ឯកសារដែលទាក់ទងនឹងរបបកាប់សម្លាប់របស់ពួកកុម្មុយនិស្តខ្មែរក្រហមជិត១លានទំព័រ រួមទាំងឯកសារជាសំឡេង និងវីដេអូក្នុងអំឡុងពេលកាត់ទោសនៃអតីតមេដឹកនាំជាន់ខ្ពស់និងអ្នកទទួលខុសត្រូវជាន់ខ្ពស់ខ្មែរក្រហមនឹងត្រូវដាក់ជូនសាធារណជនស្រាវជ្រាវនិងស្វែងយល់ដោយសេរីចាប់ពីពេលនេះតទៅ នៅមជ្ឈមណ្ឌលឯកសារកម្ពុជា។ នេះបើយោងតាមមន្ត្រីផ្លូវការឲ្យដឹងនៅថ្ងៃនេះ។
មជ្ឈមណ្ឌលឯកសារកម្ពុជាគឺជាមជ្ឈមណ្ឌលដែលប្រមូលផ្តុំដោយឯកសារដែលទាក់ទងនឹងរបបកម្ពុជាប្រជាធិបតេយ្យរបស់ពួកខ្មែរក្រហមច្រើនជាងគេបំផុតនៅកម្ពុជា។ មជ្ឈមណ្ឌលនេះបានផ្តល់នូវឯកសារដែលទាក់ទងនឹងអំពើឧក្រិដ្ឋកម្ម និងការគ្រប់គ្រងរបស់ពួកមេដឹកនាំខ្មែរក្រហម រួមទាំងគោលនយោបាយរបស់ពួកគេជាដើម សរុបចំនួនជិត១លានទំព័រទៅដល់សាលាក្តីខ្មែរក្រហម។
លោកវ៉ាន់ថាន់ ពៅតារា នាយករងនៃមជ្ឈមណ្ឌលឯកសារកម្ពុជា បានឲ្យដឹងថា មជ្ឈមណ្ឌលរបស់លោកនឹងដាក់ឯកសារទាំងនេះ និងឯកសារដែលស្រង់បានថ្មីៗពីដំណើរការកាត់ទោសដែលមានជាបីភាសា គឺភាសាបារាំង អង់គ្លេស និងខ្មែរសម្រាប់ការស្រាវជ្រាវរបស់សាធារណជន។
«ឯកសារដែល សាលាក្តីខ្មែរក្រហមស្នើសុំពីមជ្ឈមណ្ឌលឯកសារកម្ពុជាគឺមាននៅទី នេះស្រាប់។ ហើយបន្ថែមពីលើនោះគឺយើងមានឯកសារដែលសាលាក្តីខ្មែរក្រហមផ្សព្វ ផ្សាយជាសាធារណៈតាមរយៈគេហទំព័ររបស់សាលាក្តីខ្មែរក្រហម។ ក្រៅពីនោះ យើងបានទៅយកជាវីដេអូ វិទ្យុនៃសវនាការទាំងអស់ចាប់តាំងពីថ្ងៃដំបូង យកមកទុកនៅមជ្ឈមណ្ឌលឯកសារកម្ពុជាសម្រាប់សាធារណជន អ្នកស្រាវជ្រាវអាចប្រើប្រាស់បាន»។
យោងតាមសេចក្តីប្រកាសព័ត៌មានរបស់មជ្ឈមណ្ឌលឯកសារកម្ពុជាឲ្យដឹងថា សាធារណជនអាចធ្វើការសិក្សាស្រាវជ្រាវ និងស្វែងយល់អំពីរបបខ្មែរក្រហម និងអំពីដំណើរការកាត់ទោសខ្មែរក្រហមក្នុងម៉ោង និងថ្ងៃធ្វើការចាប់ពីថ្ងៃច័ន្ទដល់ថ្ងៃសុក្រ។
លោកវ៉ាន់ថាន់ ពៅតារាបញ្ជាក់បន្ថែមថា ការដាក់ឯកសារទាំងនេះសម្រាប់ការស្រាវជ្រាវនឹងជួយគាំទ្រដល់ផ្នែកយុត្តិធម៌ដល់ជនរងគ្រោះ។
«ក្រៅពីប្រយោជន៍យុត្តិធម៌ដែលជនរងគ្រោះទទួលបានគឺមានប្រយោជន៍ផ្សេងៗទៀត ដូចជាការចង់ដឹងអំពីព័ត៌មានលម្អិត អំពីសាលាក្តីខ្មែរក្រហម អំពីដំណើរការស្វែងរកយុត្តិធម៌ និងជួយដល់សង្គមទាក់ទងនឹងការកសាងនីតិរដ្ឋនៅក្នុងសង្គមកម្ពុជា»។
