ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ក្រសួង​យុត្តិធម៌​ប្រាប់​​ស្ថានទូត​សហរដ្ឋ​អាមេរិក​ឲ្យ​គោរព​ច្បាប់​កម្ពុជា


រូបឯកសារ៖ លោក កឹម សុខា ប្រធានគណបក្សសង្គ្រោះជាតិ ផ្តល់បទសម្ភាសន៍ឲ្យសារព័ត៌មាន Reuters នៅខេត្តព្រៃវែង កាលពីថ្ងៃទី២៨ ខែឧសភា ឆ្នាំ២០១៧។
រូបឯកសារ៖ លោក កឹម សុខា ប្រធានគណបក្សសង្គ្រោះជាតិ ផ្តល់បទសម្ភាសន៍ឲ្យសារព័ត៌មាន Reuters នៅខេត្តព្រៃវែង កាលពីថ្ងៃទី២៨ ខែឧសភា ឆ្នាំ២០១៧។

ក្រសួង​យុត្តិធម៌​កម្ពុជា​​បាន​​ឆ្លើយ​តប​នឹង​សេចក្តី​ប្រកាស​របស់​ស្ថានទូត​សហ​រដ្ឋ​អាមេរិក​ប្រចាំ​កម្ពុជា​ ទាក់​ទិន​នឹង​ការ​ឃុំ​ខ្លួន​លោក​ កឹម សុខា​ ដោយ​ហៅ​ការ​អធិប្បាយ​របស់​ស្ថានទូត​អាមេរិក​ថា​ ជា​ទង្វើ​រំលោភ​អធិបតេយ្យ​ភាព​កម្ពុជា​ ដែល​ជា​រដ្ឋ​ឯករាជ្យ។

បួន​ថ្ងៃ​ក្រោយ​ការ​អធិប្បាយ​របស់​ស្ថានទូត​សហរដ្ឋ​អាមេរិក​ប្រចាំ​កម្ពុជា​ ដែល​បាន​ថ្លែង​ដល់​ការ​ជាប់​ឃុំ​របស់​លោក​ កឹម សុខា​ អស់​រយៈពេល​១៨​ខែ​ ហើយ​គ្មាន​ការ​កាត់​ទោស​នោះ​ ក្រសួង​យុត្តិធម៌​កាល​ពី​ថ្ងៃ​ច័ន្ទកន្លង​ទៅ​នេះបានចាត់​ទុក​ការ​អធិប្បាយ​របស់​ស្ថាន​ទូត​សហរដ្ឋ​អាមេរិក​ថា ​ជា​«ការ​មិន​គោរព​ចំពោះ​អធិបតេយ្យ​របស់​ព្រះ​រាជាណា​ចក្រ​កម្ពុជា»។​

កាល​ពីថ្ងៃ​ទី​១៥ ​ខែ​កុម្ភៈ​ ឆ្នាំ​២០១៩​ ស្ថានទូត​សហរដ្ឋ​អាមេរិក​ប្រចាំ​កម្ពុជា​បាន​បង្ហោះ​សារ​មួយ​លើ​ទំព័រ​ហ្វេស​ប៊ុក​របស់​ខ្លួន​ ដោយ​បាន​ចោទសួរ​ថា៖​

«តើ​អ្នក​មាន​ដឹង​ទេ​ថា ​លោក​ កឹម សុខា ​បាន​ជាប់​ក្នុង​ការ​ឃុំឃាំង​ជិត​១៨​ខែ​មក​ហើយ?​ វា​មាន​រយៈពេល​៥៣០​ថ្ងៃ​នៃ​ការ​ជាប់​ឃុំ។ ​គាត់​ជា​មនុស្ស​ស្អាត​ស្អំ​ ដែល​ត្រូវ​បាន​ឃុំខ្លួន​ដោយ​អយុត្តិធម៌​ ក្រោម​ការ​ចោទ​ប្រកាន់​មិន​ពិត។​ មិនមាន​ភ័ស្តុតាង​ណាមួយ​ប្រឆាំង​នឹង​គាត់​ឡើយ ​ហើយ​ក៏​មិន​ទាន់​មាន​ការ​កំណត់​បើក​សវនាការ​កាត់​ទោស​គាត់​ដែរ។​ គ្មាន​ភ័ស្តុតាង​ គ្មាន​សវនា​ការ​កាត់​ទោស ​គ្មាន​យុត្តិធម៌»។​

