មន្រ្តីជាន់ខ្ពស់ក្រសួងការងារ នៅថ្ងៃព្រហស្បតិ៍នេះ បានចេញមុខសន្យាថា រដ្ឋាភិបាលនឹងផ្តល់សំណងដល់អតីតបុគ្គលិកសណ្ឋាគារលំដាប់ផ្កាយ៥ ដឹហ្រ្គេតឌ្យូកភ្នំពេញ (The Great Duke Phnom Penh) ជាង ១៥០ នាក់ ជំនួសម្ចាស់សណ្ឋាគារនេះ បន្ទាប់ពីបុគ្គលិកតវ៉ាជាច្រើនខែ ប៉ុន្តែមិនមានដំណោះស្រាយ។
ការសន្យាផ្តល់សំណងពីសំណាក់មន្រ្តីក្រសួងការងារនេះធ្វើឡើង បន្ទាប់ពីក្រុមអតីតបុគ្គលិកសណ្ឋាគារតវ៉ាជាច្រើនដង ទាមទារសំណងពីម្ចាស់សណ្ឋាគារ The Great Duke អតីតសណ្ឋាគារ Inter Continental ចាប់តាំងពីសណ្ឋាគារនេះប្រកាសបិទទ្វារកាលពីចុងឆ្នាំ ២០១៩ ដោយសារវិបត្តិហិរញ្ញវត្ថុ។
នៅព្រឹកថ្ងៃព្រហស្បតិ៍នេះ អ្នកនាំពាក្យ និងជារដ្ឋលេខាធិការក្រសួងការងារ លោក ហេង សួរ បានចុះទៅដល់កន្លែងតវ៉ា ហើយប្រាប់ឲ្យក្រុមអតីតបុគ្គលិករំសាយការតវ៉ា ដោយសន្យាថា ក្រសួងនឹងផ្តល់សំណងឲ្យនៅសប្តាហ៍ក្រោយ។
លោក ហេង សួរ បាននិយាយទៅកាន់ក្រុមអតីតបុគ្គលិកនោះថា៖ «ពេលរសៀលនេះ គឺយើងពិនិត្យលើបញ្ជីឈ្មោះទាំងអស់គ្នា ហើយរយៈពេលវេលា យើងនឹងព្យាយាមដោះស្រាយធ្វើម៉េចទូទាត់ជូនបងប្អូននៅក្នុងសប្តាហ៍ក្រោយ»។
លោក ហេង សួរ សុំមិនបញ្ជាក់ពីប្រភពថវិកាដែលក្រសួងនឹងយកមកសងអតីតបុគ្គលិកជំនួសក្រុមហ៊ុននោះទេ ដោយគ្រាន់តែប្រាប់ថា ក្រសួងនឹងស្វែងរកថវិកាផ្តល់ឲ្យអតីតបុគ្គលិកទាំង ១៥២ នាក់ ជាមុនទើបដោះស្រាយជាមួយម្ចាស់សណ្ឋាគារតាមក្រោយ។
«ឥឡូវនេះបញ្ហាគឺយើងត្រូវរកប្រភពថវិកា ទាំងជាមួយម្ចាស់សណ្ឋាគារ ឬមួយប្រភពណាផ្សេងទៀត។ យើងនឹងរក។ ឥឡូវគោលដៅចុងក្រោយ គឺធ្វើម៉េចឲ្យបងប្អូនទទួលបានថវិកាសិន។ អ្វីដែលក្រុមប្រឹក្សាអាជ្ញាកណ្តាលដាក់ជូនកន្លងមកនេះ គឺយើងនឹងអនុវត្តទៅតាមហ្នឹង»។
បើតាមលោក ហេង សួរ ការដែលម្ចាស់សណ្ឋាគារមិនអនុវត្តតាមសេចក្តីសម្រេចរបស់ក្រុមប្រឹក្សាអាជ្ញាកណ្តាល បុគ្គលិកអាចប្តឹងទៅតុលាការដើម្បីចាប់បង្ខំឲ្យថៅកែអនុវត្ត។
