ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

សាលាក្តី​ខ្មែរក្រហម​ចាប់​សវនាការ​​ឡើងវិញ​នៅសប្តាហ៍​ក្រោយ


ទិដ្ឋភាព​ទូទៅ​នៃ​សាលាក្តី​កាត់​ទោស​មេដឹកនាំ​ខ្មែរ​ក្រហម។
ទិដ្ឋភាព​ទូទៅ​នៃ​សាលាក្តី​កាត់​ទោស​មេដឹកនាំ​ខ្មែរ​ក្រហម។
វ៉ាស៊ីនតោន៖ សាលាក្តី​ខ្មែរក្រហម​គ្រោង​នឹង​បើក​សវនាការ​រយៈពេល​២​សប្តាហ៍ ​ដើម្បី​ធ្វើ​ សេចក្តី​សន្និដ្ឋាន​បញ្ចប់​សំណុំ​រឿង​០០២​ ​វគ្គទី១ ដោយ​ចាប់ពី​ថ្ងៃ​ទី១៦​ដល់​ថ្ងៃ​ទី​៣១ខែ​តុលា ​ដោយ​អនុញ្ញាត​ឲ្យ​មាន​ការ​សួរ​ដេញ​ដោល​ចុងក្រោយ​មុន​នឹង​សម្រេចកំណត់​ទោស​ទណ្ឌ​ដល់​មេ​ដឹកនាំ​របស់​ខ្មែរក្រហម​ពីរ​នាក់​គឺ ​នួន ជា​និង​ ខៀវ សំផន។

នៅ​ក្នុង​សំណុំ​រឿង​០០២​ វគ្គ១​នេះ ​នួន ជា ​បងធំ​ទី២​ និង​ខៀវ សំផន ​អតីត​ប្រមុខ​រដ្ឋ​ខ្មែរ​ក្រហម​ ​ត្រូវជាប់​ចោទពី​បទ​ឧក្រិដ្ឋកម្ម​ប្រឆាំង​មនុស្សជាតិ​ ឬ​ការ​ជម្លៀស​ពលរដ្ឋ​ចេញ​ពីទីក្រុង​ និង​ការ​សម្លាប់​ក្រុម​ទាហាន​លន់ នល់​ក្នុង​ទសវត្សរ៍​១៩៧០។​ នេះ​បើ​តាម​ការ​អះអាង​របស់​មន្ត្រី​សាលាក្តីនេះ​និង​ក្រុមអ្នក​ឃ្លាំមើល។

លោក​នេត ភក្ត្រា​ អ្នក​នាំពាក្យ​សាលាក្តី​បាន​អះអាង​ថា ​ក្នុង​សវនាការ​នេះ​នឹង​មាន​ការសួរ​ដេញ​ដោល ​ការ​ធ្វើ​សេចក្តី​សន្និដ្នាន​ពីក្រុម​មេធាវី​ជនរង​គ្រោះ ​ការ​ស្នើ​សុំ​ដាក់​ទោស​ជនជាប់​ចោទ​ពី​សហ​ព្រះរាជ​អាជ្ញា​ ការទាមទារ​សំណង​ផ្លូវចិត្ត​និង​សំណង​សមូហភាព​ពីជន​រងគ្រោះ​ ហើយនឹង​ការឆ្លើយ​បំភ្លឺ​របស់​ជន​ជាប់ចោទ​ទាំង​ពីរ​ជាដើម។​

លោក​និយាយថា៖​ «ការធ្វើ​សេចក្តី​សន្និដ្ឋាន​បិទ​បញ្ចប់​នេះ​គឺបន្ទាប់​ពីអង្គ​ជំនុំ​ជម្រះនៃ​តុលាការ​សាលា​ដំបូង​ហ្នឹង​បាន​បើក​សវនាការ​លើ​អង្គ​សេចក្តី​ចំនួន​២១០​ថ្ងៃ​ ហើយ​មាន​ការ​ស្តាប់ ​ការ​ផ្តល់​សក្ខីកម្ម​អ្នក​ជំនាញ​និង​ដើម​បណ្តឹង​រដ្ឋប្បវេណី​ចំនួន​៩២​រូប​ បន្ថែមពី​អ្វី​ដែលជា​ភស្តុតាង ក៏ដូចជា​ឯកសារ​ផ្សេងៗ​រាប់ម៉ឺន​ទំព័រ​នៅ​ក្នុង​សំណុំ​រឿងនេះ»។​

ទោះជា​គេមិន​ទាន់​ដឹង ថា​តើ​នួន ជា​ និង​ខៀវ សំផន​នឹងទទួល​ទោស​ចំពោះ​ការ ជម្លៀស​ពលរដ្ឋ​ ធ្វើឲ្យ​មានការ​បែកបាក់​ព្រាត់ប្រាស់​ ស្លាប់​ និង​រងទុក្ខ​វេទនា​គ្រប់ បែប​យ៉ាង​ឬយ៉ាងណាក៏ដោយ​ ​តែ​ជនជាប់​ចោទ​ទាំងពីរ​ធ្លាប់​បង្ហាញ​ការសោក​ស្តាយ​និង​សុំទោស​ដល់ជន​រងគ្រោះ​ផង​ដែរ​កន្លង​ទៅ។​ សាលាក្តី​គ្រោង​នឹង​ចេញ​សាលក្រម​សំណុំ​រឿង​០០២​ វគ្គ១​ នេះ​នៅ​ពាក់​កណ្តាល​ឆ្នាំ​២០១៤​ មុនចាប់​ផ្តើម​បន្ត​កាត់​ទោស​វគ្គ​សំខាន់​ឯទៀត​ដល់​បទឧក្រិដ្ឋ​កម្ម​ឃោរឃៅ​គឺ​ឧក្រិដ្ឋកម្ម​ប្រល័យ​ពូជ​សាសន៍​ ឧក្រិដ្ឋកម្ម​សង្គ្រាម ​ដែល​គេមិន​ច្បាស់​ថា ​អាច​ដំណើរ​ការបាន​ឬ​យ៉ាង​ណា​នោះ។​

