ពួកទាហានស៊ីឈ្នួលដែលជាអ្នកទោសបម្រើក្នុងក្រុម Wagner ចុងក្រោយមានកំណត់ពេលត្រូវរួចពីកាតព្វកិច្ចរបស់ខ្លួន«ក្នុងប៉ុន្មានថ្ងៃខាងមុខនេះ»។ នេះបើតាមក្រសួងការពារជាតិចក្រភពអង់គ្លេសនៅថ្ងៃសុក្រនេះ។
ក្រសួងការពារជាតិអង់គ្លេសបានប្រាប់ឱ្យដឹងនៅក្នុងរបាយការណ៍ស៊ើបការណ៍សម្ងាត់ប្រចាំថ្ងៃមួយអំពីការឈ្លានពានរបស់រុស្ស៊ីលើប្រទេសអ៊ុយក្រែនថាចំនួនពិរុទ្ធជនដ៏ច្រើនដែលបានលើកលែងទោសនឹង«ទំនង»បន្តធ្វើការជាទាហានអាជីពជាប់កិច្ចសន្យារបស់ក្រុម Wagner។ រុស្ស៊ីឥឡូវនេះត្រួតត្រាបណ្តាញជ្រើសរើសអ្នកទោសរបស់ក្រុម Wagner។
ក្រុម Wagnerបានរីកលូតលាស់ក្លាយជាអង្គការមួយដែលបានរៀបចំការបះបោរប្រឆាំងអាជ្ញាធររបស់ប្រធានាធិបតីរុស្ស៊ី លោកVladimir Putin កាលពីខែមុន។ ការបញ្ចប់កម្មវិធីជ្រើសរើសអ្នកទោសរបស់ក្រុម Wagnerកត់សម្គាល់នូវព្រឹត្តិការណ៍នៃការបង្ហូរឈាមដ៏ខ្លាំងបំផុតមួយនៅក្នុងប្រវត្តិសាស្ត្រយោធាសម័យទំនើប ដោយមានទាហានជ្រើសរើសជាអ្នកទោស២ម៉ឺននាក់បានស្លាប់ក្នុងប៉ុន្មានខែមុន។
កាលពីយប់ថ្ងៃព្រហស្បតិ៍ ប្រធានាធិបតីអ៊ុយក្រែនលោកVolodymyr Zelenskyy បាននិយាយនៅក្នុងសុន្ទរកថាប្រចាំថ្ងៃរបស់លោកថារុស្ស៊ីបានប្រើ«មីស៊ីលប្រភេទផ្សេងៗ»ជិត៧០គ្រាប់វាយប្រហារលើអ៊ុយក្រែនចាប់តាំងពីថ្ងៃចន្ទមក«ហើយនិងវាយប្រហារយ៉ាងខ្លាំងក្លាប្រឆាំងនឹងតំបន់ Odesaនិង Mykolaivនិងទីក្រុងនិងសហគមន៍នានានៅភាគខាងត្បូងរបស់យើង»។
លោកប្រធានាធិបតីបានមានប្រសាសន៍ទៀតថាជាអកុសល«ទាហានការពារដែនអាកាសរបស់យើងមិនអាចការពារដែនអាកាសអ៊ុយក្រែនទាំងមូលបាន»ក៏ប៉ុន្តែ អ៊ុយក្រែនកំពុងធ្វើការដើម្បីទទួលបានប្រព័ន្ធការពារដែនអាកាសផ្សេងទៀត។
រុស្ស៊ីបានវាយប្រហារទីក្រុងនានានៅផ្នែកខាងត្បូងប្រទេសអ៊ុយក្រែនដោយប្រើដ្រូននិងមីស៊ីល៣យប់ជាប់ៗគ្នាកាលពីថ្ងៃព្រហស្បតិ៍ ជាពិសេសដៅលើទីក្រុង Odesa ដែលជាកំពង់ផែដ៏សំខាន់នៅសមុទ្រខ្មៅរបស់អ៊ុយក្រែន។
មនុស្ស២នាក់បានត្រូវសម្លាប់នៅក្នុងទីក្រុង Odesaហើយ១៩នាក់ទៀតបានរងរបួសនៅក្នុងទីក្រុង Mykolaiv ដែលជាទីក្រុងមួយជាប់សមុទ្រខ្មៅ។ នេះបើតាមពួកមន្ត្រីអ៊ុយក្រែន៕
អ្នកឆ្លើយឆ្លងព័ត៌មានសន្តិសុខជាតិរបស់ VOA លោក Jeff Seldin អ្នកយកព័ត៌មានរបស់ VOAប្រចាំក្រសួងការពារជាតិ អ្នកស្រីCarla Babb អ្នកយកព័ត៌មានរបស់ VOAប្រចាំសេតវិមានអ្នកស្រី Anita Powel អ្នកយកព័ត៌មានVOAនៅអង្គការសហប្រជាជាតិអ្នកស្រី Margaret Besheer និងអ្នកស្រី Anna Chernikova អ្នកយកព័ត៌មានរបស់ VOA នៅទីក្រុងកៀវបានផ្តល់សេចក្តីរាយការណ៍នេះ។ ព័ត៌មានខ្លះនៃសេចក្តីរាយការណ៍នេះដកស្រង់ពីទីភ្នាក់ងារសារព័ត៌មាន AP, AFPនិង Reuters។
ក្រសួងការពារជាតិអង់គ្លេសថាអ្នកទោសធ្វើទាហាននៅក្រុម Wagner ដែលត្រូវលើកលែងទោសទំនងបន្តជាទាហានអាជីពជាប់កិច្ចសន្យា
