ការបង្កើតវិទ្យាស្ថានស្លឹករឹតកម្ពុជាជាគម្រោងមួយរបស់មជ្ឈមណ្ឌលឯកសារកម្ពុជា។ វិទ្យាស្ថាននេះ មានគោលបំណងបង្កើនការយល់ដឹងអំពីអំពើប្រល័យពូជសាសន៍និងជាគោលដៅសម្រាប់ផ្តល់ការអប់រំដើម្បីរារាំងមិនឲ្យមានអំពើប្រល័យពូជសាសន៍នេះកើតឡើងជាថ្មីទៀត។ កាលពីដើមឆ្នាំ២០១៧នេះ មជ្ឈមណ្ឌលឯកសារមួយនេះបានចាប់ផ្តើមបង្កើតទំព័រហ្វេសប៊ុក ដើម្បីទទួលយោបល់ពីការរចនាវិទ្យាស្ថានស្លឹករឹត។
ប្រធានមជ្ឈមណ្ឌលឯកសារកម្ពុជា (DC-Cam) គឺលោកឆាំង យុ អាយុ៥៧ឆ្នាំ មិនប្រើប្រាស់ប្រព័ន្ធសង្គមហ្វេសប៊ុកនោះទេ ដោយសារកិច្ចការរវល់ប្រចាំថ្ងៃរបស់លោក។ ទោះជាយ៉ាងណា កាលពីខែមករា ឆ្នាំ២០១៧នេះ ក្នុងនាមជាប្រធានមជ្ឈមណ្ឌលដែលតែងតែប្រមូលឯកសារទាក់ទងនឹងខ្មែរក្រហម លោកបានសម្រេចបង្កើតទំព័រហ្វេសប៊ុកចំនួនពីរ ក្នុងនោះមួយសម្រាប់វិទ្យាស្ថានស្លឹករឹត និងមួយទៀតសម្រាប់វេបសាយស្តីពីប្រវត្តិខ្មែរក្រហម ដើម្បីបង្កើនការផ្សព្វផ្សាយនិងទទួលយោបល់ពីអ្នកប្រើប្រាស់បណ្តាញសង្គមហ្វេសប៊ុក។
លោកឆាំង យុ ដែលបានចំណាយពេលជាង៣០ឆ្នាំមកហើយក្នុងការស្រាវជ្រាវឯកសារទាក់ទងនឹងខ្មែរក្រហម មានប្រសាសន៍ថា បីបួនឆ្នាំចុងក្រោយនេះ លោកបានកត់សម្គាល់ថា អ្នកប្រើប្រាស់បណ្តាញសង្គមហ្វេសប៊ុកមានការពិចារណាច្រើនជាងមុនក្នុងការប្រើប្រាស់ប្រព័ន្ធសង្គមដែលកំពុងពេញនិយមមួយនេះ។ លោកបញ្ជាក់ថា៖
«ជាទូទៅ គំហុកនៃបច្ចេកវិទ្យានេះ ពីដំបូងឡើយផ្តល់អវិជ្ជមានជាងវិជ្ជមាន ហើយស្រុកយើងទទួលនូវគំហុកនៃបច្ចេកវិទ្យានេះធ្ងន់ធ្ងរមែន»។
លោកបន្ថែមថា៖
«ខ្ញុំឃើញមានការប្រើប្រាស់បែបវិជ្ជមានច្រើននៅលើបណ្តាញសង្គមហ្វេសប៊ុក ខុសពីមុន»។
លោកឆាំង យុមានប្រសាសន៍ថា៖
«កិច្ចការរបស់យើងនេះផ្តោតសំខាន់ទៅលើកិច្ចការស្រាវជ្រាវ ការអាន ការពិចារណា ការធ្វើការវិនិច្ឆ័យទៅលើឯកសារដើម ឬឯកសារប្រវត្តិសាស្រ្ត ហើយជាទូទៅត្រូវការពេលសញ្ចឹងគិត ត្រូវការពេលត្រិះរិះ ដើម្បីយកមកសរសេរ យកមកវិភាគ យកមកបង្រៀនកូនក្មេង អីចឹងហើយហ្វេសប៊ុកវាអត់មានតួនាទីនៅក្នុងកិច្ចការរបស់យើង»។
ការបង្កើតវិទ្យាស្ថានស្លឹករឹតកម្ពុជាជាគម្រោងមួយរបស់មជ្ឈមណ្ឌលឯកសារកម្ពុជា។ វិទ្យាស្ថាននេះគម្រោងនឹងចំណាយទឹកប្រាក់ប្រមាណ៥០លានដុល្លារអាមេរិកសម្រាប់ការសាងសង់ និងមានគោលបំណងបង្កើនការយល់ដឹងអំពីអំពើប្រល័យពូជសាសន៍និងជាគោលដៅសម្រាប់ផ្តល់ការអប់រំដើម្បីរារាំងមិនឲ្យមានអំពើប្រល័យពូជសាសន៍នេះកើតឡើងជាថ្មីទៀត។
