អាជ្ញាធរព្រលានយន្តហោះទីក្រុងហុងកុងបានប្រកាសនៅថ្ងៃពុធនេះថា ចៅក្រមបានចេញបទបញ្ជាបណ្តោះអាសន្នកំណត់ទីតាំងឲ្យធ្វើបាតុកម្មប្រឆាំងរដ្ឋាភិបាល ដែលបានបង្កឲ្យបិទព្រលានយន្តហោះដែលមានជើងហោះហើរច្រើនបំផុតនៅក្នុងពិភពលោករយៈពេលពីរថ្ងៃមកនេះ និងបានបណ្តាលឲ្យមានការប៉ះទង្គិចគ្នារវាងក្រុមបាតុករនិងប៉ូលិសប្រឆាំងកុបកម្ម។
បទបញ្ជានេះនឹងអនុញ្ញាតឲ្យមានបាតុកម្មនៅទីតាំងដែលត្រូវបានកំណត់ និងមានបំណងបង្ក្រាបកំហឹងរបស់ហ្វូងបាតុករ ដែលបានធ្វើឲ្យរដ្ឋាភិបាលនិងក្រុមហ៊ុនអាកាសចរណ៍នានាបញ្ជូនបុគ្គលិករបស់ពួកគេស្ទើរតែទាំងអស់ត្រឡប់ទៅផ្ទះវិញ និងបានលុបចោលជើងហោះហើរស្ទើរតែទាំងអស់។
ការសម្រេចនេះបានធ្វើឲ្យព្រលានយន្តហោះក្លាយជាទីតាំងបោះជំរំ ដោយអ្នកដំណើរដែលជាប់នៅក្នុងព្រលានយន្តហោះនេះមានភាពស្រពេចស្រពិល ដោយមិនដឹងថាតើពួកគេត្រូវចាំដល់ពេលណាដើម្បីចេញដំណើរបាន មិនអាចទិញម្ហូបអាហារបាន និងគ្មានកន្លែងដែលពួកគេអាចសម្រាកបាន។
ការធ្វើដំណើរមកដល់ការចេញដំណើររបស់ជើងហោះហើរនានាដែលឆ្លងកាត់តាមព្រលានយន្តហោះហុងកុងភាគច្រើនបានចាប់ផ្តើមប្រតិបត្តិការឡើងវិញហើយនៅថ្ងៃពុធនេះ ប៉ុន្តែនៅមានជើងហោះហើរមួយចំនួនតូចនៅលុបចោលនៅឡើយ។ នេះបើយោងតាមការប្រកាសនៅក្នុងគេហទំព័ររបស់ព្រលានយន្តហោះ។
បទបញ្ជារបស់ចៅក្រមត្រូវបានប្រកាសជាសាធារណៈ បន្ទាប់ពីក្រុមបាតុករបានយករទេះរុញដាក់ឥវ៉ាន់ធ្វើជារបាំងបិទផ្លូវឆ្លងកាត់នៅក្នុងព្រលានយន្តហោះកាលពីយប់ថ្ងៃអង្គារ។ ប៉ូលិសប្រឆាំងកុបកម្មបានព្យាយាមរើរបាំងចេញ ខណៈក្រុមបាតុករឈ្លោះប្រកែកជាមួយនឹងក្រុមមន្រ្តីដែលព្យាយាមបំបែកហ្វូងមនុស្ស។ ប៉ូលិសបានចាប់ខ្លួនមនុស្ស៥នាក់ដោយចោទប្រកាន់ពួកគេថា ធ្វើការជួបជុំខុសច្បាប់ ធ្វើការវាយលុកដោយមានអាវុធ បំពានលើមន្រ្តីប៉ូលិស និងបានរំលោភសន្តិភាព។ មន្រ្តីប៉ូលិសពីរនាក់បានរងរបួស៕
