ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

សាលាក្តី​ខ្មែរក្រហម​បើក​សវនាការ​​ពិនិត្យ​ឯកសារ​ភស្តុតាង


ទេសចរ​មួយ​រូប​ទស្សនា​សារមន្ទីរ​ប្រល័យ​ពូជសាសន៍​ទួលស្លែង​នៅ​រាជធានី​ភ្នំពេញ​កាល​ពី​ថ្ងៃ​ទី​៣ ខែ​មីនា ឆ្នាំ​២០១៥​ ខណៈ​ដែល​សាលាក្តី​ខ្មែរ​ក្រហម​ដែល​គាំទ្រ​ដោយ​អង្គការ​សហប្រជាជាតិ​កំពុង​ដំណើរការ​កាត់​ទោស​អតីត​មេដឹកនាំ​ខ្មែរ​ក្រហម​ពីរ​រូប។ សារមន្ទីរ​ទួលស្លែង​ត្រូវ​គេ​ធ្លាប់​ស្គាល់​ថា​ជា​​មន្ទីរ​ស-២១​ ​អំឡុង​សម័យ​ខ្មែរក្រហម ដែល​របប​នេះ​ត្រូវ​គេ​គិត​​ថា​បាន​សម្លាប់​ពលរដ្ឋ​កម្ពុជា​ប្រមាណ​១,៨​លាន​នាក់​ពី​ឆ្នាំ​១៩៧៥​ដល់​១៩៧៩។ REUTERS/Samrang Pring
ទេសចរ​មួយ​រូប​ទស្សនា​សារមន្ទីរ​ប្រល័យ​ពូជសាសន៍​ទួលស្លែង​នៅ​រាជធានី​ភ្នំពេញ​កាល​ពី​ថ្ងៃ​ទី​៣ ខែ​មីនា ឆ្នាំ​២០១៥​ ខណៈ​ដែល​សាលាក្តី​ខ្មែរ​ក្រហម​ដែល​គាំទ្រ​ដោយ​អង្គការ​សហប្រជាជាតិ​កំពុង​ដំណើរការ​កាត់​ទោស​អតីត​មេដឹកនាំ​ខ្មែរ​ក្រហម​ពីរ​រូប។ សារមន្ទីរ​ទួលស្លែង​ត្រូវ​គេ​ធ្លាប់​ស្គាល់​ថា​ជា​​មន្ទីរ​ស-២១​ ​អំឡុង​សម័យ​ខ្មែរក្រហម ដែល​របប​នេះ​ត្រូវ​គេ​គិត​​ថា​បាន​សម្លាប់​ពលរដ្ឋ​កម្ពុជា​ប្រមាណ​១,៨​លាន​នាក់​ពី​ឆ្នាំ​១៩៧៥​ដល់​១៩៧៩។ REUTERS/Samrang Pring

ក្រុម​សហ​ព្រះ​រាជអាជ្ញាបាន​បង្ហាញ​ឯក​សារ​ភស្តុតាង​ជាច្រើន​នៅ​ថ្ងៃ​ច័ន្ទនេះ​ដែល​បញ្ជាក់​អំពី​អំពើ​ប្រល័យ​ពូជ​សាសន៍​ទាក់​ទង​ទៅ​នឹងអំពីការ​កាប់​សម្លាប់​ពល​រដ្ឋ​ខ្មែរ​កម្ពុជាក្រោម ​រួម​ទាំង​ការ​បោស​សម្អាតមន្ត្រី​រដ្ឋការ​នៃ​របប​ លន់ នល់។​

លោក សេង ប៊ុនឃាង​ តំណាង​សហព្រះ​រាជ​អាជ្ញាជាតិ​លើក​ពី​ឯក​សារ​ដែល​ខ្មែរក្រហម​បាន​ស្រង់​បញ្ជី​ឈ្មោះ​ប្រជា​ពល​រដ្ឋ​ខ្មែរ​កម្ពុជា​ក្រោម​នៅ​តាម​ឃុំ​នានា​នៃ​ស្រុក​ត្រាំកក់​ ខេត្ត​តាកែវ ​ហើយ​ពួក​គេ​មួយ​ចំនួន​ត្រូវ​សម្លាប់​ចោល។​

