ប្រព័ន្ធផ្សព្វផ្សាយរដ្ឋកូរ៉េខាងជើងបាននិយាយនៅថ្ងៃព្រហស្បតិ៍នេះថា មេដឹកនាំរបស់ខ្លួនគឺលោក Kim Jong Un បានព្រមានកាលពីល្ងាចថ្ងៃពុធថា ប្រទេសរបស់លោក«ត្រៀមខ្លួនរួចរាល់ហើយ» សម្រាប់ជម្លោះយោធាជាមួយសហរដ្ឋអាមេរិក។
នេះជាការគំរាមកំហែងចុងក្រោយបង្អស់របស់រដ្ឋាភិបាលទីក្រុងព្យុងយ៉ាង ចំពេលមានការរំពឹងទុកថា កូរ៉េខាងជើងនឹងធ្វើការសាកល្បងអាវុធនុយក្លេអ៊ែរលើកទីប្រាំពីរក្នុងពេលឆាប់ៗនេះ។ នៅក្នុងសុន្ទរកថារំឭកខួបបញ្ចប់សង្គ្រាមកូរ៉េ លោក Kim Jong Un ក៏បានព្រមានថា រដ្ឋាភិបាលកូរ៉េខាងត្បូងនឹងត្រូវវិនាស ប្រសិនបើហ៊ានធ្វើ «ការប៉ុនប៉ងដ៏គ្រោះថ្នាក់»។ នេះបើយោងតាមទីភ្នាក់ងារសារព័ត៌មានរដ្ឋកូរ៉េខាងជើង។
ប្រធានាធិបតីកូរ៉េខាងត្បូងលោក Yoon Suk Yeol ដែលជាអ្នកអភិរក្សនិយមឡើងកាន់តំណែងកាលពីខែឧសភា បាននិយាយម្តងហើយម្តងទៀតអំពីការវាយប្រហារបង្ការជាមុនដែលអាចកើតមានរួមទាំងការវាយប្រហារថ្នាក់ដឹកនាំជាន់ខ្ពស់កូរ៉េខាងជើង ប្រសិនបើកូរ៉េខាងត្បូងរកឃើញសញ្ញានៃការវាយប្រហារដែលជិតមកដល់។ លោក Kim Jong Un បាននិយាយថា សកម្មភាពបែបនេះនឹងត្រូវ«ដាក់ទណ្ឌកម្មភ្លាមៗដោយកម្លាំងខ្លាំងក្លា»របស់កូរ៉េខាងជើង។ លោកបន្ថែមថា៖ «របបនិងយោធារបស់លោក Yoon Suk Yeol នឹងត្រូវកម្ទេចចោល»។
នៅក្នុងសុន្ទរកថារបស់លោក លោក Kim Jong Un បានអួតម្តងហើយម្តងទៀតអំពីអាវុធនុយក្លេអ៊ែររបស់ប្រទេសលោក ហើយបានបង្ហាញថា លោកបានត្រៀមខ្លួនប្រើប្រាស់វាប្រសិនបើចាំបាច់។ លោកបាននិយាយថា កូរ៉េខាងជើងបានត្រៀមខ្លួនយ៉ាងពេញលេញសម្រាប់ការប្រឈមមុខខាងយោធាជាមួយសហរដ្ឋអាមេរិក។
ក្នុងឆ្នាំនេះ កូរ៉េខាងជើងបានសាកល្បងកាំជ្រួចច្រើនមិនធ្លាប់មានពីមុន។ រដ្ឋាភិបាលទីក្រុងព្យុងយ៉ាងក៏បានត្រៀមខ្លួនរួចហើយសម្រាប់ការសាកល្បងនុយក្លេអ៊ែរមួយទៀត។ នេះបើយោងតាមមន្ត្រីអាមេរិកនិងកូរ៉េខាងត្បូង។
ជាការឆ្លើយតប កូរ៉េខាងត្បូងបានពង្រីកសម្ពន្ធភាពយោធាដែលមានអាយុកាលរាប់ទសវត្សរ៍ជាមួយសហរដ្ឋអាមេរិក។ ប្រទេសទាំងពីរក៏បានព្រមព្រៀងបង្ហាញអំណាចយោធាក្នុងដើម្បីរារាំងកូរ៉េខាងជើងដែលមានអាវុធនុយក្លេអ៊ែរ។ នៅខែក្រោយ សហរដ្ឋអាមេរិក និងកូរ៉េខាងត្បូងនឹងបន្តសមយុទ្ធយោធាទ្រង់ទ្រាយធំ ដែលត្រូវបានផ្អាកអស់ជាច្រើនឆ្នាំ ខណៈប្រទេសទាំងពីរបន្តការចរចាជាមួយកូរ៉េខាងជើង។ ទោះបីជាសម្ពន្ធមិត្តទាំងពីរនិយាយថា សមយុទ្ធនេះមានលក្ខណៈការពារក៏ដោយ ក៏កូរ៉េខាងជើងមើលឃើញថា សមយុទ្ធនេះគឺជាការត្រៀមលក្ខណៈដើម្បីឈ្លានពាន ហើយជារឿយៗកូរ៉េខាងជើងប្រើការរិះគន់សមយុទ្ធយោធាជាលេសដើម្បីចេញការគំរាមកំហែង ឬធ្វើសកម្មភាពបង្កហេតុផ្សេងទៀត៕
