ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

រដ្ឋាភិបាល​អាហ្វហ្គានីស្ថាន​ថា ខ្លួន​មិន​ចូល​ការ​ចរចា​ដែល​ផ្តួច​ផ្តើម​ដោយ​រដ្ឋាភិបាល​រុស្ស៊ី​ទេ


លោក​ប្រធានាធិបតី​អាហ្វហ្គានីស្ថាន Ashraf Ghani ថ្លែង​នៅ​ក្នុង​សន្និសីទ​កាសែត​មួយ​នៅ​ក្នុង​ក្រុង​កាប៊ុល ប្រទេស​អាហ្វហ្គានីស្ថាន កាលពី​ថ្ងៃទី១៥ ខែកក្កដា ឆ្នាំ២០១៨។

រដ្ឋាភិបាល​អាហ្វ​ហ្គានីស្ថាន​ដែល​គាំទ្រ​ដោយ​សហរដ្ឋ​អាមេរិក​បាន​ប្រកាស​កាល​ពី​ថ្ងៃ​ពុធថា ​ខ្លួន​មិន​មាន​គម្រោង​ចូលរួម​សន្និសីទ​ពហុជាតិ​នៅ​ខែ​ក្រោយ​នៅ​ក្នុង​ប្រទេស​រុស្ស៊ី​ស្តី​ពី​អនាគត​របស់​អាហ្វហ្គានីស្ថាន​ដែល​នៅ​ទី​នោះ​ពួក​អ្នក​តំណាងរបស់​ពួក​បះបោរ​តាលីបង់​ក៏​ត្រូវ​គេ​រំពឹង​នឹង​ចូល​រួម​ផង​ដែរ។

ក្រៅ​ពី​រដ្ឋាភិបាល​ក្រុង​កាប៊ុល​និង​ពួក​ក្រុម​តាលីបង់ រដ្ឋាភិបាល​ក្រុង​មូស្គូ​បាន​អញ្ចើញ​ប្រទេស​សំខាន់ៗ​ចំនួន១១​ក្នុង​តំបន់ ​រួមមាន​ប្រទេស​ចិន ​ប៉ាគីស្ថាន​និង​អ៊ីរ៉ង់​ឲ្យ​ចូលរួម​នៅ​ក្នុង​ជំនួប​ថ្ងៃ​ទី៤ ​ខែកញ្ញា ​នៅ​ក្នុង​រដ្ឋធានី​នៃ​ប្រទេស​រុស្ស៊ី។

លោក Sibhatullah Ahmadi អ្នកនាំ​ពាក្យ​ក្រសួង​ការបរទេស​អាហ្វហ្គានីស្ថាន ​បាន​បញ្ជាក់​ប្រាប់ VOA កាល​ពី​ថ្ងៃ​ពុធ​ថា ​រដ្ឋាភិបាល​អាហ្វហ្គានីស្ថាន​បាន​សម្រេច​មិន​បញ្ជូន​គណៈប្រតិភូ​របស់​ខ្លួន​ទៅ​កាន់​ការ​ចរចា​នៅ​ក្នុង​ប្រទេស​រុស្ស៊ី ​ក៏ប៉ុន្តែ ​លោក​មិន​បាន​ប្រាប់​ពី​មូលហេតុ​ទេ។

មាន​សេចក្តីរាយការណ៍​ថា ​ពួកមន្ត្រី​អាហ្វហ្គានីស្ថាន ​មាន​ការ​រកាំ​ចិត្ត​ពី​ព្រោះ​តែ ​រដ្ឋាភិបាល​ក្រុង​មូស្គូ​មិន​បាន​ពិគ្រោះ​ជាមួយ​ពួកគេ​មុន​ពេល​អញ្ជើញក្រុម​តាលីបង់។

លោក Ahmadi អ្នក​នាំពាក្យ​ក្រសួង​ការបរទេស​អាហ្វហ្គានីស្ថាន ​បាន​និយាយ​ទៀត​ថា ​រដ្ឋាភិបាល​ឥស្លាម​អាហ្វហ្គានីស្ថាន ត្រូវ​ផ្តោត​លើ​ចំណុច​សំខាន់​នៃ​ព្រឹត្តិការណ៍​ដែលកំពុង​កើត​មាន​ឡើង​នៅ​ជុំ​វិញ​ពិភពលោក​ដែល​ពាក់​ព័ន្ធ​នឹង​អាហ្វហ្គានីស្ថាន។

លោក​បាន​និយាយ​ថា រដ្ឋាភិបាល​ក្រុង​កាប៊ុល​មាន​ទំនាក់​ទំនង​ដ៏រាក់​ទាក់​បំផុត​ជាមួយ​រដ្ឋាភិបាលក្រុង​មូស្គូ​ហើយ​ប្រទេស​ទាំង​២ជានិច្ចកាល​បាន​ពិគ្រោះ​គ្នា​ទៅ​វិញ​ទៅមក​អំពី​បញ្ហា​ផ្សេងៗ​ទៀត ​ជា​ពិសេស​បញ្ហា​ដែល​ទាក់​ទិននឹង​ដំណើរ​ការ​សន្តិភាព​និងការ​ផ្សះផ្សា​ជាតិ​ដែល​ដឹកនាំ​ដោយ​អាហ្វហ្គានីស្ថាន៕

XS
SM
MD
LG