«ឯកសារ​បាន​បង្ហាញ​ថា ​មាន​អ្វី​កើត​ឡើង​ចំពោះ​ប្រជាជន​ខ្មែរ​កម្ពុជាក្រោមនៅ​ឃុំ​សំរោង។ ​ឯកសារ​នេះ​ចុះ​ថ្ងៃ​ទី​១៣​ ខែ​ឧសភា ​ឆ្នាំ​១៩៧៧។‍»​

បញ្ជី​ឈ្មោះ​រាយការណ៍​ទៅ​អង្គការ​អំពី​ប្រជាជន​ថ្មី​នេះ​មាន​ឈ្មោះ​ថា ​វុត វីន​ ដែល​ធ្លាប់​បាន​ប្រាប់​ស្ត្រី​ខ្មែរ​កម្ពុជា​ក្រោម​ម្នាក់​រស់​នៅ​ភូមិ​តាភឹម​ថា ​រាល់​ខ្មែរ​កម្ពុជា​ក្រោម​ត្រូវ​បាន​អង្គការ​យក​ទៅ​អស់​ហើយ ​គ្មាន​សល់​មួយ​ទេ ​នៅ​ឃុំ​សំរោង។​ ​នៅ​តែ​ឃុំ​តាភឹម​មិន​ទាន់​យក។​ ថ្ងៃ​ក្រោយ​អង្គការ​គង់​តែ​យក​ទេ»។​

ការ​យក​នេះ​មាន​ន័យ​ថា ​ចាប់​ខ្លួន​ ឬ​យក​ទៅ​សម្លាប់​ចោល។​

ការ​បង្ហាញ​ឯកសារ​ភស្តុតាង​នេះ​ធ្វើ​ឡើង​នៅ​ក្នុង​ការ​កាត់​ទោស​សំណុំ​រឿង​០០២​វគ្គ​ទី​២ ​ដែល​មាន​ជន​ជាប់​ចោទ​នួន ជា​ អតីត​ប្រធាន​សភា​ខ្មែរ​ក្រហម​និង​ ខៀវ សំផន ​អតីត​ប្រមុខ​រដ្ឋ​ខ្មែរក្រហម។ ​ជន​ជាប់​ចោទ​ទាំង​ពីរ​ត្រូវ​ផ្តន្ទា​ទោស​ឲ្យ​ជាប់​គុក​អស់​មួយ​ជីវិត​ម្ដង​ហើយ​ កាល​ពី​ការ​កាត់​ទោស​សំណុំ​រឿង​០០២ ​វគ្គ​ទី១។​

តំណាង​សហ​ព្រះរាជ​អាជ្ញាអន្តរជាតិ​ លោក​ ដេល ឡៃសាក់​ បាន​ថ្លែង​តាម​រយៈ​អ្នក​បក​ប្រែ​ភាសា​ថា ​ពួក​ខ្មែរក្រហម​បាន​បោក​ប្រាស់​អតីត​ទាហាន​ និង​មន្ត្រី​នៃ​របប​សាធារណរដ្ឋ​របស់​លោក​សេនា​ប្រមុខ​លន់ នល់​ ឲ្យ​ចូល​បម្រើ​ការងារ​វិញ ​ក្រោយ​ពី​ពួក​ខ្មែរក្រហម​ឡើង​កាន់​អំណាច។​ ប៉ុន្តែ​ក្រោយ​មក​ទាហាន​ និង​អតីត​មន្ត្រី​ទាំង​នោះ​ត្រូវ​សម្លាប់​ចោល​ក្នុង​មន្ទីរ​ឃុំឃាំង​ក្នុង​វត្ត​អារ៉ាម ​ឬ​ត្រូវ​បាញ់​សម្លាប់​ចោល​ក្នុង​ព្រៃ។​

