ភ្ជាប់​ទៅ​គេហទំព័រ​ទាក់ទង

ជ័យជម្នះ​របស់​លោក Doug Jones អាច​ជា​សញ្ញា​បញ្ជាក់​ថា គណបក្ស​ប្រជាធិបតេយ្យ​នឹង​មាន​ប្រៀប​នៅ​ក្នុង​ការ​បោះ​ឆ្នោត​សភា​ឆ្នាំ២០១៨

  • Jim Malone

លោក Doug Jones បេក្ខជន​សមាជិក​ព្រឹទ្ធសភា​របស់​គណបក្ស​ប្រជាធិបតេយ្យ​សាទរ​ជ័យជម្នះ​ជាមួយ​នឹង​អ្នក​គាំទ្រ​នៅ​ក្នុង​ពិធី​ជប់​លៀង​ពេល​រាត្រី​មួយ នៅ​ក្នុង​ក្រុង Birmingham រដ្ឋ Alabama កាលពី​ថ្ងៃទី១២ ខែធ្នូ ឆ្នាំ២០១៧។

នៅ​ក្នុង​រដ្ឋ Alabama អ្នក​គាំទ្រ​លោក Doug Jones នៃ​គណបក្ស​ប្រជាធិបតេយ្យ បាន​អបអរ​សាទរ​យ៉ាង​សប្បាយ​រីករាយ​ចំពោះ​ជ័យជម្នះ​របស់​លោក​ក្នុង​ការ​យក​ឈ្នះ​លើ​លោក Roy Moore បេក្ខជន​ខាង​គណបក្ស​សាធារណរដ្ឋ នៅ​ក្នុង​ការ​បោះ​ឆ្នោត​ពិសេស​មួយ​ដើម្បី​ជ្រើសរើស​សមាជិក​ព្រឹទ្ធសភា​មួយ​រូប​ប្រចាំ​រដ្ឋ​នេះ។

លោក Doug Jones ដែល​ជា​សមាជិក​ព្រឹទ្ធសភា​ជាប់​ឆ្នោត​មិន​ទាន់​ស្បថ​ចូល​កាន់​តំណែង បាន​និយាយ​ថា៖ «យុទ្ធនាការ​ឃោសនា​បោះ​ឆ្នោត​នេះ​គឺ​ផ្ដោត​លើ​សេចក្ដី​គួរសម និង​សុភាវធម៌​ជា​រួម និង​ផ្ដោត​លើ​ការ​ធ្វើ​យ៉ាង​ណា​ឲ្យ​ច្បាស់​ថា ពលរដ្ឋ​គ្រប់​រូប​នៅ​ក្នុង​រដ្ឋ Alabama មិន​ថា​រស់នៅ​តំបន់​ណា​នោះ​ទេ គឺ​ទទួល​បាន​ឱកាស​ស្មើៗ​គ្នា​នៅ​ក្នុង​ជីវិត»។

លោក Roy Moore មិន​អាច​យក​ឈ្នះ​លើ​ការ​ចោទ​ប្រកាន់​អំពី​ការ​បៀតបៀន​ផ្លូវ​ភេទ​ដែល​បាន​កើត​ឡើង​កាល​ពី​ប៉ុន្មាន​ទសវត្សរ៍​កន្លង​មក​នោះ​ទេ។ ការ​ចោទ​ប្រកាន់​ការ​បៀតបៀន​ផ្លូវ​ភេទ​នេះ​ពាក់ព័ន្ធ​នឹង​ស្ត្រី​ជា​ច្រើន​ដែល​នៅ​ពេល​នោះ​នៅ​ជា​ក្មេង​ជំទង់​នៅ​ឡើយ រី​ឯ​លោក​វិញ នៅ​ពេល​នោះ មាន​វ័យ​ជាង ៣០ ឆ្នាំ។

ប៉ុន្តែ លោក Roy Moore មិន​ព្រម​ចុះចាញ់​ការ​ប្រកួត​នេះ​ទេ ដោយ​លោក​នៅតែ​ចូលរួម​ប្រកួត​នៅ​ក្នុង​ការ​បោះ​ឆ្នោត​នេះ​ដដែល ទោះបីជា​មាន​រឿង​អាស្រូវ​នេះ​កើត​ឡើង​ក៏​ដោយ។