VOA មិនទាន់អាចទាក់ទងលោក ខូវ សម្បត្តិ ម្ចាស់សណ្ឋាគារ The Great Duke ដើម្បីសុំការអត្ថាធិប្បាយបាននៅឡើយទេ។
កាលពីខែកុម្ភៈ ឆ្នាំ២០២០ ក្រុមប្រឹក្សាអាជ្ញាកណ្តាលចេញសេចក្តីសម្រេចឲ្យម្ចាស់សណ្ឋាគារគឺ លោកឧកញ៉ា ខូវ សម្បត្តិ អគ្គនាយកក្រុមហ៊ុន ថៃ ប៊ុនរ៉ុង ផ្តល់សំណងដល់បុគ្គលិក។
ក្នុងសេចក្តីសម្រេចចុះថ្ងៃទី២០ ខែកុម្ភៈ ដែល VOA ទទួលបាន ក្រុមប្រឹក្សាអាជ្ញាកណ្តាលបង្គាប់ ៣ចំណុច ដោយទីមួយ ឲ្យម្ចាស់សណ្ឋាគារផ្តល់ប្រាក់បំណាច់ទូទាត់ ដោយគិតតាមអតីតភាពការងារជាក់ស្តែងរបស់បុគ្គលិកម្នាក់ៗ។ ចំណុចទីពីរ បង្គាប់ឲ្យនិយោជកទូទាត់ប្រាក់រំឭកអតីតភាពការងារមុនឆ្នាំ២០១៩ ដោយយកប្រាក់ឈ្នួលគោល និងប្រាក់បន្ទាប់បន្សំមកគណនាជូនបុគ្គលិក។ ចំណែកចំណុចទីបីក្រុមប្រឹក្សាអាជ្ញាកណ្តាលបានបដិសេធការទាមទាររបស់បុគ្គលិកដែលចង់ឲ្យថៅកែទូទាត់សោហ៊ុយជំងឺចិត្ត ដែលមានចំនួនស្មើប្រាក់បំណាច់អតីតភាពការងារ ដែលមានមុនឆ្នាំ២០១៩។
ប៉ុន្តែបុគ្គលិកអះអាងថា ក្រោយការចេញសេចក្តីសម្រេចនោះ ម្ចាស់សណ្ឋាគារមិនអើពើចំពោះការអនុវត្តនោះទេ ទើបពួកគេធ្វើការតវ៉ាជាបន្តបន្ទាប់។
លោក ទូច កុសល ប្រធានសហព័ន្ធសហជីពកម្មករ និយោជិតវិស័យទេសចរណ៍កម្ពុជា និងជាអតីតបុគ្គលិកសណ្ឋាគារ The Great Duke បានប្រាប់ VOA នៅថ្ងៃព្រហស្បតិ៍នេះថា អតីតបុគ្គលិកទាំងអស់នឹងផ្អាកការតវ៉ាចាប់ពីរសៀលថ្ងៃព្រហស្បតិ៍នេះ រហូតដល់មានការផ្តល់សំណងនៅសប្តាហ៍ក្រោយ។
«បើសិនសប្តាហ៍ក្រោយ យើងអត់បានលុយ ហើយអត់មានការដោះស្រាយឲ្យពួកយើងខ្ញុំ គឺថា យើងខ្ញុំអស់ការអត់ធ្មត់ហើយ គឺត្រូវតែហែក្បួនទៅផ្ទះសម្តេចនាយករដ្ឋមន្រ្តីតែម្តង ទោះមានការវាយ ការរារាំងយ៉ាងម៉េចក៏ពួកខ្ញុំត្រូវតែធ្វើដែរ»។
