លោករដ្ឋមន្រ្តីការបរទេសស.រ.អា. John Kerry បានអញ្ជើញទៅប្រទេស Djibouti នៅទ្វីបអាហ្វ្រិកភាគខាងកើត ដើម្បីជួបជាមួយមន្រ្តីរដ្ឋាភិបាល និងមន្រ្តីយោធាស.រ.អា. ដែលត្រូវបានដាក់រាយនៅក្នុងប្រទេសអតីតអាណានិគមបារាំងមួយនេះ។
មួយថ្ងៃបន្ទាប់ពីលោកបានក្លាយជារដ្ឋមន្រ្តីការបរទេសស.រ.អា.ទីមួយ ដែលបានអញ្ជើញទៅទស្សនាប្រទេសសូម៉ាលី លោកក៏ជារដ្ឋមន្រ្តីការបរទេសស.រ.អា. ដែលបានទៅទស្សនាប្រទេស Djibouti ដែរ។
លោក Kerry នឹងត្រូវជួបជាមួយលោកប្រធានាធិបតី Ismail Omar Guelleh និងលោករដ្ឋមន្រ្តីការបរទេស Mahamoud Ali Youssouf។ ក្រុមមន្រ្តីថ្លែងថា លោកនឹងថ្លែងអំណរគុណដល់លោកទាំងពីរចំពោះជំនួយរបស់ប្រទេស Djibouti ដល់ពលរដ្ឋអាមេរិកាំងជាច្រើនរយនាក់ដែលព្យាយាមគេចឲ្យផុតពីអំពើហិង្សានៅក្នុងប្រទេសយេមែន ដែលស្ថិតនៅត្រើយម្ខាងទៀតនៃឈូងសមុទ្រ Aden ពីប្រទេស Djibouti។
ក្រោយមកលោក Kerry ត្រូវជួបជាមួយមន្រ្តីអាមេរិកាំងនិងមន្រ្តីយោធាស.រ.អានៅមូលដ្ឋានយោធាស.រ.អា ឈ្មោះ Camp Lemmonier។ មូលដ្ឋានយោធាស.រ.អា.ក្នុងប្រទេស Djibouti បានក្លាយជាផ្នែកសំខាន់មួយនៃវត្តមានយោធាស.រ.អា.ក្នុងប្រទេសនៅមជ្ឈិមបូព៌ានិងទ្វីបអាហ្វ្រិកភាគខាងកើត។
លោក Kerry នឹងអញ្ជើញទៅប្រទេសអារ៉ាប៊ី សាអ៊ូឌីត នៅល្ងាចថ្ងៃពុធ។ នៅចុងសប្តាហ៍នេះ លោកនឹងអញ្ជើញទៅប្រទេសបារាំង ដើម្បីធ្វើការចរចាអំពីបញ្ហាសន្តិសុខក្នុងតំបន់ និងចូលរួមក្នុងពិធីរំលឹកការបញ្ចប់សង្គ្រាមលោកលើកទីពីរក្នុងទ្វីបអឺរ៉ុប៕
