ការិយាល័យសិទ្ធិមនុស្សអង្គការសហប្រជាជាតិ បានឲ្យដឹងនៅថ្ងៃអង្គារថា សវនាការកាត់ក្តីទាក់ទងនឹងការសម្លាប់លោក Khashoggi ខ្វះតម្លាភាពនិងខ្វះការទទួលខុសត្រូវចំពោះបទឧក្រិដ្ឋ ដែលបានប្រព្រឹត្ត។ នេះបើតាមសេចក្តីរាយការណ៍របស់ទីភ្នាក់ងារព័ត៌មាន Reuters។
សារព័ត៌មានរដ្ឋផ្សាយឲ្យដឹងថា តុលាការក្នុងប្រទេសអារ៉ាប់ប៊ីសាអូឌីត កាលពីថ្ងៃចន្ទ បានកាត់ទោសដាក់ពន្ធនាគារមនុស្សចំនួន ៨ នាក់ ពីចន្លោះ ៧ ទៅ ២០ ឆ្នាំ ពីបទសម្លាប់អ្នកកាសែតជនជាតិអារ៉ាប់ប៊ីសាអូឌីត លោក Jamal Khashoggi ។ សវនាការកាត់ក្តីក្នុងរឿងនេះកើតមានឡើង ៤ ខែ បន្ទាប់ពីគ្រួសាររបស់ជនរងគ្រោះបានផ្តល់សេចក្តីសន្តោសដល់ជនល្មើស ដោយស្នើតុលាការថា ពុំចាំបាច់កាត់ទោសប្រហារជីវិតពួកគេនោះទេ។
អ្នកនាំពាក្យអង្គការសហប្រជាជាតិ លោក Rupert Colville ដែលបញ្ជាក់ថា អង្គការសហប្រជាជាតិប្រឆាំងការកាត់ទោសប្រហារជីវិតនោះ បានថ្លែងនៅក្នុងសន្និសីទសារព័ត៌មានមួយ ក្នុងទីក្រុងហ្សឺណែវ តាមសម្តីដើមថា៖ «នេះជារឿងក្តីដែលខ្វះតម្លាភាពត្រឹមត្រូវក្នុងដំណើរក្តីយុត្តិធម៌។ អ្នកដែលទទួលខុសត្រូវក្នុងរឿងនេះ គួរត្រូវកាត់ទោសឲ្យស័ក្តិសមទៅនឹងបទឧក្រិដ្ឋដែលបានប្រព្រឹត្ត។ ដំណើររឿងក្តីទាំងមូល ខ្វះតម្លាភាពនិងខ្វះការទទួលខុសត្រូវ។
លោក Jamal Khashogi បានបាត់ខ្លួន កាលពីថ្ងៃទី ២ ខែតុលា ឆ្នាំ ២០១៨ នៅពេលដែលលោកបានចូលទៅស្ថានកុងស៊ុល អារ៉ាប៊ីសាអ៊ូឌីត នៅទីក្រុងអ៊ីស្តង់ប៊ុល ប្រទេសតួកគី។ អាជ្ញាធរតួកគីក្រោយមកបានបង្ហាញថា លោកត្រូវបានអ្នកធ្វើឃាតមួយក្រុម សម្លាប់ក្នុងស្ថានកុងស៊ុលនោះ។
សាកសពរបស់លោក មិនទាន់ត្រូវគេរកឃើញនៅឡើយទេ រហូតមកទល់ពេលនេះ៕