លោក ឆាំង យុ មានប្រសាសន៍ថា មជ្ឈមណ្ឌលរបស់លោកនឹងប្រើប្រាស់ហ្វេសប៊ុកនេះ ដើម្បីទទួលការផ្តល់យោបល់ពីសាធារណជនអំពីការរចនាវិទ្យាស្ថាននេះ។ លោកបន្ថែមថា ចំណែកទំព័រហ្វេសប៊ុករបស់វេបសាយស្តីអំពីប្រវត្តិសាស្រ្តខ្មែរក្រហម (www.khmerrougehistory.org )នឹងក្លាយជាកន្លែងផ្សព្វផ្សាយពីវេបសាយ។
ក្រោយពីត្រូវបានបង្កើតឡើងកាលពីខែកុម្ភៈ ឆ្នាំ២០០៤ ហ្វេសប៊ុកបានទទួលការប្រើប្រាស់ជាច្រើន ជាពិសេសក្នុងចំណោមយុវជន ដោយមានការកើនឡើងរហូតដល់ជាង១៨០០លាននាក់នៅឆ្នាំ២០១៦។ ចំណែកនៅកម្ពុជា អ្នកប្រើប្រាស់ប្រព័ន្ធសង្គមហ្វេសប៊ុកមានដល់ទៅប្រមាណ៤លាននាក់ ហើយភាគច្រើនជាយុវជន។
គុណវិបត្តិនៃការប្រើប្រាស់ប្រព័ន្ធសង្គមមួយនេះត្រូវបានគេលើកឡើង ដោយបង្ហាញក្តីបារម្ភថា វាអាចមានការប្រើប្រាស់មិនផ្តល់ប្រយោជន៍ និងប៉ះពាល់ដល់ការសិក្សានិងការងារ។ មានការអប់រំជាបន្តបន្ទាប់ទៅលើការប្រើប្រាស់ប្រព័ន្ធសង្គមមួយនេះ ដោយធ្វើយ៉ាងម៉េចឲ្យមានការប្រើប្រាស់ប្រកបដោយក្រមសីលធម៌ និងការទទួលខុសត្រូវ ក្នុងនោះមានការបង្ហោះរូបភាពសាហាវៗ ឈាមច្រើន ការចែករំលែកព័ត៌មានមិនពិត រូបភាព និងវីដេអូអាសអាភាស ការវាយប្រហារ ជេរ ប្រមាថគ្នានិងប្រើពាក្យសម្តីអសុរោះជាដើម។
នាង កែវ គូនីឡា អ្នកប្រឹក្សាផ្នែកប្រព័ន្ធផ្សព្វផ្សាយនិងជាអ្នកគ្រប់គ្រងក្រុមហ៊ុន Digital Marketing និយាយថា នាងបានឃើញការប្រើប្រាស់កាន់តែប្រសើរឡើងនៅលើប្រព័ន្ធសង្គមហ្វេសប៊ុក ក្នុងនោះមានការប្រើប្រាស់ប្រកបដោយក្រមសីលធម៌ ការគោរពសិទ្ធិឯកជន និងការប្រើប្រាស់ដោយការទទួលខុសត្រូវ។ នាងស្នើឲ្យមានការប្រើប្រាស់ទំព័រហ្វេសប៊ុក ដើម្បីទទួលបានការផ្តល់យោបល់ពីអ្នកប្រើប្រាស់។
នាងនិយាយថា៖
«ទាំងខាងក្រុមហ៊ុនឯកជន ទាំងខាងអង្គការក្រៅរដ្ឋាភិបាល ក៏ដូចជាស្ថាប័នរបស់រដ្ឋហ្នឹង គួរតែបន្តការប្រើប្រាស់ហ្វេសប៊ុក ហើយនិងប្រព័ន្ធសង្គមផ្សេងៗទៀត ដើម្បីទទួលបានមតិយោបល់ពីប្រជាពលរដ្ឋ អ្នកប្រើប្រាស់ផ្សេងៗ និងការរិះគន់បែបស្ថាបនាផ្សេងៗពីប្រជាពលរដ្ឋ ពីអ្នកប្រើប្រាស់ ដើម្បីធ្វើឲ្យទំនាក់ទំនងកាន់តែប្រសើរជាងមុន»។
