នៅថ្ងៃព្រហស្បតិ៍នេះ ក្រុមប្រឹក្សាតុលាការចាប់ផ្ដើមពិភាក្សាលើសំណុំរឿងលោក Paul Manafort អតីតប្រធានយុទ្ធនាការឃោសនាបោះឆ្នោតរបស់លោក Donald Trump ដើម្បីមើលថាតើលោកមានកំហុសឬក៏អត់ពាក់ព័ន្ធនឹងបទចោទប្រកាន់បន្លំពន្ធដារ និងគណនីធនាគារ។ លោក Manafort ប្រឈមនឹងការជាប់ពន្ធនាគាររាប់ទសវត្សរ៍ ប្រសិនបើរកឃើញថាមានទោស។
ទាំងរដ្ឋអាជ្ញា និងទាំងមេធាវីការពារក្ដីឲ្យលោក Manafort សុទ្ធតែបានបង្ហាញសេចក្ដីសន្និដ្ឋានបញ្ចប់ការពិភាក្សាដេញដោលកាលពីថ្ងៃពុធម្សិលមិញ។ មេធាវីដើមចោទបានអះអាងថា ជីវិតរបស់លោក Manafort «ពោរពេញដោយការកុហក»។
លោករដ្ឋអាជ្ញា Greg Andres បាននិយាយថា៖ «លោក Manafort កុហកដើម្បីអាចសល់លុយច្រើននៅពេលដែលលោកមានលុយទាំងនោះ ហើយលោកកុហកដើម្បីបានលុយបន្ថែមទៀតនៅពេលដែលលោកគ្មានលុយ»។
ប៉ុន្តែ មេធាវីការពារក្ដីលោក Richard Westling បានប្រាប់ក្រុមប្រឹក្សាតុលាការថា តុលាការគួរតែដោះលែងលោក Manafort។ លោក Westling បាននិយាយថា រដ្ឋាភិបាលគ្មានភស្តុតាងគ្រប់គ្រាន់ដើម្បីបញ្ជាក់ថាលោក Manafort «មានកំហុសដែលមិនអាចប្រកែកបាន» នោះទេ ដែលនេះគឺជាស្តង់ដារនៃការផ្ដន្ទាទោសនៅក្នុងប្រព័ន្ធច្បាប់សហរដ្ឋអាមេរិក។
លោក Westling បានបន្ថែមថា ដោយសារតែហេតុនេះហើយបានជាភាគីខាងចុងចោទសម្រេចបញ្ចប់រឿងក្ដីនេះ ដោយមិនហៅសាក្សីណាម្នាក់មកផ្ដល់សក្ខីកម្មនោះទេ ដែលក្នុងនោះមានទាំងខ្លួនលោក Manafort ផ្ទាល់ផងដែរ៕
