លោក Shinzo Abe នាយករដ្ឋមន្ត្រីជប៉ុន និយាយថា លោកគ្រោងចុះចេញពីតំណែង ដោយសារតែបញ្ហាសុខភាព។
ថ្លែងទៅកាន់ពួកអ្នកយកព័ត៌មាន នៅថ្ងៃសុក្រនេះ នៅក្នុងទីក្រុងតូក្យូ លោក Abe បាននិយាយថា លោកបានសម្រេចចុះចេញពីតំណែង ដោយសារតែលោកមានជំងឺរលាកពោះវៀនធំឡើងវិញ ដែលបានបញ្ចប់អាណត្តិទី១ នៃការកាន់តំណែងរបស់លោក កាលពីឆ្នាំ២០០៧។
លោក Abe ដែលអាណត្តិរបស់លោកនឹងបញ្ចប់នៅខែកញ្ញា ឆ្នាំ២០២១ខាងមុខ ត្រូវគេរំពឹងថានឹងកាន់តំណែង រហូតទាល់តែមានមេដឹកនាំថ្មីនៃគណបក្សរបស់លោក ដែលត្រូវបានជ្រើសតាំង និងបោះឆ្នោតយល់ព្រមពីសភា ឲ្យធ្វើជានាយករដ្ឋមន្ត្រីថ្មី។
ការប្រមើលមើលអំពីការលាចេញពីតំណែងរបស់លោកបានលេចចេញឡើង នៅដើមឆ្នាំនេះ បន្ទាប់ពីលោកនាយករដ្ឋមន្រ្តីទៅពិនិត្យសុខភាព នៅមន្ទីរពេទ្យក្រុងតូក្យូ ក្នុងរយៈពេល២សប្តាហ៍ជាប់ៗគ្នា។ សេចក្តីលម្អិតអំពីស្ថានភាពសុខភាពរបស់លោក មិនត្រូវបានផ្សព្វផ្សាយជាសាធារ ណៈទេ នៅពេលនោះ។
លោក Abe ដែលមានអាយុ ៦៥ឆ្នាំ បានទទួលស្គាល់ថា លោកមានជំងឺរលាកពោះវៀនធំ តាំងពីលោកនៅវ័យជំទង់ ហើយបាននិយាយទៀតថា លោកកំពុងទទួលការការព្យាបាលជំងឺនេះ។
កាលពីថ្ងៃច័ន្ទ លោក Abe បានក្លាយជានាយករដ្ឋមន្ត្រីដែលកាន់តំណែងយូរជាងគេបង្អស់របស់ជប៉ុន ដោយបានកាន់តំណែងយូរជាងលោក Eisaku Sato ដែលជាជីតារបស់លោកដែលបានកាន់តំណែងរយៈពេល ២ពាន់ ៧រយ ៩៨ថ្ងៃ ចាប់ពីឆ្នាំ១៩៦៤ ដល់ឆ្នាំ១៩៧២៕