«ភាគ​ច្រើន​ក្នុង​ចំណោម​អ្នក​ដែល​ត្រូវ​គេ​ចាប់​ខ្លួន​នៅ​ពាក់​កណ្តាល​ឆ្នាំ​១៩៧៥​ និង​១៩៧៦​គឺ​ជា​ទាហាន​ និង​ប៉ូលិស​លន់ នល់។​ ក្រោយ​ឆ្នាំ​១៩៧៦ក្រុម​នេះ​បាន​ពង្រីក​ការ​ចាប់​ខ្លួន​នេះ​ដល់​ប្រជាជន​ជា​ទូទៅ។​ ​ប្រជាជន​ជា​ច្រើន​ដែល​ត្រូវ​បាន​សម្ភាសក្នុង​ការ​ស្រាវជ្រាវ​នេះ​បាន​ឃើញ​ការ​ចាប់​ខ្លួន​និង​ការ​សម្លាប់​ទាហាន ​និង​នគរបាល ​លន់ នល់ ​នៅ​ពាក់​កណ្ដាល​ឆ្នាំ​១៩៧៥»។​

របប​កម្ពុជា​ប្រជាធិបតេយ្យ​របស់​ខ្មែរ​ក្រហម​បាន​បង្ក​ឲ្យ​ប្រជា​ពល​រដ្ឋ​កម្ពុជា​ស្លាប់​អស់​យ៉ាង​តិច​១​លាន៧​សែន​នាក់​ ​ចន្លោះ​ពី​ខែ​មេសាឆ្នាំ​១៩៧៥​ដល់​ខែ​មករា​ ឆ្នាំ​១៩៧៩។ ពល​រដ្ឋ​ខ្មែរ​មួយ​ចំនួន​ត្រូវ​យក​ទៅ​សម្លាប់​ចោល ​ពល​រដ្ឋ​មួយ​ចំនួន​ទៀត​ត្រូវ​ចាប់​ខ្លួន​យក​ទៅ​ដាក់​គុក​ដោយ​ចោទ​ថា​ ជា​ខ្មាំង​របស់​អង្គការ​ខ្មែរក្រហម ​ហើយ​ទទួល​រង​ទារុណកម្ម​យ៉ាង​ឃោរឃៅ​មុន​នឹង​ត្រូវ​សម្លាប់​ចោល។​ រីឯ​ពល​រដ្ឋ​មួយ​ចំនួន​ទៀត​បាន​ស្លាប់​ដោយ​ការ​អត់​អាហារ​និង​ការបង្ខំ​ឲ្យ​ធ្វើការ​លើស​កម្លាំង។​

នៅ​ក្នុង​សវនាការ​នៅ​ថ្ងៃ​នេះ​ តំណាង​សហ​ព្រះ​រាជ​អាជ្ញា​ក៏​បានលើក​ឡើង​ថា​ មាន​ការ​ដោះ​ដូរ​ជន​ជាតិ​វៀតណាម​ជា​មួយ​អាជ្ញាធរ​វៀតណាម​និង​មាន​ការ​ចាប់​ខ្លួន​ប្រជា​ពល​រដ្ឋ​ខ្មែរ​ដែល​ប៉ុនប៉ង​រត់​គេច​ខ្លួន​ពី​របប​ខ្មែរក្រហម​ផង​ដែរ។ ​បន្ថែម​ពី​នោះ​ទៀត​ មាន​ការ​ចាប់​ខ្លួន​ប្រជា​ពល​រដ្ឋ​ដែលបាន​ធ្វើ​ឲ្យ​ខូចខាត​សម្ភារៈ​តូច​តាច​ ដូចជា​ស្លាប​ព្រា​ ឬ​ ប្រជាពល​រដ្ឋ​ដែល​ត្អូញ​ត្អែរ​ពី​ការ​ហូបចុក​មិន​គ្រប់​គ្រាន់​ជាដើម។​

ការ​ចាប់​ខ្លួន​ក្នុង​របប​ខ្មែរក្រហម​ភាគ​ច្រើន​ត្រូវ​យក​ទៅ​ដាក់​ឃុំឃាំង​ ឬ​យក​ទៅ​សម្លាប់​ចោល៕

XS
SM
MD
LG