បើយោងតាមប្រពន្ធផ្សព្វផ្សាយ NHK របស់ជប៉ុន ភាគីធំបង្អស់របស់គណបក្សប្រជាធិបតេយ្យសេរីនិយមរបស់ជប៉ុនហៅកាត់ថា (LDP) គាំទ្រលោក Yoshihide Suga រដ្ឋមន្ត្រីទីស្តីការគណៈរដ្ឋមន្ត្រី ឲ្យក្លាយជាមេដឹកនាំរបស់គណបក្ស និងគាំទ្រលោកយ៉ាងពេញទំហឹង ក្នុងតំណែងជាបេក្ខជននាយករដ្ឋមន្ត្រី។
ដោយគណបក្ស LDP មានសំឡេងភាគច្រើននៅក្នុងសភាជាន់ទាប មេដឹកនាំគណបក្សរូបនេះទំនងនឹងក្លាយជានាយករដ្ឋមន្ត្រីជំនួសលោក Shinzo Abe ដែលប្រកាសលាលែងពីដំណែង កាលពីថ្ងៃសុក្រសប្តាហ៍មុន ដោយសារបញ្ហាសុខភាព។
ប្រភពមួយបានប្រាប់ទីភ្នាក់ងារព័ត៌មាន Reuters ថា គណបក្ស LDP នឹងបោះឆ្នោតជ្រើសរើសមេដឹកនាំ នៅថ្ងៃទី១៤ ខែកញ្ញា។ លោក Suga មិនទាន់ប្រកាសពីបេក្ខភាពរបស់លោក សម្រាប់ដំណែងនេះទេ ប៉ុន្តែបានឲ្យតម្រុយថា លោកមានបំណងឈរឈ្មោះ។ គណបក្ស LDP បើកកិច្ចប្រជុំនៅថ្ងៃអង្គារនេះ ដើម្បីសម្រេចលើនិតិវិធីនៃការបោះឆ្នោត។
សេចក្ដីរាយការណ៍អំពីការគាំទ្រភាគច្រើនរបស់គណបក្ស LDP មកលើរូបលោក Suga នេះ ត្រូវបានធ្វើឡើង បន្ទាប់ពីប្រព័ន្ធផ្សព្វផ្សាយបានរាយការណ៍ពីការគាំទ្រនៃក្រុម Hosoda ដ៏មានឥទ្ធិពលក្នុងបក្ស LDP ដែលដឹកនាំដោយលោក Taro Aso ឧបកនាយករដ្ឋមន្ត្រី។
អគ្គលេខាធិការបក្ស LDP ដែលជាបុរសដ៏មានឥទ្ធពលម្នាក់នៅក្នុងបក្សនេះគឺលោក Toshihiro Nikai ក៏គាំទ្រលោក Suga ដែរ៕
