ក្នុងរយៈពេលពីរខែជាប់គ្នា ព្រះមហាក្សត្រខ្មែរបានចេញព្រះរាជក្រឹត្យតែងតាំងអ្នកកាសែត និងក្រុមមន្ត្រីសរុបចំនួន១៧៣នាក់ជាទីប្រឹក្សាក្រសួងព័ត៌មាន ខណៈដែលអ្នកជំនាញក្នុងវិស័យសារព័ត៌មានព្រួយបារម្ភថា ការតែងតាំងទីប្រឹក្សាចំនួនច្រើនបែបនេះនឹងធ្វើឲ្យប៉ះពាល់ដល់វិជ្ជាជីវៈសារព័ត៌មានក្នុងប្រទេសកម្ពុជា។
កាលពីថ្ងៃសៅរ៍ទី២៧ខែកក្កដា ព្រះមហាក្សត្រព្រះបាទនរោត្តមសីហមុនីបានតែងតាំងទីប្រឹក្សាក្រសួងព័ត៌មានចំនួន១០៦រូប បន្ថែមពីលើទីប្រឹក្សាចំនួន៦៧រូបដែលត្រូវបានតែងតាំងកាលពីខែមុន។ ទីប្រឹក្សាទាំងនេះមានងារជាឯកឧត្តម និងលោកជំទាវ ដែលមានឋានៈស្មើនឹងរដ្ឋលេខាធិការ អនុរដ្ឋលេខាធិការ និងស្មើនឹងអគ្គនាយករបស់ក្រសួង។
លោកមាស សុភ័ណ្ឌ អ្នកនាំពាក្យក្រសួងព័ត៌មាន ប្រាប់ VOA ថា ក្នុងចំណោមទីប្រឹក្សាថ្មីទាំង១៧៣រូបនេះ ភាគច្រើនជាមន្រ្តីក្រសួងព័ត៌មានដែលចូលនិវត្តន៍ និងមានគុណសម្បត្តិក្នុងការជួយជំរុញវិស័យព័ត៌មាននៅកម្ពុជាឲ្យប្រសើរឡើង។
«យោងបរិបទបច្ចុប្បន្ននេះ យើងឃើញហើយថា តម្រូវការនៃអ្នកមានបទពិសោធន៍ក៏ដូចជាអ្នកមានចំណេះ ជំនាញផ្នែកវិស័យព័ត៌មានរបស់យើងហ្នឹងត្រូវការជាចាំបាច់។ អ៊ីចឹងហើយគាត់នឹងចូលរួមចំណែកក្នុងការផ្តល់ជាប្រឹក្សាយោបល់ទៅ ក៏ដូចជាការបណ្តុះបណ្តាលទៅលើមន្រ្តីវ័យក្មេងរបស់ក្រសួងព័ត៌មាន ឬក៏អ្នកសារព័ត៌មានវ័យក្មេងហ្នឹង ដើម្បីឲ្យយល់អ្វីទៅដែលជាជំនាញវិជ្ជាជីវៈអ្នកសារព័ត៌មាន»។
ក្នុងចំណោមទីប្រឹក្សាថ្មីទាំងនេះ គេឃើញមានអ្នកកាសែតដែលជាអ្នកគ្រប់គ្រង និងជានិពន្ធនាយកក្នុងស្ថាប័នទូរទស្សន៍ និងសារព័ត៌មានបោះពុម្ពផ្សាយ។ ក្នុងនោះក៏មានអ្នកកាសែតមួយចំនួនដែលមានអាយុជាង២០ឆ្នាំផងដែរ។
លោកណុប វី ប្រធានផ្នែកប្រព័ន្ធផ្សព្វផ្សាយនៃមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ(CCIM)លើកឡើងថា បើតាមការសង្កេតរបស់លោក ក្រសួងព័ត៌មានមិនមានភាពចាំបាច់ណាមួយដែលត្រូវការប្រឹក្សាច្រើននោះទេ។ លោកបន្តថា ការតែងតាំងទីប្រឹក្សាក្រសួងដែលមានទាំងសមាសភាពអ្នកសារព័ត៌មានផងនោះនឹងធ្វើឲ្យប៉ះពាល់ដល់វិជ្ជាជីវៈសារព័ត៌មាននៅកម្ពុជា។
«ពេលដែលពួកគាត់ត្រូវបានតែងតាំង ឬត្រូវបានបញ្ចូលទៅក្នុងសមាសភាពនៃទីប្រឹក្សាយោបល់ ឬមួយក៏មន្រ្តីរដ្ឋាភិបាលអីទៅ ខ្ញុំគិតធ្វើថា អាហ្នឹងធ្វើឲ្យចំនួនអ្នកដែលមានសមត្ថភាព ឈរលើគោលការណ៍វិជ្ជាជីវៈអីហ្នឹង កាន់តែរួមតូចទៅៗ»។
លោកណុប វីបន្ថែមថា រដ្ឋាភិបាលគួរបង្កើនការបណ្តុះបណ្តាលចំណេះដឹងដល់អ្នកសារព័ត៌មាន ហើយលើកទឹកចិត្ត និងការពារអ្នកសារព័ត៌មានឲ្យហ៊ានផ្សាយពីព័ត៌មានពិត ដើម្បីជាការរួមចំណែកក្នុងការអភិវឌ្ឍសង្គម។
បើតាមអង្គការអ្នកសារព័ត៌មានគ្មានព្រំដែន ប្រព័ន្ធផ្សព្វផ្សាយរបស់ប្រទេសកម្ពុជា«ធ្លាប់ស្ថិតនៅក្នុងចំណោមប្រព័ន្ធផ្សព្វផ្សាយសេរីបំផុតមួយនៅទ្វីបអាស៊ី»។ ប៉ុន្តែក្នុងឆ្នាំ២០១៨ អង្គការឃ្លាំមើលសេរីភាពសារព័ត៌មានមួយនេះបញ្ជាក់ថា សន្ទស្សន៍សេរីភាពសារព័ត៌មាននៅក្នុងប្រទេសកម្ពុជាបានថយលំដាប់ពីលេខរៀងទី៧១ទៅដល់លេខ១៤២ក្នុងចំណោម១៨០ប្រទេស។ ចំណាត់ថ្នាក់នេះមានន័យថា ស្ថានភាពសេរីភាពសារព័ត៌មានក្នុងប្រទេសកម្ពុជាបានធ្លាក់ចុះ៕
