លោករដ្ឋមន្រ្តីការបរទេសស.រ.អា John Kerry ថ្លែងថា ក្រុង វ៉ាស៊ីនតោន «មានសេចក្តីព្រួយបារម្ភជាខ្លាំង»ចំពោះការគាំទ្ររបស់ អ៊ីរ៉ង់ដល់ក្រុមឧទ្ទាម Shi'ite នៅក្នុងប្រទេសយេម៉ែន បន្ទាប់ពីមានសេចក្តីរាយការណ៍និយាយថា កងនាវាមួយរបស់អ៊ីរ៉ង់បានចេញដំណើរទៅជិតប្រទេសយេម៉ែន នៅក្នុងតំបន់ឈូងសមុទ្រ ពែកស៍ (Persian)។
ក្នុងកម្មវិធី Newshour របស់ទូរទស្សន៍ PBS លោក Kerry បានថ្លែងថា ស.រ.អា កំពុងតាមមើលការគាំទ្ររបស់អ៊ីរ៉ង់យ៉ាងដិតដល់ចំពោះក្រុមឧទ្ទាមរួមមាន«គ្រឿងផ្គត់ផ្គង់ដែលបាននាំចេញពីប្រទេសអ៊ីរ៉ង់» និង «យន្តហោះ អ៊ីរ៉ង់ មួយចំនួនដែលធ្វើដំណើរទៅប្រទេសយេម៉ែនជារៀងរាល់សប្តាហ៍»។
លោក Kerry ថ្លែងថា យើងបានដឹងច្បាស់អំពីការគាំទ្ររបស់ អ៊ីរ៉ង់ដល់យេម៉ែន ហើយអ៊ីរ៉ង់ត្រូវដឹងថា ស.រ.អានឹងមិននៅឈរមើលស្ងៀមទេ នៅពេលដែលមានអស្ថេរភាពនៅក្នុងតំបន់នេះ ឬពេលដែលមនុស្សចូលរួមក្នុងសង្គ្រាមដោយចំហឆ្លងបន្ទាត់ព្រំដែនអន្តរជាតិ និងប្រទេសដទៃទៀត»។
ទូរទស្សន៍ Press TV របស់អ៊ីរ៉ង់បានរាយការណ៍កាលពីថ្ងៃពុធថា នាវាពិឃាដមួយគ្រឿង និងនាវាមួយគ្រឿងទៀតរបស់ អ៊ីរ៉ង់បានចេញដំណើរឆ្ពោះទៅទឹកសមុទ្រនៅជិតប្រទេសយេម៉ែន កន្លែងដែលការវាយប្រហារផ្លូវអាកាសដឹកនាំដោយប្រទេសអារ៉ាប៊ី សាអ៊ូឌីតកំពុងព្យាយាមបញ្ឈប់ការរំកិលទៅមុខរបស់ពួកឧទ្ទាម Houthi។
លោកឧត្តមនាវីទោ Habibollah Sayyari របស់ អ៊ីរ៉ង់បានថ្លែងថា នាវាទាំងនេះនឹងផ្តល់សុវត្ថិភាពដល់«ផ្លូវដឹកជញ្ជូនសមុទ្ររបស់អ៊ីរ៉ង់» និងការពារ«ផលប្រយោជន៍»របស់អ៊ីរ៉ង់នៅក្នុងសមុទ្រទឹកជ្រៅ៕
