ភ្ជាប់​ទៅ​គេហទំព័រ​ទាក់ទង

កងកម្លាំ​ង DFA ដឹកនាំ​ដោយ​អំបូរ​ Kurde នៅ​ស៊ីរី​ប្រកាស​វាយ​រំដោះ​យក​ក្រុង​ Raqqa


ក្រុម​ទាហាន​ដែល​ចូល​រួម​ក្នុង​ប្រតិបត្តិការ​រំដោះ​ក្រុង​ Raqqa នៅ​ប្រទេស​ស៊ីរី ពី​ពួក​រដ្ឋ​ឥស្លាម កាល​ពី​ថ្ងៃទី​២៤ ខែ​ឧសភា ឆ្នាំ២០១៦។

កងកម្លាំង​ប្រជាធិបតេយ្យ​ស៊ីរី​ហៅ​កាត់​ថា​ SDF ​ដឹកនាំ​ដោយ​ពួក​ជន​អំបូរ​ Kurde បាន​បើក​ការ​វាយ​ប្រហារ​មួយ​ដើម្បី​វាយ​យក​តំបន់​នៅ​ខាង​ជើង​ក្រុង​ Raqqa ​ដែល​ជា​រដ្ឋធានី​តាម​ព្រឹត្តន័យ​នៃ​ពួក​រដ្ឋ​ឥស្លាម​ ដោយ​មាន​គោល​បំណង​រំដោះ​ក្រុង​នេះ​មក​វិញ។

ក្រុម​នេះ​ដែល​ជា​សម្ព័ន្ធមិត្ត​របស់​ស.រ.អា.​បាន​ធ្វើ​សេចក្តី​ប្រកាស​នេះ​នៅ​ក្នុង​សេចក្តី​ថ្លែង​ការណ៍​មួយ​តាម​វីដេអូ​ដែល​បាន​ត្រូវ​ផ្សព្វផ្សាយ​តាម​ប្រព័ន្ធ​អ៊ីនធឺណិត​កាល​ពី​ថ្ងៃអង្គារ។

អ្នកស្រី​ Rojda Felat ​មេបញ្ជាការ​ស្ត្រី​ Kurde ​បាន​និយាយ​ថា «យើង​កំពុង​បើក​យុទ្ធនាការ​នេះ​ដោយ​មាន​ជំនួយ​ពីកង​កម្លាំង​ចម្រុះ​ដឹកនាំ​ដោយ​ស.រ.អា.​នៅ​ក្នុង​ប៉ែក​ខាង​ជើង​នៃ​ក្រុង​ Raqqa»។

លោក​វរសេនីយ៍ឯក​ Steve Warren ​អ្នកនាំ​ពាក្យ​នៃ​ក្រុម​ចម្រុះ​ប្រយុទ្ធ​ប្រឆាំង​នឹង​ពួក​រដ្ឋឥស្លាម​ បាន​មាន​ប្រសាសន៍​ថា «ពួក ​SDF ​បាន​ប្រកាស​ថា​ពួក​គេ​បាន​ចាប់​ផ្តើម​ធ្វើ​កិច្ច​ប្រតិបត្តិការ​ដើម្បី​រំដោះ​តំបន់​ស្រុកស្រែ​នៅ​ខាង​ជើង​ក្រុង ​Raqqa។​យើង​តែង​តែ​ផ្តោត​ការ​យក​ចិត្តទុក​ដាក់​លើ​ការ​បណ្តេញ​ពួក ​Da'esh​ ចេញ​ពីក្រុង Raqqa ​ហើយ​យើង​នឹង​បន្ត​គាំទ្រ​ពួក​ SDF ​នៅ​ពេល​ដែល​ពួក​គេធ្វើ​កិច្ច​ប្រតិបត្តិការ​នៅ​លើ​ដី​ដើម្បី​ធ្វើឱ្យ​ក្រុង​នេះ​នៅ​ដាច់​ពី​គេ​ថែម​ទៀត»។

មេបញ្ជាការ​ម្នាក់​នៃ​កង​កម្លាំង​ប្រជាធិបតេយ្យស៊ីរី​បាន​និយាយ​កាល​ពី​ពេល​មុន​នេះ​ថា ​ក្រុម​ទាហាន​ចម្រុះ​នឹង​រួម​ប្រយុទ្ធ​ជាមួយ​កង​កម្លាំង​ SDF​ ក៏ប៉ុន្តែ​លោក Warren​ បាន​ប្រកែក​មិន​ព្រម​អធិប្បាយ​អំពី​មុខនាទី​ជាក់​លាក់​ដែល​កង​កម្លាំង​ចម្រុះ​នឹង​បំពេញ។

លោក​បានថ្លែង​ថា៖ «ដូចលោក​អ្នក​ដឹង​ហើយ​ថា​ យើង​មិន​និយាយ​ទេ​អំពី​កិច្ច​ប្រតិបត្តិការ​នៃ​កង​កម្លាំង​ពិសេស»។

នៅ​ក្នុង​ឱកាស​បំពេញ​ទស្សនកិច្ច​មួយ​ក្នុង​ប្រទេស​អ៊ូសបេគីស្ថាន​ (Uzbekistan) លោក​រដ្ឋមន្ត្រី​ការបរទេស​រុស្ស៊ី​ Sergei Lavrov ​បានមាន​ប្រសាសន៍​ថា ​រដ្ឋាភិបាល​ក្រុង​មូស្គូ​ប្រុង​ប្រៀប​ស្រេច​ហើយ​ដើម្បី​សម្របស​ម្រួល​កិច្ច​ខិត​ខំប្រឹង​ប្រែង​ជាមួយ​ក្រុម​ចម្រុះ​ដឹកនាំ​ដោយ​ស.រ.អា.​ដើម្បី​រំដោះក្រុង ​Raqqa។​

ក៏​ប៉ុន្តែ​លោកវរសេនីយ៍ឯក​ Warren​ បានច្រាន​ចោល​ការ​យល់​ឃើញ​ណាមួយ​អំពី​លទ្ធភាព​នៃការ​សម្រប​សម្រួល​ការ​ប្រយុទ្ធជាមួយ​ប្រទេស​រុស្ស៊ី៕

XS
SM
MD
LG