សារព័ត៌មានជាច្រើនបានប្រើប្រាស់ប្រព័ន្ធសង្គមហ្វេសប៊ុកនិងប្រព័ន្ធសង្គមផ្សេងទៀត ដើម្បីប្រមូលការចុច Like លើទំព័រហ្វេសប៊ុកឲ្យបានច្រើន និងចែករំលែកព័ត៌មានប្រចាំថ្ងៃរបស់ពួកគេ។ ចំណែកអ្នកសារព័ត៌មានវិញបានប្រើប្រាស់ហ្វេសប៊ុកនេះជាប្រចាំថ្ងៃនិងស្ទើរតែរាល់ពេល ដើម្បីទទួលបានព័ត៌មានពីអ្នកនយោបាយ។
លោកនាយករដ្ឋមន្រ្តីហ៊ុន សែនបានចាប់ផ្តើមប្រើប្រាស់ហ្វេសប៊ុកជាផ្លូវការ ក្រោយការបោះឆ្នោតឆ្នាំ២០១៣។ រហូតមកដល់ពេលនេះ លោកបានទទួលការចុច Like លើហ្វេសប៊ុករបស់លោករហូតទៅដល់ជាង៦លាន៨សែននាក់។ ចំណែកគូប្រកួតនយោបាយរបស់លោកគឺលោកសម រង្ស៊ី ប្រធានគណបក្សសង្រ្គោះជាតិ មានអ្នកចុច Like ដល់ទៅជាង៣លាន៦សែននាក់។
កាលពីខែធ្នូ ឆ្នាំ២០១៦ លោកហ៊ុន សែនបានថ្លែងថា លោកចង់ឲ្យមន្រ្តីក្រោមឱវាទរបស់លោក ម្នាក់ៗក្លាយជាមនុស្សអេឡិចត្រូនិក (E-people) បន្ថែមលើរដ្ឋាភិបាលអេឡិចត្រូនិក (E-government)។
ការសិក្សារបស់មូលនិធិអាស៊ី Asia Foundation ដែលត្រូវបានផ្សព្វផ្សាយកាលពីចុងឆ្នាំ២០១៦ បង្ហាញថា ការប្រើប្រាស់អ៊ីនធើណែត ជាពិសេសហ្វេសប៊ុកដើម្បីទទួលបានព័ត៌មាន មកដល់ពេលនេះគឺលើសពីការមើលទូរទស្សន៍។
លោក នាន់ សិរីបុត្ត អាយុ២៧ឆ្នាំ ដែលបានប្រើប្រាស់ហ្វេសប៊ុកជាង៥ឆ្នាំមកហើយនិងសកម្មក្នុងការចែករំលែកព័ត៌មាននយោបាយ មានប្រសាសន៍ថាហ្វេសប៊ុកបច្ចុប្បន្ននេះភ្ជាប់ទំនាក់ទំនងរវាងអ្នកនយោបាយនិងអ្នកគាំទ្រ។ លោកបញ្ជាក់ថា៖
«ហ្វេសប៊ុកបានផ្តល់នូវលំហដ៏ធំមួយសម្រាប់អ្នកនយោបាយផ្តល់សាររបស់ពួកគេទៅអ្នកគាំទ្រ»។
លោកបានស្នើឲ្យមានការប្រុងប្រយ័តុ្នចំពោះការចែករំលែកព័ត៌មានមិនពិត ការប្រើពាក្យជេរប្រមាថ និងការវាយប្រហារគ្នាតាមហ្វេសប៊ុក។ លោកមានប្រសាសន៍ថា៖
«មួយចំណុចទៀតគឺមនុស្សជេរគ្នាទៅវិញទៅមក ប្រើប្រាស់ពាក្យអាក្រក់ ដែលជាការបរិហារកេរ្តិ៍គ្នាទៅវិញទៅមក។ វាមានឥទ្ធិពលធំទៅលើសីលធម៌និងកេរ្តិ៍ឈ្មោះនៅក្នុងសង្គម»។
លោកឆាំង យុបានបង្ហាញក្តីបារម្ភទៅលើឥទ្ធិពលនៃហ្វេសប៊ុកទៅលើយុវវ័យ ដោយលោកណែនាំឲ្យឪពុកម្តាយមានការប្រុងប្រយ័ត្នចំពោះកូនដែលប្រើប្រាស់បណ្តាញសង្គមហ្វេសប៊ុកពេលអាយុកូនៗរបស់ពួកគេនៅក្មេង។ លោកបញ្ជាក់ថា៖
«អីចឹងទេនេះជាកាតព្វកិច្ចរបស់ឪពុកម្តាយក្នុងការអប់រំកូនពេលប្រើប្រាស់ហ្វេសប៊ុក»។
ទោះជាយ៉ាងណាក៏ដោយ លោកឆាំង យុសង្ឃឹមថា នឹងមានការប្រើប្រាស់ហ្វេសប៊ុកដោយវិជ្ជមានច្រើននៅពេលខាងមុខ៕
