កាលពីថ្ងៃពុធម្សិលម៉ិញ ព្រះមហាក្សត្រខ្មែរព្រះបាទសម្តេចនរោត្តមសីហមុនីបានយាងទៅប្រទេសវៀតណាមដើម្បីបំពេញព្រះរាជទស្សនកិច្ចនៅក្នុងទីក្រុងហាណូយនិងទីក្រុងដាណាង។ នេះបើយោងតាមព្រះរាជសាររបស់អង្គព្រះមហាក្សត្រ។
ព្រះរាជសាររបស់ព្រះអង្គមិនបានផ្តល់ហេតុផលនៃការយាងចេញទៅបំពេញព្រះរាជទស្សនកិច្ចនៅប្រទេសវៀតណាមដែលជាប្រទេសក្បែរខាងកម្ពុជានោះឡើយ។
ក៏ប៉ុន្តែការយាងចេញរបស់ព្រះអង្គពីប្រទេសកម្ពុជាទៅរដ្ឋកុម្មុយនីស្តមួយនេះកើតមានឡើងក្រោយការបញ្ចប់ទស្សនកិច្ចរបស់គណៈប្រតិភូជាន់ខ្ពស់ខ្មែរដឹកនាំដោយលោកនាយករដ្ឋមន្ត្រីហ៊ុន សែនទៅប្រទេសវៀតណាម ដែលបានធ្វើឡើងនៅដើមខែធ្នូនេះ។
ព្រះរាជសាររបស់អង្គព្រះមហាក្សត្រខ្មែរចុះថ្ងៃទី១៨ខែធ្នូនេះបានសរសេរក្នុងន័យដើមថា៖
«ទូលព្រះបង្គំ ខ្ញុំព្រះករុណា ខ្ញុំសូមព្រះអនុញ្ញាត និងអនុញ្ញាតពីសម្តេចព្រះមហាសង្ឃរាជទាំងពីរគណ និងព្រះថេរានុត្ថិរៈគ្រប់ព្រះអង្គ សម្តេចឯកឧត្តមលោកជំទាវ អស់លោក លោកស្រី លោកតា លោកយាយ មាមីង បងប្អូន ក្មួយៗ ជនរួមជាតិទាំងអស់ អវត្តមានពីមាតុប្រទេសពីថ្ងៃទី១៩ថល់២១ខែធ្នូឆ្នាំ២០១៨តទៅ ដើម្បីយាងបំពេញព្រះរាជទស្សនកិច្ច នៅទីក្រុងហាណូយ និងទីក្រុងដាណាងនៃសាធារណរដ្ឋសង្គមនិយមវៀតណាម តាមសំណើសុំយាងរបស់រដ្ឋាភិបាលនៃសាធារណរដ្ឋសង្គមនិយមវៀតណាម»។
ព្រះរាជសាររបស់ព្រះអង្គបានបន្តទៀតថា ក្នុងពេលព្រះអង្គពុំមានវត្តមានក្នុងប្រទេសនោះលោកសាយ ឈុំ ប្រធានព្រឹទ្ធសភានឹងបំពេញតួនាទីជាប្រមុខរដ្ឋស្តីទី។ លោកសាយ ឈុំ ក៏ជាអនុប្រធានគណបក្សប្រជាជនកម្ពុជាផងដែរ។
កាលពីដើមខែធ្នូនេះ លោកនាយករដ្ឋមន្ត្រីហ៊ុន សែន ដែលជាប្រធានគណបក្សប្រជាជនកម្ពុជាផងនោះ បានដឹកនាំក្រុមមន្ត្រីសំខាន់ៗរបស់លោក មានទាំងមន្ត្រីទទួលបន្ទុកកិច្ចព្រំដែនផងនោះ ទៅបំពេញទស្សនកិច្ចនៅវៀតណាម ទីដែលលោកហ៊ុន សែនបានជួបក្រុមមេដឹកនាំនៃរដ្ឋកុម្មុយនីស្តមួយនេះ។
