សមាជិកសភាអង់គ្លេសម្នាក់បានស្លាប់ បន្ទាប់ពីត្រូវគេបាញ់នៅស្រុក Yorkshire ភាគខាងជើងប្រទេសអង់គ្លេស ដែលជាស្រុកដែលលោកស្រីត្រូវបានគេបោះឆ្នោតឲ្យធ្វើជាអ្នកតំណាងរាស្រ្តនៅទីនោះ។ នេះបើយោងតាមសម្តីរបស់ប៉ូលិស។
លោកស្រី Jo Cox វ័យ៤១ឆ្នាំ ដែលមានកូន២នាក់ និងជាសមាជិកសភាខាងគណបក្សពលកម្មដែលជាគណបក្សប្រឆាំង ត្រូវបានគេបាញ់ឲ្យរងរបួសនិងមានស្នាមឈាមនៅលើផ្លូវថ្មើរជើងមួយក្បែរទីក្រុង Leeds កាលពីថ្ងៃព្រហស្បតិ៍។
ប៉ូលិសនៅស្រុក West Yorkshire បានថ្លែងថា បុរសវ័យ៥២ឆ្នាំម្នាក់ត្រូវបានចាប់ខ្លួនបន្ទាប់ពីហេតុការណ៍នោះបានកើតឡើង។
យុទ្ធនាការឃោសនាសម្រាប់បោះឆ្នោតប្រជាមតិដើម្បីសម្រេចថាតើ អង់គ្លេសគួរចាកចេញពីសហភាពអឺរ៉ុបឬយ៉ាងណានៅសប្តាហ៍ក្រោយនេះត្រូវបានផ្អាក ខណៈពេលដែលព័ត៌មានបានចេញផ្សាយថា សមាជិកសភានាំមុខម្នាក់កំពុងស្ថិតក្នុងស្ថានភាពគ្រោះថ្នាក់ដល់អាយុជីវិត បន្ទាប់ពីត្រូវបានគេបាញ់។
ក្រុមតស៊ូមតិដែលមានឈ្មោះថា អង់គ្លេសខ្លាំងជាងមុនបើសិននៅជាសមាជិកអឺរ៉ុប បានឲ្យដឹងថា ក្រុមរបស់ខ្លួនបានផ្អាកយុទ្ធនាការឃោសនាទាំងស្រុងនៅក្នុងថ្ងៃនោះ។
លោកនាយករដ្ឋមន្ត្រីអង់គ្លេស David Cameron បានមានប្រសាសន៍ថា លោកបានលុបចោលគម្រោងធ្វើសុន្ទរកថាគាំទ្រសហភាពអឺរ៉ុបនៅតំបន់ Gibraltar ។
អ្នកនាំពាក្យម្នាក់របស់ក្រុមដែលប្រឆាំងនឹងក្រុមនេះ ដែលគាំទ្រឲ្យអង់គ្លេសចាកចេញពីសហភាពអឺរ៉ុប បាននិយាយថា រថយន្តក្រុងរបស់ក្រុមដែលប្រឆាំងនឹងពួកគេបានឈប់ធ្វើយុទ្ធនាការឃោសនាក្នុងថ្ងៃនោះ។
ការវាយប្រហារទៅលោកស្រី Cox បានកើតឡើងក្នុងអំឡុងពេលធ្វើយុទ្ធនាការឃោសនា មុនពេលបោះឆ្នោតប្រជាមតិដែលគ្រោងនឹងធ្វើឡើងនៅថ្ងៃទី២៣ខែមិថុនា ថាគួរឲ្យអង់គ្លេសចាកចេញពីសហភាពអឺរ៉ុបឬយ៉ាងណា។ ប្រសិនបើអង់គ្លេសចាកចេញពីសហភាពអឺរ៉ុបមែននោះ នោះប្រទេសនេះនឹងក្លាយជាប្រទេសដំបូងគេបង្អស់នៅក្នុងប្រវត្តិសាស្រ្តដែលចាកចេញសហភាពអឺរ៉ុប។
លោកស្រី Cox ត្រូវបានគេបោះឆ្នោតឲ្យធ្វើជាសមាជិកសភាកាលពីឆ្នាំមុន៕