របបកម្ពុជាប្រជាធិបតេយ្យរបស់ពួកខ្មែរក្រហមបានបង្កឲ្យប្រជាពលរដ្ឋខ្មែរស្លាប់យ៉ាងតិច១,៧លាននាក់ចន្លោះពីខែមេសាឆ្នាំ១៩៧៥ដល់ថ្ងៃទី៧មករាឆ្នាំ១៩៧៩។ ជងរងគ្រោះទាំងនេះស្លាប់ដោយសារការបង្អត់អាហារ ដោយសារការធ្វើការដោយបង្ខំ ដោយសារការធ្វើទារុណកម្ម និងសា្លប់ដោយសារការយកទៅសម្លាប់ចោលដោយមិនមានការកាត់ទោសតាមច្បាប់នោះទេ។
មេដឹកនាំជាន់ខ្ពស់ខ្មែរក្រហមចំនួនបួននាក់ត្រូវចាប់ខ្លួនយកមកកាត់ទោសចំពោះការទទួលខុសត្រូវរបស់ពួកគេ។ ក្នុងនោះអៀង សារី អតីតរដ្ឋមន្ត្រីការបរទេសបានស្លាប់នៅពេលកំពុងកាត់ទោស។ ប្រពន្ធរបស់គាត់អៀង ធីរិទ្ធ អតីតរដ្ឋមន្ត្រីក្រសួងសង្គមកិច្ចត្រូវដោះលែងឲ្យនៅក្រៅឃុំដោយសារជំងឺវង្វេងវង្វាន់បាត់ការចងចាំ។ ដោយឡែកនួន ជា អតីតប្រធានសភាខ្មែរក្រហមនិងជាបងធំទី២បន្ទាប់ពីប៉ុល ពត និងខៀវ សំផន អតីតប្រមុខរដ្ឋ ខ្មែរក្រហមកំពុងស្ថិតក្រោមការវិនិច្ឆ័យទោស។
កាលពីខែសីហា អង្គជំនុំជម្រះសាលាដំបូងបានផ្តន្ទាទោសជនជាប់ចោទទាំងពីរឲ្យជាប់ពន្ធនាគារអស់មួយជីវិត ប៉ុន្តែជនជាប់ចោទបានប្តឹងទាស់នឹងការសម្រេចក្តីនេះ។
ក្រៅពីនោះកាំង ហ្គិចអ៊ាវ ហៅឌុច អតីតប្រធានគុកទួលស្លែង ឬមន្ទីរសន្តិសុខស-២១ ត្រូវផ្តន្ទាទោសឲ្យជាប់គុកអស់មួយជីវិត។
សាលាក្តីខ្មែរក្រហមកំពុងស្វែងរកជនជាប់សង្ស័យចំនួន៥នាក់ផ្សេងទៀតយកមកកាត់ទោស ប៉ុន្តែសំណុំរឿង០០៣និង០០៤សម្រាប់ជនសង្ស័យទាំងប្រាំនាក់មិនទទួលបានការគាំទ្រពីភាគីរដ្ឋាភិបាលកម្ពុជានោះទេ។
លោកនេត្រ ភក្ត្រា អ្នកនាំពាក្យសាលាក្តីខ្មែរក្រហមបានស្វាគមន៍គម្រោងការរបស់មជ្ឈមណ្ឌលឯកសារកម្ពុជា។
«ខាងសង្គមស៊ីវិលធ្វើក៏ដើម្បីផលប្រយោជន៍យុត្តិធម៌ ហើយខាងសាលាក្តីខ្មែរក្រហមកំពុងធ្វើនេះក៏បម្រើឲ្យផលប្រយោជន៍យុត្តិធម៌ផងដែរ។ ហើយភាគីទាំងអស់គ្នាគឺត្រូវចូលរួមកសាងនូវក្នុងការចងចាំមួយសម្រាប់ប្រជាជនកម្ពុជា និងមនុស្សជាតិទាំងមូល»។
លោកនេត្រ ភក្ត្រាបញ្ជាក់ថា សាលាក្តីខ្មែរក្រហមក៏មានផែនការកសាងមជ្ឈមណ្ឌលតុលាការមួយដើម្បីបម្រើដល់ការសិក្សា និងស្រាវជ្រាវ ក្រោយពីតុលាការដែលគាំទ្រដោយអង្គការសហប្រជាជាតិនេះ បញ្ចប់បេសកកម្មរបស់ខ្លួន៕