លោក​ឡុង បញ្ញាវុធ​ មន្ត្រី​គម្រោងផ្តួចផ្តើម​យុត្តិធម៌​នៅ​កម្ពុជា​ បាន​ដាក់​មន្ទិល​ សង្ស័យ​ខ្លះ​ចំពោះ​ការ​ចេញ​សាលក្រម​នៅពាក់​កណ្តាល​ឆ្នាំ​២០១៤​នេះ​និង​មាន​ក្តី​ព្រួយ​បារម្ភ​ពីកង្វះ​ថវិកានិង​ឆន្ទៈ​នយោបាយ​ដែល​អាច​ជា​ឧបសគ្គ​ចំពោះ​ការ​បញ្ចប់​សំណុំ​រឿង​ទាំង​នេះ។​

«យើង​ពិបាក​ថា​ ដោយ​សារថា ​ទី១​ឆន្ទៈ​នយោបាយ។ ​តើរដ្ឋាភិបាល​និង​អ.ស.ប.​មូលមាត់​គ្នា​នៅ​ក្នុង​ការ​កាត់​បន្ត​ដែរ​ឬ​អត់។​ ទី២​គឺរឿង​ថវិកាតែម្តង។ ​ហើយទី៣​គឺ​រឿង​បញ្ហា​សុខភាព​របស់​ជនជាប់​ចោទ»។​

ទោះជា​យ៉ាងណា​ក៏ដោយ​ លោក​នេត ភក្ត្រា​បាន​អះអាង​ថា ​បញ្ហា​ថវិកាហាក់​ដូច ជា​មានការ​ធានា​មួយ​ជំហាន​ធំ​សម្រាប់​ភាគី​ជាតិ​ក្នុង​ឆ្នាំ​២០១៣​នេះ​ ដោយសារ​តែ មាន​ជំនួប​រវាង​លោក​នាយក​រដ្ឋមន្ត្រី​ហ៊ុន សែន ​និង​លោក​បាន គីម៊ូន ​អគ្គ លេខាធិការ​អ.ស.ប.​នៅ​ក្រៅកិច្ច​ប្រជុំ​កំពូល​អាស៊ាន​ក្នុង​ប្រទេស​ប្រ៊ុយណេ​ ប៉ុន្មាន​ ថ្ងៃ​នេះ។​ លោក​ថ្លែង​ថា​ ភាគី​កម្ពុជា​បាន​សន្យា​ផ្តល់​ថវិកាបដិភាគ​១​លាន​៨​សែន​ ដុល្លារ​ទៀត​ ក្រៅពី​អំពាវនាវ​ឲ្យប្រទេស​នានា​ ដូចជា​ស.រ.អា.​ ដើម្បី​បន្ត​ជួយ​ដល់ តុលាការ​នេះ។ ​ក្រោយពី ជំនួប​រវាង​លោក​នាយក​រដ្ឋមន្ត្រី​ហ៊ុន សែន ​និង​លោក​បាន គីមូន ​មន្ត្រី​អ.ស.ប.​បាន​ចេញ​សេចក្តី​ប្រកាស​ជា​សង្ខេប​មួយ​ថា ​អគ្គលេខា ធិការ​អ.ស.ប.​សម្តែងនូវ​ការ​រំពឹង​ថា ​ភាគី​នានា​នឹង​គោរព​តាម​កាតព្វកិច្ច​ក្នុងការ​ផ្តល់​ថវិការបស់​ខ្លួន​ដល់​សាលាក្តី​ខ្មែរក្រហម។​

ក្រុមមន្ត្រី​សាលាក្តី​និង​អ្នក​ឃ្លាំមើល​បាន​អះអាង​ថា​ សាលក្រម​សំណុំ​រឿង​០០២​វគ្គ១​នេះ​ អាចនឹង​ជា​ជំហាន​វិជ្ជមាន​មួយទៀត​នៃសាលាក្តី ​ដែល​មាន​ឧបសគ្គ​ច្រើន​នោះ។​

សាលាក្តី​កាត់ទោស​ខ្មែរក្រហម​ប្រឈមមុខ​នឹង​បាតុកម្ម​ពីបុគ្គលិក​ជាតិជា​ច្រើន​ លើក ​ប៉ុន្មាន​ខែចុង​ក្រោយនេះ​ ហើយ​ធ្វើ​ឲ្យ​យឺត​ដល់ដំណើរ​ការកាត់​ទោស​ដោយសារ​សាលាក្តី​នេះ​គ្មាន​ថវិកា ឬ​ក្រុមម្ចាស់​ជំនួយ​មិន​បាន​ផ្តល់ថវិកាបន្ថែម​ នៅ​ពេលគេ​បរាជ័យ​ក្នុងការទាមទារ​ឲ្យភាគី​កម្ពុជា​ផ្តល់​ថវិកាបដិភាគ​របស់​ខ្លួន៕
XS
SM
MD
LG