ក្នុងដំណើរទស្សនកិច្ច ដែលធ្វើឡើងចាប់ពីថ្ងៃទី៦ដល់ថ្ងៃទី៨ខែធ្នូនោះ លោកហ៊ុន សែននិងភាគីវៀតណាម«បានឯកភាពគ្នារៀបចំរំឭកខួបអនុស្សាវរីយ៍លើកទី៤០នៃការតស៊ូរួមគ្នាដើម្បីរំលំរបបប្រល័យពូជសាសន៍ប៉ុល ពត»។
ប្រទេសកម្ពុជានិងវៀតណាមក៏បានព្រមព្រៀងគ្នាកសាងខ្សែបន្ទាត់ព្រំដែនរួមប្រកបដោយមិត្តភាព សន្តិភាព ស្ថិរភាព និងសហប្រតិបត្តិការរឹងមាំយូរអង្វែងសម្រាប់ប្រជាជនជំនាន់ក្រោយៗ និងបានឯកភាពគ្នាជំរុញឲ្យគណៈកម្មការចម្រុះខណ្ឌសីមាព្រំដែនទាំងសងខាង ពន្លឿនការដោះស្រាយបញ្ចប់បញ្ហាព្រំដែនគោកដែលនៅសេសសល់ចំនួន១៦ភាគរយផ្អែកលើស្មារតីនៃមិត្តភាព និងភាពជាអ្នកជិតខាងល្អ។
VOA ព្យាយាមសុំការអធិប្បាយពីលោក អ៊ុំ ដារ៉ាវុធ អ្នកនាំពាក្យព្រះបរមរាជវាំង តែមិនទាន់អាចទាក់ទងបាននៅឡើយ នៅថ្ងៃពុធនេះ។
ព្រះមហាក្សត្រខ្មែរព្រះបាទសម្តេចនរោត្តសីហមុនីបានឡើងគ្រងរាជ្យសម្បត្តិជំនួសព្រះបិតារបស់ព្រះអង្គគឺព្រះបរមរតនកោដ្ឋសម្តេចឪនរោត្តមសីហនុ កាលពីថ្ងៃទី២៩ខែតុលាឆ្នាំ២០០៤។ ក្រោយការឡើងគ្រងរាជ្យរបស់ព្រះអង្គ ព្រះអង្គបានបំពេញព្រះរាជសកម្មភាពជាច្រើននៅក្នុងកិច្ចការមនុស្សធម៌។ ព្រះអង្គក៏ពុំទាន់បានធ្វើអ្វីឲ្យមានការប្រែប្រួលជាដុំកំភួននៅក្នុងនយោបាយកម្ពុជា ដូចព្រះបិតារបស់ព្រះអង្គនោះដែរ ដោយព្រះអង្គបានគ្រងរាជ្យ តែមិនធ្វើនយោបាយ ដូចមានចែងក្នុងរដ្ឋធម្មនុញ្ញនៃព្រះរាជាណាចក្រកម្ពុជា។
ការណ៍នេះត្រូវបានអ្នកវិភាគនយោបាយលើកឡើងកាលពីពេលកន្លងមកថា ការយាងបំពេញទស្សនកិច្ចរបស់ព្រះអង្គនៅប្រទេសវៀតណាមនោះនឹងពុំមានឥទ្ធិពលខាងនយោបាយនោះឡើយ តែការយាងទៅបំពេញទស្សនកិច្ចនោះគឺជាកាយវិការនៃការពង្រឹងចំណងទាក់ទងរវាងប្រជាជនកម្ពុជា និងប្រជាជនវៀតណាម ក៏ដូចជាការរឹតចំណងវប្បធម៌របស់ប្រទេសទាំងពីរឲ្យបានប្រសើរឡើងថែមទៀត។
ក្រៅពីការយាងទៅបំពេញទស្សនកិច្ចនៅប្រទេសវៀតណាមនោះ ព្រះមហាក្សត្រខ្មែរព្រះបាទសម្តេចនរោត្តសីហមុនី ក៏បានយាងទៅបំពេញទស្សនកិច្ចនៅប្រទេសចិនជាញឹកញាប់ដែរ។ ប្រទេសចិនក៏ជាទីដែលព្រះអង្គទទួលបានការពិនិត្យព្រះរាជសុខភាពជាប្រចាំផងដែរ៕