ជា​ការ​វាយ​បក​ទៅ​កាន់​ស្ថានទូត​សហរដ្ឋ​អាមេរិក​ប្រចាំ​កម្ពុជា​វិញ​នោះ​ ​អ្នក​នាំ​ពាក្យ​ក្រសួង​យុត្តិធម៌បាន​ចេញ​សេចក្តី​ថ្លែង​ការណ៍​មួយ​មាន​កម្រាស់​ពីរ​ទំព័រ​ ដែល​បាន​ហៅ​ការ​អធិប្បាយ​របស់​ស្ថានទូត​អាមេរិក​ថា​ ជា​ទង្វើ​មួយ​រំលោភ​អធិបតេយ្យ​ភាព​កម្ពុជា​ ដែល​ជា​រដ្ឋ​ឯករាជ្យ។​

អ្នក​នាំ​ពាក្យ​ក្រសួង​យុត្តិធម៌បាន​អះអាង​ថា​ ការ​អធិប្បាយ​របស់​ស្ថានទូត​សហរដ្ឋ​អាមេរិកមាន​ចេតនា​បំភ្លៃ​ និង​បំភាន់​សាធារណ​មតិ​ជាតិ​ និង​អន្តរជាតិ​ ឲ្យ​មាន​ការ​យល់​ច្រឡំ​ចំពោះ​ការ​អនុវត្ត​នីតិវិធី​ និង​ការ​អនុវត្ត​ច្បាប់​ដោយ​តុលាការ​កម្ពុជា​ ដែល​ជា​ស្ថាប័ន​ឯករាជ្យ​ពាក់​ព័ន្ធនឹង​សំណុំ​រឿង​ព្រហ្មទណ្ឌ​ដែល​មាន​ជន​ត្រូវ​ចោទ​ឈ្មោះ​កឹម សុខា។​

សេចក្តី​ថ្លែង​ការណ៍​របស់​អ្នក​នាំ​ពាក្យ​ក្រសួង​យុតិ្តធម៌​កម្ពុជាបាន​សរសេរ​ក្នុង​ន័យ​ដើម​ថា៖​

«អ្នក​នាំ​ពាក្យ​ក្រសួង​យុត្តិធម៌សម្តែង​នូវ​ការ​សោក​ស្តាយ​ជា​ខ្លាំង​ចំពោះ​ការ​ផ្សព្វផ្សាយ​ព័ត៌មានដោយ​គ្មាន​មូលដ្ឋានច្បាប់​របស់​ស្ថានទូត​សហរដ្ឋ​អាមេរិក​នៅ​ភ្នំពេញ​ ដែល​មាន​ចរិត​ជា​ការ​បំភ្លៃ​ និង​ការ​បំភាន់​ការ​យល់​ដឹង​របស់​សាធារណ​មតិ​ចំពោះ​ករណី​សំណុំ​រឿង​ព្រហ្មទណ្ឌ​ ដែល​សមត្ថ​កិច្ចកម្ពុជា​បាន​អនុវត្ត​តួនាទី​របស់​ខ្លួន​ដោយ​ឯករាជ្យ​ ត្រឹម​ត្រូវ​តាម​ច្បាប់​ និង​នីតិវិធី​ជា​ធរមានរបស់​ព្រះ​រាជាណាចក្រ​កម្ពុជា»។​

សេចក្តី​ថ្លែង​ការណ៍​ដដែល​បាន​បញ្ជាក់​ទៀត​ថា៖​

«អ្នក​នាំ​ពាក្យ​ក្រសួង​យុត្តិធម៌​កម្ពុជា​ សូម​អំពាវនាវ​ដ៏​ទទូច​ដល់​ស្ថានទូត​សហរដ្ឋ​អាមេរិក​ ភ្នំពេញ​ សូម​បញ្ឈប់​ការ​បក​ស្រាយ​ដោយ​បំភាន់​ និង​លាប​ពណ៌​នយោបាយ​ទៅ​លើ​ការ​អនុវត្ត​ច្បាប់​របស់​ស្ថាប័ន​មាន​សមត្ថកិច្ច​ និង​តុលាការ​ដោយ​សូម​ទុក​កិច្ចការ​នេះជូន​ស្ថាប័ន​តុលាការ​របស់​កម្ពុជា​ ចាត់​ការ​តាម​ច្បាប់​របស់​កម្ពុជា​ក្នុង​ឋានៈជា​រដ្ឋ​អធិប​តេយ្យ»។​

