មេធាវីការពារក្តីឲ្យលោក កឹម សុខា ប្រធានបក្សប្រឆាំងដែលកំពុងស្ថិតក្រោមការឃុំខ្លួនក្នុងផ្ទះ បានដាក់លិខិតជាលើកទី៣ទៅតុលាការ ស្នើសុំឱ្យលើកលែងការចោទប្រកាន់លើរូបលោក កឹម សុខា ក្រោយការស៊ើបអង្កេតបន្តអូសបន្លាយអស់រយៈពេលជាងមួយឆ្នាំ។
លោក ផែង ហេង មេធាវីមួយរូបក្នុងចំណោមមេធាវី៤រូបដែលការពារក្តីឲ្យលោក កឹម សុខា ប្រាប់ VOA នារសៀលថ្ងៃព្រហស្បតិ៍នេះថា ក្រុមមេធាវីបានដាក់លិខិតទៅសាលាដំបូងរាជធានីភ្នំពេញ កាលពីថ្ងៃព្រហស្បតិ៍សប្តាហ៍មុន ដោយស្នើឲ្យមានការលើកលែងការចោទប្រកាន់លើលោក កឹម សុខា។ លោកបន្ថែមថា នេះជាលើកទី៣ហើយដែលក្រុមមេធាវីបានដាក់លិខិតស្នើឲ្យមានការលើកលែងការចោទប្រកាន់លើលោក កឹម សុខា បន្ទាប់ពីការស៊ើបអង្កេតលើសំណុំរឿងកូនក្តីរបស់លោកបន្តជាងមួយឆ្នាំ ដោយមិនមានលទ្ធផលណាមួយ។
លោកបញ្ជាក់ថា៖
«ព្រោះយើងឃើញថា ការស៊ើបអង្កេតហ្នឹងវាអស់រយៈពេលជាង១ឆ្នាំមកហើយ ហើយយើងមើលទៅបទចោទហ្នឹងក៏គ្មានសន្ទិដ្ឋិភាព ឬក៏បរទេសណាមកត្រូវរ៉ូវដើម្បីផ្តួលរំលំរដ្ឋាភិបាលទេ អ៊ីចឹងហើយអង្គហេតុដែលហ្វេសប៊ុកបង្ហោះហ្នឹងវាមិនស៊ីសង្វាក់ទៅនឹងអង្គហេតុពិត។ អ៊ីចឹងហើយយើងទាមទារឲ្យចៅក្រមស៊ើបសួរគាត់ទម្លាក់ចោលបទចោទ»។
VOA បានព្យាយាមទាក់ទងសុំការអត្ថាធិប្បាយពីលោក លី សុផាណា អ្នកនាំពាក្យសាលាដំបូងរាជធានីភ្នំពេញ តែរហូតមកដល់ល្ងាចថ្ងៃព្រហស្បតិ៍នេះមិនទាន់មានការឆ្លើយតបនៅឡើយ។
លោក កឹម សុខា ប្រធានគណបក្សសង្គ្រោះជាតិ ដែលជាគណបក្សត្រូវបានតុលាការកំពូលរំលាយ កាលពីខែវិច្ឆិកាឆ្នាំ២០១៧តាមបណ្តឹងរបស់ក្រសួងមហាផ្ទៃ ត្រូវបានតុលាការចោទប្រកាន់ និងឃុំខ្លួនពីបទសន្ទិដ្ឋិភាពជាមួយបរទេស ដែលស្មើនឹងបទក្បត់ជាតិដោយយោងលើវីដេអូខ្លីមួយ។
ក្នុងវីដេអូមួយដែលត្រូវបានបង្ហោះលើបណ្តាញសង្គមហ្វេសប៊ុក កាលពីឆ្នាំ២០១៧ និងត្រូវបានតុលាការយកធ្វើជាភស្តុតាងក្នុងការចាប់ខ្លួន និងចោទប្រកាន់លោក កឹម សុខាពីបទក្បត់ជាតិនោះ គេឃើញលោក កឹម សុខា បានថ្លែងក្នុងវីដេអូនោះថា លោកត្រូវបានឧបត្ថម្ភ និងបង្ហាត់បង្រៀនដោយសហរដ្ឋអាមេរិកក្នុងដំណើរការនយោបាយរបស់លោកដើម្បីផ្តួលរំលំមេដឹកនាំផ្តាច់ការក្នុងប្រទេសកម្ពុជា។
ក្រោយត្រូវបានឃុំខ្លួនក្នុងពន្ធនាគារទាំងកំពុងមានជំងឺ តាំងពីដើមខែកញ្ញាឆ្នាំ២០១៧ អស់រយៈពេលជាង១ឆ្នាំ ដោយមិនមានការកាត់ទោស លោក កឹម សុខា ត្រូវបានតុលាការបញ្ជូនពីគុកត្រពាំងផ្លុងទៅផ្ទះវិញ ដោយដាក់ឲ្យស្ថិតក្រោមការឃ្លាំមើលរបស់តុលាការ ចាប់តាំងពីថ្ងៃទី១០ ខែកញ្ញា ឆ្នាំ២០១៨មក។
ចាប់តាំងពីមានការចោទប្រកាន់ ចាប់ខ្លួន និងឃុំខ្លួនលោក កឹម សុខា គេឃើញអង្គការអន្តរជាតិផ្នែកការពារសិទ្ធិមនុស្ស និងសហគមន៍អន្តរជាតិជាច្រើន ព្រមទាំងរដ្ឋាភិបាលប្រទេសកាន់លទ្ធិប្រជាធិបតេយ្យធំៗមួយចំនួនផង បានរិះគន់រដ្ឋាភិបាលរបស់លោកនាយករដ្ឋមន្រ្តី ហ៊ុន សែន និងទាមទារឲ្យមានការទម្លាក់ចោលបទចោទលើលោក កឹម សុខា ជាបន្តបន្ទាប់ ដោយឥតលក្ខខណ្ឌ។
យ៉ាងណាក្តី ក្រុមមន្រ្តីជាន់ខ្ពស់រដ្ឋាភិបាលបានចេញមុខការពារចំណាត់ការឃុំខ្លួនលោក កឹម សុខា ដោយនិយាយថា ធ្វើឡើងទៅតាមច្បាប់ ស្របតាមប្រទេសនីតិរដ្ឋប៉ុណ្ណោះ៕
