លោករដ្ឋមន្រ្តីការបរទេសសហរដ្ឋអាមេរិក John Kerry បានបំពេញទស្សនកិច្ចដោយមិនប្រកាសឲ្យដឹងជាមុនទៅកាន់ប្រទេសសូម៉ាលី ដែលជាអ្នកការទូតកំពូលសហរដ្ឋអាមេរិកលើកដំបូងដែលបំពេញទស្សនកិច្ចប្រទេសនោះ។
ក្រសួងការបរទេសសហរដ្ឋអាមេរិក បានប្រាប់ឲ្យដឹងថា យន្តហោះរបស់លោករដ្ឋមន្រ្តីការបរទេស Kerry បានចុះនៅចំណតអាកាសយានទីក្រុងម៉ូហ្គាឌីស៊ូប្រហែលនៅពេលថ្ងៃត្រង់នៅថ្ងៃអង្គារនេះ ហើយលោកនឹងជួបជាមួយពួកមន្រ្តីរដ្ឋាភិបាលក្នុងអំឡុងនៃដំណើរបំពេញទស្សនកិច្ចរបស់លោកនេះ។ លោកត្រូវគេរំពឹងនឹងពិភាក្សាបញ្ហាសន្តិសុខហើយការជឿនលឿនរបស់សូម៉ាលីឆ្ពោះទៅកាន់ការធ្វើកំណែទម្រង់ និងការអភិវឌ្ឍន៍របស់ខ្លួនមុនការបោះឆ្នោតដែលគ្រោងធ្វើឡើងនៅឆ្នាំក្រោយ។
លោករដ្ឋមន្រ្តីការបរទេសKerry ក៏ត្រូវគេរំពឹងនឹងជួបជាមួយពួកមេដឹកនាំអង្គការសង្គមស៊ីវិលដើម្បីពិភាក្សាការងាររបស់អង្គការមិនមែនរដ្ឋាភិបាលនៅក្នុងប្រទេសសូម៉ាលី ហើយលោក នឹងថ្លែងអំណរគុណដល់កងទ័ពសហភាពអាហ្វ្រិកចំពោះតួនាទីរបស់ពួកគេនៅក្នុងការធ្វើឲ្យមានស្ថេរភាពនៅក្នុងប្រទេសនោះដែលបានបង្កើតវិធានការខ្លះដើម្បីធ្វើឲ្យមានភាពស្ងប់ស្ងាត់ បន្ទាប់ពី២ទសវត្សរ៍គ្មានរដ្ឋាភិបាលដែលមានដំណើរការនឹងការប្រយុទ្ធដែលបន្តមានឡើងប្រឆាំងនឹងក្រុម al-Shabab។
កាលពីថ្ងៃច័ន្ទម្សិលមិញនៅក្នុងរដ្ឋធានី Nairobi នៃប្រទេសកេនយ៉ា លោករដ្ឋមន្រ្តី Kerry បានប្រកាសជំនួយថ្មីដែលមានប្រាក់រាប់លានដុល្លារសម្រាប់ទ្វីបអាហ្វ្រិក។
លោក Kerry បានមានប្រសាសន៍ថា ថវិការបន្ថែមចំនួន៤៥លានដុល្លារ នឹងត្រូវផ្តល់ឲ្យដើម្បីជួយស្នងការជនភៀសខ្លួនរបស់អង្គការសហប្រជាជាតិដើម្បីជួយជនភៀសខ្លួន៦សែននាក់ដែលកំពុងរស់នៅក្នុងប្រទេសកេនយ៉ា។ លោករដ្ឋមន្រ្តីការបរទេសអាមេរិកាំង បានសរសើររដ្ឋាភិបាលទីក្រុង Nairobi ដែលបានទទួលយកជនភៀសខ្លួន៕
