ប្រធានាធិបតីអ៊ុយក្រែនលោក Volodymyr Zelenskyy បាននិយាយកាលពីថ្ងៃសៅរ៍ជាមួយនឹងប្រធានអង្គការអូតង់ (NATO) លោក Jens Stoltenberg អំពីវិធីក្នុងការស្ដារការឆ្លងកាត់ដោយសុវត្ថិភាពរបស់កប៉ាល់ដឹកគ្រាប់ធញ្ញជាតិរបស់អ៊ុយក្រែនកាត់តាមសមុទ្រខ្មៅ។
នៅក្នុងសុន្ទរកថាជាវីដេអូកាលពីយប់ថ្ងៃសៅរ៍ លោក Zelenskyy បាននិយាយថាលោកបានស្នើលោក Stoltenberg ឱ្យកោះប្រជុំក្រុមប្រឹក្សាអូតង់-អ៊ុយក្រែន ដែលត្រូវបានបង្កើតឡើងនៅក្នុងកិច្ចប្រជុំរបស់អង្គការអូតង់នៅក្នុងខែនេះ ដើម្បីពិភាក្សាអំពីបញ្ហាសន្តិសុខនៅសមុទ្រខ្មៅ ជាពិសេសអំពីប្រតិបត្តិការនៃច្រករបៀងសម្រាប់ការនាំចេញគ្រាប់ធញ្ញជាតិរបស់អ៊ុយក្រែន។
អ្នកនាំពាក្យអង្គការអូតង់អ្នកស្រី Oana Lungescu បាននិយាយថា ក្រុមប្រឹក្សានេះនឹងពិភាក្សាអំពីស្ថានភាពនេះ បន្ទាប់ពីរុស្ស៊ីបានដកខ្លួនចេញពីគម្រោងផ្ដួចផ្ដើមគ្រាប់ធញ្ញជាតិសមុទ្រខ្មៅ (Black Sea Grain Initiative)។
អ្នកស្រី Lungescu បានបន្ថែមថា លោក Zelenskyy និងលោក Stoltenberg បានពិភាក្សាអំពីការចាកចេញរបស់រុស្ស៊ីពីកិច្ចព្រមព្រៀងនេះនិងអំពី «ការប៉ុនប៉ងជាបន្ត» របស់រុស្ស៊ី «នៅក្នុងការយកស្បៀងអាហារធ្វើជាអាវុធ ដែលប៉ះពាល់ដល់ជនងាយរងគ្រោះរាប់លាននាក់នៅជុំវិញពិភពលោក»។
នៅក្នុងការវិវត្តលើសមរភូមិ ក្រសួងការពារជាតិចក្រភពអង់គ្លេសបានបញ្ជាក់នៅក្នុងរបាយការណ៍ស៊ើបការណ៍សម្ងាត់ប្រចាំថ្ងៃរបស់ខ្លួនស្ដីពីអ៊ុយក្រែននៅថ្ងៃអាទិត្យនេះថា រុស្ស៊ីទំនងជារុលទៅមុខតិចតួចនៅក្នុងតំបន់ Luhansk និងតំបន់ Kharkiv នៅភាគខាងជើងប្រទេសអ៊ុយក្រែន «ប៉ុន្តែ ស្ថានភាពត្រូវបានធ្វើឱ្យច្រចូកច្របល់ដោយសារព័ត៌មានប្រឌិតរបស់រុស្ស៊ី»។
ក្រសួងនេះបានលើកឡើងថា សកម្មភាពនេះបង្ហាញអំពីសារៈសំខាន់នៃតំបន់ភាគខាងជើងរបស់អ៊ុយក្រែនសម្រាប់រុស្ស៊ី នៅពេលដែលរុស្ស៊ីកំពុង «ប្រឈមនឹងសម្ពាធខ្លាំងក្លាគួរសមនៅតំបន់ Zaporizhzhia នៅភាគខាងត្បូង [អ៊ុយក្រែន]»។
ក្រសួងនេះបានបន្ថែមថា កងទ័ពរុស្ស៊ី «ទំនងជា» ត្រឡប់ទៅតំបន់ទន្លេ Oskil ឡើងវិញដើម្បីបង្កើតតំបន់ទ្រនាប់នៅជុំវិញតំបន់ Luhansk ដោយសារតែការកាន់កាប់របស់ខ្លួននូវតំបន់នេះគឺ«ស្ទើរតែប្រាកដ»ថាជាគោលបំណងដ៏សំខាន់មួយរបស់រុស្ស៊ីនៅក្នុងសង្គ្រាមនេះ៕
