ស.រ.អ.បាននិយាយកាលពីថ្ងៃពុធថា ការវាយតម្លៃរបស់ខ្លួនត្រូវគ្នាជាមួយរបាយការណ៍មួយរបស់អ.ស.ប.ដែលថា មេដឹកនាំជាក់ស្តែងថ្មីនៃក្រុមភេរជន Al-Qaida ឈ្មោះ Saif al-Adel ស្ថិតនៅក្នុងប្រទេសអ៊ីរ៉ង់។
អ្នកនាំពាក្យក្រសួងការបរទេសស.រ.អ.លោក Ned Price បាននិយាយប្រាប់ពួកអ្នកកាសែតថា«ស្តីពីវត្តមានរបស់ជននេះនៅទីនោះ ដែលផ្តល់ជម្រកសុខសាន្តដល់ពួក al-Qaida ជាឧទារហរណ៍មួយទៀតនៃការគាំទ្ររបស់អ៊ីរ៉ង់ដល់ភេរវកម្ម ដល់សកម្មភាពនាំឱ្យមានអស្ថិរភាពក្នុងមជ្ឈិមបូព៌ា និងហួសពីនោះទៀត»។
អ.ស.ប.ផ្អែករបាយការណ៍របស់ខ្លួនលើការស៊ើបការណ៍សម្ងាត់របស់រដ្ឋជាសមាជិក ដែលសន្និដ្ឋានថា អតីតនាយទាហានរូបនេះនៃកងកម្លាំងពិសេសអេហ្ស៊ីបបានធ្វើជាមេដឹកនាំក្រុម al-Qaida នៅក្រោយការសម្លាប់ឈ្មោះ Ayman al-Zawahiri កាលពីខែកក្កដា ឆ្នាំ២០២២ នៅក្នុងការវាយប្រហារតាមអាកាសនៅក្រុងកាប៊ុល ប្រទេសអាហ្គានីស្ថាន។
ស្ថានបេសកកម្មអ៊ីរ៉ង់ប្រចាំអ.ស.ប.បានបដិសេធការវាយតម្លៃរបស់អ.ស.ប.និងស.រ.អ.នៅក្នុង tweet មួយកាលពីថ្ងៃពុធ។
ស្ថានបេសកកម្មនេះបានថ្លែងថា៖ «ជាការគួរកត់សម្គាល់ថា ការហៅលោកថាជាមេដឹកនាំថ្មីនៃក្រុម Al-Qaida មិនត្រឹមត្រូវទេ។ ព័ត៌មានមិនពិតនេះអាចបង្អាក់កិច្ចប្រឹងប្រែងប្រយុទ្ធប្រឆាំងនឹងភេរវកម្ម»៕
ព័ត៌មានមួយចំនួនសម្រាប់របាយការណ៍នេះបានមកពីទីភ្នាក់ងារសារព័ត៌មាន AFP និង Reuters។