ការ​ថ្លែង​ឆ្លើយ​តប​របស់​ក្រសួង​យុត្តិធម៌​របស់​ប្រទេស​កម្ពុជាធ្វើ​ឡើង​ក្រោយ​ពីប្រតិកម្ម​របស់​ក្រសួង​ការ​បរទេស​កម្ពុជា​ ដែល​បាន​ចេញ​សេចក្តី​ថ្លែង​ការណ៍​ចាត់​ទុក​ថា​ សារ​របស់​ស្ថានទូត​សហរដ្ឋ​អាមេរិក​ជា​ការ​ជ្រៀត​ជ្រែក​កិច្ចការ​ផ្ទៃ​ក្នុង​កម្ពុជា​ និង​ផ្ទុយ​ពី​ច្បាប់​ការទូត។​

សេចក្តី​ថ្លែង​ការណ៍​របស់​អ្នក​នាំ​ពាក្យ​ក្រសួង​ការ​បរទេស​កម្ពុជា​ ដែល​បាន​ចេញ​ផ្សាយ​កាល​ពីថ្ងៃ​សៅរ៍​បាន​ ​បញ្ជាក់ពី​ការ​ភ្ញាក់​ផ្អើល​ ដោយ​និយាយ​ថា ​ទង្វើ​របស់​ស្ថានទូត​សហរដ្ឋ​អាមេរិកជា​ការ​មិន​គោរព​អធិបតេយ្យ​ភាព​កម្ពុជា​និង​គ្មាន​លក្ខណៈ​ការ​ទូត។​

សេចក្តី​ថ្លែង​ការណ៍​ដដែល​បាន​បញ្ជាក់​តាម​ខ្លឹម​សារ​ដើម​ថា៖​

«ទង្វើ​ក្នុង​ទិស​ដៅ​លម្អៀង​បែប​នេះ​របស់​ស្ថានទូត​សហរដ្ឋ​អាមេរិក​គឺ​ផ្ទុយ​នឹង​កិច្ច​ខិតខំ​ប្រឹង​ប្រែង​បច្ចុប្បន្ន​របស់​ប្រទេស​ទាំង​ពីរ​ ក្នុង​ការ​ធ្វើ​ឲ្យ​ប្រសើរ​ឡើង​នូវ​ទំនាក់​ទំនង​ទ្វេ​ភាគី​ដែល​បម្រើ​ដល់​ប្រយោជន៍​រួម​របស់​ប្រទេស​និង​ប្រជាជន​ទាំង​ពីរ‍»។​

ក៏​ប៉ុន្តែភ្លាមៗក្រោយ​ពី​ប្រតិកម្ម​របស់​ក្រសួង​ការ​បរទេស​កម្ពុជា​នោះ​ អ្នកស្រី​ Emily Zeeberg អ្នក​នាំពាក្យ​ស្ថាន​ទូត​សហ​រដ្ឋ​អាមេរិក​ប្រចាំ​កម្ពុជា​ ​បាន​ថ្លែង​បញ្ជាក់​ថា​ ​ស្ថាន​ទូត​អាមេរិក​ប្រចាំ​កម្ពុជា​បាន​បង្ហោះ​សារ​នោះ​ គឺ​ដោយ​សារ​សហរដ្ឋ​អាមេរិក​ជា​ហត្ថលេខី​នៃ​សន្ធិ​សញ្ញា​សន្តិភាព​ទីក្រុង​ប៉ារីស ​ដែល​មាន​១៨ប្រទេស​ជា​ហត្ថលេខី​ ហើយ​ថា ​សហរដ្ឋ​អាមេរិក​មាន​ការ​ទទួល​ខុស​ត្រូវ​ក្នុង​ការ​ត្រួត​ពិនិត្យ​ថា​ លទ្ធិ​ប្រជា​ធិបតេយ្យ​ និង​សិទ្ធិ​មនុ​ស្ស​ត្រូវ​បាន​គេ​គោរព​នៅ​ក្នុង​ប្រទេស​កម្ពុជា។​

អ្នក​ស្រី​បន្ថែម​ថា ​ប្រទេស​កម្ពុជា​នឹង​មិន​អាច​មាន​ទំនាក់​ទំនង​ល្អ​ប្រសើរ​ជាមួយ​សហរដ្ឋ​អាមេរិក​បាន​ទេ ​ដរាប​ណា​បញ្ហា​ការ​ភ្ជាប់​ថា​ ​លោ​ក ​កឹម សុខា ​បាន​ឃុបឃិត​ជាមួយ​សហរដ្ឋ​អាមេរិក ​មិន​ត្រូវ​បាន​ដោះ​ស្រាយ​ដោយ​ត្រឹម​ត្រូវ​តាម​លក្ខខណ្ឌ​ច្បាប់​ ​និង​ដោយ​គោល​ការណ៍​គោរព​គ្នា​ទៅវិញ​ទៅ​មក​ទេ​នោះ។​

