនជាតិបារាំងមួយក្រុម និងជនជាតិខ្មែរពីររូបនៅខេត្តព្រះសីហនុ ដែលបណ្តាលឲ្យកម្ពុជាប្រឈមនឹងករណីឆ្លងវីរុសនេះកាន់តែកើនឡើង។ គិតត្រឹមយប់ថ្ងៃច័ន្ទ ករណីឆ្លងសរុបនៅកម្ពុជាមានចំនួន ៨៧នាក់ ក្នុងនោះមានពលរដ្ឋកម្ពុជា ៣៥នាក់។ ភាគច្រើននៃករណីឆ្លងនេះ កើតឡើងនៅខេត្តព្រះសីហនុ កំពង់ចាម និងភ្នំពេញ។ នេះបើយោងតាមសេចក្តីប្រកាសព័ត៌មានរបស់ក្រសួងសុខាភិបាលកម្ពុជា។
រដ្ឋាភិបាលកម្ពុជាបានបន្តសកម្មភាពប្រយុទ្ធប្រឆាំង និងទប់ទល់ការឆ្លងវីរុសកូរ៉ូណានេះ ដែលត្រូវបានផ្ទុះឡើងដំបូងនៅទីក្រុងវូហាន ប្រទេសចិន។ ដោយសារកង្វះមន្ទីរពេទ្យព្យាបាល ជាពិសេសនៅតាមតំបន់ជនបទ នៅថ្ងៃច័ន្ទនេះ លោកនាយករដ្ឋមន្ត្រី ហ៊ុន សែន ក៏បានអំពាវនាវឲ្យអាជ្ញាធរមូលដ្ឋានខេត្ត និងស្រុក ប្រែក្លាយសាលារៀនទៅជាមណ្ឌលថែទាំ និងព្យាបាលអ្នកជំងឺ ក្នុងករណីចាំបាច់។ ការអំពាវនាវនេះបានធ្វើឡើង ស្របពេលដែលពលករចំណាកស្រុកកម្ពុជារាប់ពាន់នាក់ បានធ្វើដំណើរចាកចេញពីប្រទេសថៃ ត្រឡប់មកសហគមន៍របស់ខ្លួនវិញ បន្ទាប់ពីរដ្ឋាភិបាលថៃប្រកាសបិទព្រំដែនរបស់ខ្លួន។
បន្ថែមលើនេះ ក្រសួងសុខាភិបាលកម្ពុជាក៏បានអំពាវនាវឲ្យមានការចូលរួមពីពលរដ្ឋកម្ពុជា ធ្វើយ៉ាងណាទប់ស្កាត់កុំឲ្យមានការឆ្លងវីរុសកូរ៉ូណាពីអ្នកដែលមានវីរុសនេះ ទៅកាន់បុគ្គលផ្សេងទៀតក្នុងសហគមន៍ ដោយប្រកាន់ខ្ជាប់នូវអនាម័យដៃ ជៀសវាងកន្លែងមានមនុស្សប្រមូលផ្តុំច្រើន បើនៅទីសាធារណៈ គួរនៅឆ្ងាយពីអ្នកដទៃយ៉ាងតិចណាស់ ១ម៉ែត្រ ហើយបើសង្ស័យថាឆ្លងវីរុសនេះ ត្រូវទាក់ទងទៅគ្រូពេទ្យជំនាញ៕
- ដោយ វីអូអេ ខ្មែរ
ករណីឆ្លងវីរុសកូរ៉ូណានៅកម្ពុជាកើនដល់ ៥១នាក់ គិតត្រឹមថ្ងៃសុក្រ
គិតត្រឹមយប់ថ្ងៃសុក្រនេះ ក្រសួងសុខាភិបាលបានប្រកាសរកឃើញករណីឆ្លងថ្មីចំនួន ៤ថែមទៀត ដែលសរុបករណីឆ្លងវីរុសកូរ៉ូណានៅកម្ពុជាបានកើនដល់ ៥១នាក់ ក្នុងនោះមានពលរដ្ឋកម្ពុជាចំនួន ៣១នាក់។ នេះបើយោងតាមសេចក្តីប្រកាសព័ត៌មានចុងក្រោយរបស់ក្រសួងសុខាភិបាលកម្ពុជា។ ករណីឆ្លងថ្មី ៤នោះ ត្រូវបានរកឃើញលើជនជាតិម៉ាឡេស៊ី ១នាក់ នៅខេត្តកំពង់ចាម ជនជាតិខ្មែរ ១នាក់ នៅរាជធានីភ្នំពេញ និងជនជាតិខ្មែរ ២នាក់ នៅខេត្តបាត់ដំបង។
ក្នុងចំណោមពលរដ្ឋកម្ពុជាសរុប ៣១នាក់ ដែលឆ្លងវីរុសនេះ រួមមានពលរដ្ឋកម្ពុជា ២៥នាក់ដែលបានធ្វើដំណើរទៅប្រទេសម៉ាឡេស៊ី និងស្ត្រី ២នាក់ ដែលជាភរិយារបស់បុរសដែលបានធ្វើដំណើរទៅម៉ាឡេស៊ី និងបុរសម្នាក់ ដែលមិនមានប្រវត្តិចេញទៅក្រៅប្រទេស ក៏ប៉ុន្តែបានចាប់ដៃផ្ទាលជាមួយនឹងបុគ្គលដែលបានវិលត្រឡប់មកសហគមន៍វិញ បន្ទាប់ពីបានធ្វើដំណើរទៅម៉ាឡេស៊ី។