តុលាការមួយនៅក្នុងប្រទេសអារ៉ាប៊ីសាអ៊ូឌីតបានកាត់ទោសប្រហារជីវិតមនុស្ស ៥ នាក់ និងមនុស្ស ៣ នាក់ទៀតឲ្យជាប់ពន្ធនាគារ ពាក់ព័ន្ធនឹងការសម្លាប់អ្នកកាសែតលោក Jamal Khashoggi កាលពីឆ្នាំមុន។
រដ្ឋអាជ្ញាសាធារណៈបានបញ្ជាក់នៅក្នុងសេចក្ដីប្រកាសថា ទោសប្រហារជីវិតនេះគឺសម្រាប់អ្នកណាដែលបានប្រព្រឹត្ត និងចូលរួមដោយផ្ទាល់នៅក្នុងអំពើឃាតកម្មនេះ។ ចំណែកអ្នកដែលត្រូវបានកាត់ទោសជាប់ពន្ធនាគារគឺដោយសារតែ «ពួកគេបានលាក់រឿងអំពើឧក្រិដ្ឋកម្មនេះ»។
ការសម្រេចនៅថ្ងៃចន្ទនេះបានធ្វើឡើង បន្ទាប់ពីមាននីតិវិធីរបស់តុលាការដែលភាគច្រើនបានធ្វើឡើងជាអសាធារណៈ។ សាលក្រមតុលាការបានសម្រេចថា លោក Saud al-Qahtani ដែលជាអតីតទីប្រឹក្សាកំពូលរបស់ព្រះអង្គម្ចាស់រជ្ជទាយាទ Mohammed bin Salman នៃប្រទេសអារ៉ាប៊ីសាអ៊ូឌីត មិនមានការពាក់ព័ន្ធនៅក្នុងអំពើឃាតកម្មលើលោក Khashoggi នេះទេ។
លោក Khashoggi ដែលជាអ្នកសរសេរអត្ថបទសម្រាប់ខ្ទង់ពិសេសនៃកាសែត Washington Post និងជាអ្នករិះគន់ចេញមុខខ្លាំងក្លាលើរដ្ឋាភិបាលអារ៉ាប៊ីសាអ៊ូឌីតត្រូវបានសម្លាប់ និងកាត់ជាបំណែកនៅក្នុងស្ថានកុងស៊ុលអារ៉ាប៊ីសាអ៊ូឌីតក្នុងទីក្រុងអ៊ីស្ដង់ប៊ុល ប្រទេសតួកគីកាលពីខែតុលា ឆ្នាំ ២០១៨។
ប្រទេសអារ៉ាប៊ីសាអ៊ូឌីត ដំបូងបានបដិសេធថាមិនមានអំពើឃាតកម្មដូចនេះកើតឡើងទេ ដោយទទូចបញ្ជាក់ថា លោក Khashoggi បានដើរចេញពីស្ថានកុងស៊ុល។ ក្រោយមក អារ៉ាប៊ីសាអ៊ូឌីតបានចោទប្រកាន់លើភ្នាក់ងារទុច្ចរិតសាហាវយង់ឃ្នងមួយចំនួន និងបានបដិសេធថា ព្រះអង្គម្ចាស់រជ្ជទាយាទ bin Salman មិនបានដឹងអ្វីទាំងអស់អំពីរឿងនេះទេ។
កាលពីខែមិថុនា អ្នកស៊ើបអង្កេតអង្គការសហប្រជាជាតិអ្នកស្រី Agnes Callamard បានចេញរបាយការណ៍មួយដែលបានរកឃើញ «ភស្តុតាងគួរឲ្យជឿទុកចិត្តបាន» ដែលថា ព្រះអង្គម្ចាស់ bin Salman មានការពាក់ព័ន្ធនឹងការសម្លាប់នេះ។ ចំណែកឯទីភ្នាក់ងារ CIA របស់សហរដ្ឋអាមេរិកក៏បានវាយតម្លៃផងដែរថា ព្រះអង្គម្ចាស់ bin Salman ជាអ្នកបញ្ជាឲ្យមានការសម្លាប់នេះ៕