បើតាមលោក ទូច កុសល អតីតបុគ្គលិកម្នាក់ៗត្រូវទទួលប្រាក់សំណងពីជិត ១ពាន់ដុល្លារ ទៅជិត២ពាន់ដុល្លារ ទៅតាមអតីតភាពការងារ។ លោកបន្ថែមថា ក្នុងអំឡុងការតវ៉ាដំបូង កាលពីចុងឆ្នាំ២០១៩ អតីតបុគ្គលិកជាង ១៥០ នាក់ត្រូវទទួលបានសំណងជារួមជាង ៧០ ម៉ឺនដុល្លារ។ ប៉ុន្តែលោកថា ពួកគេសម្រេចកាត់ចោលប្រាក់សំណងមួយចំនួន រហូតនៅសល់ជាង ៣០ ម៉ឺនដុល្លារ។
កំពុងឈរតវ៉ានៅខាងមុខសណ្ឋាគារដឺហ្រ្គេតឌ្យូក ដោយមានកាន់រូបថតរបស់លោកនាយករដ្ឋមន្រ្តី ហ៊ុន សែន ផងនោះអ្នកស្រី រ៉ន មករា អតីតអ្នករត់តុនៅសណ្ឋាគារដឺហ្រ្គេតឌ្យូក អស់រយៈពេលជិត ១០ឆ្នាំ ថ្លែងថា ចាប់តាំងពីពេលដែលសណ្ឋាគារប្រកាសបិទទ្វារ អ្នកស្រីមិនមានការងារធ្វើអស់រយៈពេលជាង ៥ខែមកហើយ។ ស្រ្តី វ័យ៣៣ឆ្នាំរូបនេះ បន្តថា ប្រសិនបើទទួលបានសំណងអ្នកស្រីយកលុយនេះទៅប្រកបរបរតូចមួយ ដើម្បីដោះស្រាយបញ្ហាជីវភាពដែលអ្នកស្រីថា កំពុងតែលំបាកខ្លាំង។
«សម្រាប់ខ្ញុំបានប្រហែលជាជិត១ពាន់អីហ្នឹង… បានតិចណាស់! ហើយគាត់នៅតែអត់ព្រមបង់លុយឲ្យពួកខ្ញុំទៀត។ បើបានមក ពួកខ្ញុំយកទៅលក់ចាប់ហួយ លក់អីនៅផ្ទះអ៊ីចឹង។ ហើយឥឡូវ បើអត់មានអ៊ីចឹង ពិបាកខ្លាំងតែម្តង»។
អ្នកគ្រប់គ្រងកម្មវិធីការងារនៃអង្គការសង់ត្រាល់ (CENTRAL) លោក ឃុន ថារ៉ូ លើកឡើងថា ការដែលរដ្ឋាភិបាលមិនអាចបង្ខំឲ្យម្ចាស់សណ្ឋាគារផ្តល់សំណងផ្លូវច្បាប់ដល់បុគ្គលិកជាង ៣០ ម៉ឺនដុល្លារអាមេរិក គឺបង្ហាញពីកម្សោយនៃការអនុវត្តច្បាប់។
«វាបង្ហាញអំពីរូបភាពមិនល្អប៉ុន្មានទេ ដែលថា កម្មករនិយោជិតគាត់ទាមទារនូវសំណង ការទូទាត់ទៅតាមផ្លូវច្បាប់ ហើយទៀតសោតហ្នឹង គឺក្រសួងមិនមានឥទ្ធិពលអីដាក់សម្ពាធទៅក្រុមហ៊ុន …បន្ទាប់ពីមានការចរចាច្រើនលើកច្រើនសារ ហើយមិនមានវិធានការជាក់លាក់ណាមួយនៅក្នុងការដាក់សម្ពាធ»។
នៅព្រឹកថ្ងៃព្រហស្បតិ៍នេះ ក្រុមអតីតបុគ្គលិកជាង ៣០ នាក់ ដែលតវ៉ានៅខាងមុខសណ្ឋាគារក៏បានប្រកាសថា ពួកគេនឹងដាក់ញត្តិសុំអន្តរាគមន៍ពីលោកនាយករដ្ឋមន្រ្តី ហ៊ុន សែន ប្រសិនបើមិនមានដំណោះស្រាយ៕
