ថ្ងៃថ្មីមួយនៃកិច្ចចរចាអំពីកម្មវិធីបរមាណូនៃប្រទេសអ៊ីរ៉ង់កំពុងតែត្រូវបានធ្វើឡើងនៅក្នុងក្រុងវីយេន បន្ទាប់ពីមានកិច្ចចរចាគ្នារហូតដល់យប់ជ្រៅ។
លោករដ្ឋមន្ត្រីការបរទេសស.រ.អា John Kerry បានមានប្រសាសន៍កាលពីព្រឹកថ្ងៃអាទិត្យនេះថា លទ្ធផលនៃជំនួបមួយជាមួយលោករដ្ឋមន្ត្រីការបរទេសអ៊ីរ៉ង់ Mohammad Javad Zarif កាលពីមួយថ្ងៃមុននេះ «មានភាពវិជ្ជមាន»។
លោក Kerry បានមានប្រសាសន៍ប្រាប់ពួកមនុស្សនៅជិតទីនោះ និងពួកអ្នកកាសែតនៅក្នុងអត្ថាធិប្បាយខ្លីមួយនៅខាងក្រៅសណ្ឋាគារមួយក្នុងរដ្ឋធានីនៃប្រទេសអូទ្រីសថា «ខ្ញុំយល់ថាយើងទៅដល់សេចក្តីសម្រេចចិត្តពិតប្រាកដខ្លះៗហើយ។ ដូច្នេះខ្ញុំនឹងនិយាយថា ដោយសារយើងមានកិច្ចការស្វិតស្វាញពីរបីទៀតត្រូវធ្វើ ខ្ញុំនៅតែមានសុទិដ្ឋិនិយម»។
បន្ទាប់មកលោក Kerry បានវិលត្រឡប់ទៅកាន់ Palais Coburg ដែលនៅទីនោះកិច្ចចរចាគ្នាបានប្រព្រឹត្តទៅកាលពីពីរសប្តាហ៍មុននេះ។ ក្រុមប្រទេស P5+1 កំពុងធ្វើការឲ្យមានការសម្រុះសម្រួលគ្នាមួយ ដែលអាចបន្ធូរបន្ថយការដាក់ទណ្ឌកម្មលើប្រទេសអ៊ីរ៉ង់ ជាថ្នូរនឹងការកម្រិតលើកម្មវិធីបរមាណូរបស់រដ្ឋាភិបាលក្រុងតេរ៉ង់។
លោកស្រី Federica Mogherini រដ្ឋមន្ត្រីការបរទេសនៃសហភាពអឺរ៉ុបដែលជាផ្នែកមួយនៃកិច្ចចរចានេះដែរ បានមានប្រសាសន៍នៅព្រឹកថ្ងៃអាទិត្យនេះថាពួកអ្នកធ្វើការចរចាឋិតនៅក្នុង «ម៉ោងនៃការធ្វើសេចក្តីសម្រេចចិត្តហើយ»៕