អ្នកស្រី​ Emily Zeeberg ​បញ្ជាក់​ថា៖​

«លោក ​កឹម សុខា ​ត្រូវ​បាន​ចោទ​ប្រកាន់​ថា​ បាន​ឃុបឃិត​ជាមួយ​នឹង​សហរដ្ឋ​អាមេរិក​ ដើម្បី​ផ្ដួល​រំលំ​រដ្ឋាភិបា​ល ​ដែល​ការ​ចោទ​ប្រកាន់​នេះ​ វា​មិន​សម​ហេតុ​សម​ផល​ និង​មិន​ត្រឹមត្រូវ​ទាល់​តែ​សោះ។ ​ដូច្នេះ​រដ្ឋាភិបា​ល​កម្ពុជាបាន​ទាញ​ពួក​យើងឲ្យ​ទៅជាប់​ទាក់​ទង​ដោយ​ផ្ទាល់​នៅ​ក្នុង​ករណី​នេះ។ ​កម្ពុជា​មិន​អាច​មាន​ទំនាក់​ទំនង​ប្រកប​ដោយ​ផ្លែផ្កា​ជាមួយ​សហរដ្ឋ​អាមេរិក​នោះ​ទេ ​រហូត​ដល់​ករណី​ទាំង​នេះ​ត្រូវ​បាន​ដោះស្រាយ​ដោយ​ភាព​ត្រឹមត្រូវ ​និង​ការ​គោរព»។​

លោក​ ​កឹម សុខា​ ត្រូវ​បាន​តុលាការ​ចោទ​ប្រកាន់​ ​និង​ឃុំ​ខ្លួន​ពី​បទ​ឃុបឃិត​ជា​មួយ​បរទេស​ ជាពិសេស​សហរដ្ឋ​អាមេរិក​ដែល​ជា​បទ​ក្បត់ជាតិ។​

ក្រោយ​ការ​ឃុំ​ខ្លួន​តាំងពី​ដើម​ខែ​កញ្ញាឆ្នាំ​២០១៧​អស់​រយៈពេល​ជាង​១ឆ្នាំ​ដោយ​មិន​មាន​ការ​កាត់ទោស​ លោក​ត្រូវ​បាន​តុលាការ​បញ្ជូន​ទៅឃុំ​នៅ​ក្នុង​ផ្ទះ​របស់​លោក​វិញ​ ​ក្រោម​ការ​ឃ្លាំមើល​របស់​តុលាការ។​

ក្រោយ​ការ​ចាប់​ និង​ឃុំ​ខ្លួន​លោក​ កឹម សុខា​ ជា​បន្ត​បន្ទាប់​ ទាំង​ក្នុង​ពន្ធនាគារ​និង​ក្នុង​ផ្ទះ​ ​អង្គការ​អន្តរជាតិ​ផ្នែក​ការពារ​សិទ្ធិ​មនុស្ស​ ​និង​សហគមន៍​អន្តរជាតិ​ជា​ច្រើន​ទាមទារ​ឲ្យ​មាន​ការ​ទម្លាក់​ចោល​បទ​ចោទ​លើលោក​ កឹម​ សុខា​ ដោយ​ឥត​លក្ខខណ្ឌ។

ការ​ចាប់​ឃុំ​ខ្លួន​លោក ​កឹម សុខា ​ត្រូវ​គេ​មើល​ឃើញ​ថា​ បាន​កើត​ឡើង​ នៅ​ពេល​ដែល​រដ្ឋាភិបាល​កម្ពុជាងាក​ទៅ​ស្និទ្ធ​ស្នាល​កាន់​តែ​ខ្លាំង​ឡើង​ជាមួយ​រដ្ឋាភិបាល​ទីក្រុង​ប៉េកាំង​របស់​លោក​ប្រធានាធិបតី​ Xi Jinping ​ក្នុង​រយៈពេល​ប៉ុន្មានឆ្នាំ​ចុង​ក្រោយ​នេះ។

នៅ​ពេល​ចំណង​ទាក់​ទង​កម្ពុជានិង​ចិន​កំពុង​តែ​មាន​ភាព​ផ្អែមល្ហែម​ខ្លាំង​ឡើង​នោះ ទំនាក់​ទំនង​រវាង​កម្ពុជា​ និង​សហរដ្ឋ​អាមេរិកតែង​មាន​ភាព​រកាំ​រកូស​ជា​ញឹកញាប់៕

XS
SM
MD
LG