ការភ្ញាក់ផ្អើលដែលកើតចេញពីការសម្រេចចិត្តរបស់ប្រទេសអង់គ្លេសក្នុងការដកខ្លួនចេញពីសហភាពអឺរ៉ុប នៅតែបន្តនៅថ្ងៃអាទិត្យនេះ ខណៈដែលនយោបាយនៅប្រទេសអង់គ្លេសនិងទំនាក់ទំនងរបស់ប្រទេសនេះជាមួយនឹងពិភពលោក បានដាំក្បាលទៅរកភាពមិនប្រាកដប្រជាកាន់តែខ្លាំងឡើង។
រដ្ឋមន្ត្រីការបរទេសអាមេរិក លោក John Kerry ដែលកំពុងមានវត្តមាននៅទ្វីបអឺរ៉ុប បានបន្ថែមការឈប់សុំចតដែលមិនត្រូវបានប្រកាសឲ្យដឹងជាមុននៅក្នុងទីក្រុងឡុងដ៏ និងទីក្រុងប្រ៊ុចសែល នៅនាទីចុងក្រោយ ក្នុងដំណើរទស្សនកិច្ចរបស់លោក។
លោក Kerry គ្រោងជួបជាមួយរដ្ឋមន្ត្រីការបរទេសអង់គ្លេស លោក Philip Hammond និងមន្ត្រីផ្សេងទៀត ដែលជាផ្នែកមួយនៃដំណើរការនៃការរក្សាទំនាក់ទំនងជាមួយសម្ព័ន្ធមិត្តដ៏ជិតស្និទ្ធបំផុតរបស់រដ្ឋាភិបាលក្រុងវ៉ាស៊ីនតោន ក្នុងយុគសម័យថ្មីមួយ នៅពេលដែលប្រទេសអង់គ្លេស លែងសូវមានទំនាក់ទំនងជាមួយអឺរ៉ុបនោះ។
ប្រធានាធិបតីអាមេរិក លោក Barack Obama បានជំរុញអង់គ្លេសកុំឲ្យចាកចេញពីអឺរ៉ុប។ ទំនាក់ទំនងពិសេសរបស់ប្រទេសទាំងពីរ ដែលជាពាក្យពេចន៍ដែលត្រូវបានប្រើដំបូងគេដោយអតីតនាយករដ្ឋមន្ត្រីអង់គ្លេស លោក Winston Churchill ដែលបានលាចាកលោកទៅហើយនោះ បានអនុញ្ញាតឲ្យសហរដ្ឋអាមេរិក មានសំឡេងកាន់តែខ្លាំងនៅក្នុងសហភាពអឺរ៉ុបតាមរយៈប្រទេសអង់គ្លេស។
រដ្ឋបាលរបស់លោក អូបាម៉ា បានបញ្ចេញប្រតិកម្ម ដោយមានការព្រួយបារម្ភចំពោះការធ្វើប្រជាមតិរបស់អង់គ្លេសក្នុងការដកខ្លួនចេញពីសហភាពអឺរ៉ុបនេះ និងផលប៉ះពាល់ទៅលើទំនាក់ទំនងរវាងរដ្ឋាភិបាលទីក្រុងឡុងនិងសហភាពអឺរ៉ុប។
លោកប្រធានាធិបតី អូបាម៉ា បានមានប្រសាសន៍នៅក្នុងសេចក្ដីថ្លែងការណ៍មួយកាលពីថ្ងៃសុក្រថា «ចក្រភពអង់គ្លេសនិងសហភាពអឺរ៉ុបនឹងនៅតែជាដៃគូរដែលមិនអាចខ្វះបានរបស់សហរដ្ឋអាមេរិក ទោះបីជាពួកគេកំពុងចាប់ផ្ដើមចរចាគ្នា អំពីទំនាក់ទំនងរបស់ពួកគេទាំងពីរក៏ដោយ»៕
