លោក John Kerry រដ្ឋមន្ត្រីការបរទេសស.រ.អា. បានអំពាវនាវឱ្យមានការស៊ើបអង្កេតអំពីឧក្រិដ្ឋកម្មសង្គ្រាមប្រព្រឹត្តដោយរដ្ឋាភិបាលរុស្ស៊ី និងស៊ីរី។ លោកបានធ្វើអត្ថាធិប្បាយដូច្នេះនៅក្នុងជំនួបកាលពីថ្ងៃសុក្រជាមួយលោករដ្ឋមន្ត្រីការបរទេសបារាំង Jean-Marc Ayrault ដែលបំពេញទស្សនកិច្ចក្នុងរដ្ឋធានីវ៉ាស៊ីនតោន។
នៅក្រោយមានការវាយប្រហារមួយលើមន្ទីរពេទ្យមួយកន្លែងក្នុងប្រទេសស៊ីរីកាលពីយប់ថ្ងៃព្រហស្បតិ៍ដែលបានបណ្តាលឱ្យមនុស្ស២០នាក់ស្លាប់ និងនាំឱ្យមានមនុស្ស១០០នាក់ទៀតត្រូវរបួស លោក Kerry បានមានប្រសាសន៍ថា ត្រូវមានអ្នកមនុស្សទទួលខុសត្រូវដល់អំពើហិង្សាដែលរាលដាលនៅក្នុងប្រទេសស៊ីរី។
លោករដ្ឋមន្ត្រីការបរទេសអាមេរិកបានមានប្រសាសន៍ថា៖ «ប្រទេសរុស្ស៊ីនិងរបបគ្រប់គ្រងរបស់លោក Assad នៅជំពាក់ពិភពលោកលើសពីអ្វីដែលយើងអាចពន្យល់បានអំពីហេតុអ្វីបានជាពួកគេនៅតែវាយប្រហារលើមន្ទីរពេទ្យនិងអាគារពេទ្យ និងលើពួកស្ត្រីនិងក្រុមកុមារតទៅទៀត»។ លោកបាននិយាយបន្ថែមថា សកម្មភាពនេះតម្រូវឱ្យមានការស៊ើបអង្កេតដ៏ត្រឹមត្រូវមួយអំពីឧក្រិដ្ឋកម្មសង្គ្រាម។
កិច្ចព្រមព្រៀងមួយរវាងលោក Kerry និងលោករដ្ឋមន្ត្រីការបរទេសរុស្ស៊ី Sergei Lavrov កាលពីខែមុនអាចបង្កើតសម្ព័ន្ធភាពប្រឆាំងនឹងភេរវកម្មថ្មីមួយបានប្រសិនបើមានការបញ្ឈប់ការប្រយុទ្ធគ្នាមួយសប្តាហ៍ដែលជារយៈពេលមួយគ្រប់គ្រាន់សម្រាប់ការបញ្ជូនជំនួយមនុស្សធម៌ឱ្យបានទៅដល់តំបន់មានផលប៉ះពាល់ដោយសារសង្គ្រាមនេះ។ គ្មានការសម្រេចលក្ខខណ្ឌណាមួយក្នុងកិច្ចព្រមព្រៀងនោះទេ ហើយការវាយប្រហារតាមអាកាសក៏នៅបន្តធ្វើតទៅទៀត។
លោក Kerry បានបញ្ឈប់ការពិភាក្សាទ្វេភាគីជាមួយប្រទេសរុស្ស៊ីអំពីភាពជាដៃគូយោធារវាងស.រ.អា.និងប្រទេសរុស្ស៊ីកាលពីដើមសប្តាហ៍នេះ។
លោក Kerry បានមានប្រសាសន៍ថា៖ «នៅពេលនេះការវាយប្រហារទាំងនេះមិនមែនជាចៃដន្យទេ វាហួសពីចៃដន្យទៅទៀត។ នេះជាយុទ្ធសាស្ត្រមួយដែលមានគោលដៅធ្វើឱ្យពួកជនស៊ីវិលភ័យខ្លាចខ្លាំង និងដើម្បីសម្លាប់ពួកជនទាំងឡាយណាដែលរារាំងគោលដៅយោធារបស់ពួកគេ»។
មានមនុស្ស៥០.០០០នាក់បានបាត់បង់ជីវិតរួចទៅហើយក្នុងប្រទេសស៊ីរី ចាប់តាំងពីការចាប់ផ្តើមសង្គ្រាមនេះកាលពីឆ្នាំ២០១១មក។ លោក Staffan de Mistura ប្រេសិតពិសេសរបស់អ.ស.ប.សម្រាប់ប្រទេសស៊ីរី បានមានប្រសាសន៍កាលពីថ្ងៃព្រហស្បតិ៍ថា ផ្នែកខាងកើតនៃក្រុង Aleppo អាចត្រូវបំផ្លាញទាំងស្រុងមិនហួសពីដំណាច់ឆ្នាំនេះទេ ដោយសារមានសកម្មភាពយោធាដ៏ឃោរឃៅជានិច្ចនៅក្នុងក្រុងនេះ៕
