នាយករដ្ឋមន្ត្រីជប៉ុនលោក Fumio Kishida បានបញ្ចេញផែនការដើម្បីធ្វើឱ្យប្រសើរឡើងនូវសមត្ថភាពយោធារបស់ជប៉ុនហើយនឹងជួយផ្នែកសន្តិសុខនាវាចរណ៍ដល់ប្រទេសនានានៅតំបន់អាស៊ីអាគ្នេយ៍ ក្នុងអំឡុងពេលនៃការថ្លែងសុន្ទរកថាដ៏សំខាន់របស់លោកនៅក្នុងប្រទេសសិង្ហបុរីកាលពីថ្ងៃសុក្រសប្តាហ៍មុននៅក្នុងសន្និសីទកំពូលសន្តិសុខអាស៊ី Shangri-La Dialogue។
លោកបាននិយាយថា៖ «អ៊ុយក្រែនអាចជាតំបន់អាស៊ីខាងកើតនៅថ្ងៃស្អែក»។ លោកបាននិយាយបន្តទៀតថា បញ្ហាកោះតៃវ៉ាន់អាចបណ្តាលឱ្យមានការគំរាមកំហែងដល់សន្តិភាពនៅទូទាំងតំបន់អាស៊ីខាងកើត។ បន្ទាប់មក លោក Kishidaបានធ្វើការបញ្ជាក់យ៉ាងច្បាស់ថា រដ្ឋាភិបាលក្រុងតូក្យូកំពុងរៀបចំផែនការទទួលយកអាវុធដើម្បីវាយប្រហារតបតវិញដើម្បីការពារទប់ទល់ការវាយប្រហារដ៏ធំ។
លោកបានមានប្រសាសន៍ទៀតថា៖ «ចក្ខុវិស័យ Kishida ដើម្បីសន្តិភាព នឹងពង្រឹងវិស័យការ ទូតនិងសន្តិសុខរបស់ជប៉ុន»។ លោកបានបញ្ជាក់ឡើងវិញពីការតាំងចិត្តដែលរដ្ឋាភិបាលក្រុងតូក្យូបានធ្វើនៅដើមសប្តាហ៍នេះដើម្បីបង្កើនការចំណាយលើវិស័យការពារប្រទេសដ៏ច្រើននៅក្នុងរយៈពេល៥ឆ្នាំបន្ទាប់ទៀតនោះ រួមទាំងកញ្ចប់ជំនួយសម្រាប់ផ្គត់ផ្គង់នាវាយាមល្បាតដល់ប្រទេសនានានៅតំបន់អាស៊ីអាគ្នេយ៍។ ប្រទេសមួយចំនួននៃប្រទេសទាំងនោះបានទាមទារផ្នែកនានានៃសមុទ្រចិនខាងត្បូងប្រឆាំងនឹងចិន។
កាសែត Global Times ដែលជាកាសែតរដ្ឋចិនបានរិះគន់គំនិតផ្តួចផ្តើមរបស់ជប៉ុន នៅក្នុងខ្ទង់ការបញ្ចេញមតិរបស់ខ្លួន ដែលបានចេញផ្សាយប៉ុន្មានម៉ោង មុនសុន្ទរកថារបស់លោក Kishida។កាសែតនោះបានបញ្ជាក់ថា «ជប៉ុនប្រើប្រាស់ហេតុផលនៃការរារាំងវិបត្តិដូចជាវិបត្តិរវាងរុស្ស៊ីនិងអ៊ុយក្រែនកុំឱ្យកើតមានឡើងនៅក្នុងទ្វីបអាស៊ីដើម្បីធ្វើឱ្យស្របច្បាប់នូវចំណាត់ ការរបស់ខ្លួន ដើម្បីស៊ុមគ្រលុំជាមួយអង្គការអូតង់និងដើម្បីជំរុញឱ្យប្រទេសនានានៅក្នុងតំបន់បម្រើគោលដៅរបស់ខ្លួននៃការវាយប្រហារលើប្រទេសចិន»។
មេដឹកនាំជប៉ុនក៏បានសម្តែងនូវការព្រួយកង្វល់អំពីប្រទេសកូរ៉េខាងជើងដែលបានធ្វើការ សាកល្បងអាវុធយ៉ាងតិចណាស់ក៏ចំនួន១៨លើកនៅឆ្នាំនេះ ដែលបង្ហាញពីឃ្លាំងអាវុធនុយ ក្លេអ៊ែរនិងកាំជ្រួចមីស៊ីលរបស់ខ្លួននោះ។ លោកក៏បានសម្តែងនូវការរកាំចិត្តដែលក្រុមប្រឹក្សាសន្តិសុខអង្គការសហប្រជាជាតិ មិនបានចាត់វិធានការប្រឆាំងរដ្ឋាភិបាលក្រុងព្យុងយ៉ាងពីព្រោះតែសមាជិកខ្លះ មានលទ្ធភាពក្នុងការបោះឆ្នោតប្រឆាំងនឹងសេចក្តីសម្រេចនេះ។
មានការជជែកដេញដោលយ៉ាងខ្លាំងនៅក្នុងប្រទេសជប៉ុន អំពីការទុកថវិកាដាច់ដោយឡែកចំនួន២ភាគរយសម្រាប់ការចំណាយលើវិស័យការពារប្រទេស។ ពួកអ្នកវិភាគមើលឃើញថា ចំណាត់ការនេះ ជាការប៉ុនប៉ងរបស់រដ្ឋាភិបាលក្រុងតូក្យូចេញពីស្រមោលរបស់សហរដ្ឋអាមេរិក បន្ទាប់ពីមិនបានចំណាយខាងវិស័យយោធាចាប់តាំងពីការបញ្ចប់សង្គ្រាមលោកលើកទី២មក៕