លោក Roy Moore បាន​និយាយ​ថា៖ «យើង​ត្រូវ​បាន​គេ​លាប​ពណ៌​នៅ​ក្នុង​ទម្រង់​មិន​ស្មោះត្រង់​មួយ។គេ​ទម្លាក់​យើង​ទៅ​ក្នុង​រណ្ដៅ​មួយ ប្រសិនបើ​គេ​ចង់​ធ្វើ។ ចំណុច​នេះ​បាន​ធ្វើ​ឲ្យ​ខ្ញុំ​នឹក​ឃើញ​ដល់​ឃ្លា​មួយ​នៅ​ក្នុង​ចម្រៀង​ថ្វាយ​ព្រះ​នៃ​ព្រះ​គម្ពីរ​គ្រិស្ត​សាសនា ដែល​សរសេរ​ថា «ខ្ញុំ​រង់ចាំ​ព្រះ​ជា​ម្ចាស់​យ៉ាង​អត់ធ្មត់»។ នេះ​ជា​អ្វី​ដែល​យើង​ត្រូវ​ធ្វើ»។

លោក​ប្រធានាធិបតី Donald Trump បាន​និយាយ​កាល​ពី​ថ្ងៃ​ពុធ ​ទី ១៣ ខែ​ធ្នូ កន្លង​ទៅ​នេះ នៅ​ឯ​សេតវិមាន​ថា លោក​ធ្លាប់​បាន​សង្ឃឹម​ថា​នឹង​ទទួល​បាន​លទ្ធផល​ផ្ទុយ​ពី​នេះ។

លោក Trump និយាយ​យ៉ាង​ដូច្នេះ​ថា៖ «ខ្ញុំ​ធ្លាប់​បាន​សង្ឃឹម​ថា យើង​នឹង​ទទួល​បាន​អាសនៈ​ព្រឹទ្ធសភា​នេះ។ សមាជិក​គណបក្ស​សាធារណរដ្ឋ​ភាគ​ច្រើន​មាន​អារម្មណ៍​ផ្សេង​ពី​នេះ។ ពួកគេ​សប្បាយ​ចិត្ត​ណាស់​ដែល​លទ្ធផល​ទៅ​ជា​ដូច្នេះ។ ប៉ុន្តែ ក្នុង​នាម​ជា​ប្រធាន​គណបក្ស ខ្ញុំ​ចង់​បាន​អាសនៈ​នេះ។ ខ្ញុំ​ចង់​គាំទ្រ​ដល់​អ្នក​ដែល​ឈរ​ឈ្មោះ​ប្រកួត​នៅ​ក្នុង​ការ​បោះ​ឆ្នោត​នេះ»។

ជ័យជម្នះ​របស់​លោក Doug Jones នៅ​ក្នុង​ការ​បោះ​ឆ្នោត​នេះ គឺ​មួយ​ផ្នែក​បណ្ដាល​មក​ពី​អ្នក​គាំទ្រ​ខាង​គណបក្ស​ប្រជាធិបតេយ្យ​ភាគ​ច្រើន​បាន​ចេញ​មក​បោះ​ឆ្នោត ជា​ពិសេស​គឺ​ពលរដ្ឋ​អាមេរិកាំង​ស្បែក​ខ្មៅ។ លោក Roy Moore ទទួល​រង​ការ​ឈឺចាប់​ដោយសារ​អ្នក​គាំទ្រ​ខាង​គណបក្ស​សាធារណរដ្ឋ​មិន​សូវ​ចេញ​មក​បោះ​ឆ្នោត និង​ដោយសារ​យុទ្ធនាការ​អំពាវនាវ​ឲ្យ​មាន​ការ​បោះឆ្នោត​ដោយ​សរសេរ​ឈ្មោះ​បេក្ខជន​ផ្សេង​នៅ​លើ​សន្លឹក​ឆ្នោត ដែល​ចំណុច​នេះ​បាន​កាត់​បន្ថយ​សំឡេង​គាំទ្រ​គណបក្ស​សាធារណរដ្ឋ។

សមាជិក​គណបក្ស​ប្រជាធិបតេយ្យ​នានា ដែល​ក្នុង​នោះ​មាន​ទាំង​មេដឹកនាំ​គណបក្ស​ប្រជាធិបតេយ្យ​ប្រចាំ​ព្រឹទ្ធសភា​លោក Chuck Schumer ផង​ដែរ មាន​ការ​សប្បាយ​រីករាយ ដោយសារ​តែ​បាន​ឈ្នះ​អាសនៈ​ព្រឹទ្ធសភា​នៅ​ក្នុង​រដ្ឋ Alabama ដែល​ជា​រដ្ឋ​មួយ​ដែល​ប្រជាពលរដ្ឋ​ភាគ​ច្រើន​លើស​លុប​គាំទ្រ​គណបក្ស​សាធារណរដ្ឋ។

លោក Chuck Schumer បាន​និយាយ​ថា៖ «មាន​កត្តា​ជា​ច្រើន​ដែល​ធ្វើ​ឲ្យ​គណបក្ស​ប្រជាធិបតេយ្យ​ឈ្នះ​អាសនៈ​ព្រឹទ្ធសភា​នៅ​ក្នុង​រដ្ឋ Alabama នេះ ដូចជា​មូលដ្ឋាន​ខាង​ក្រោម​ត្រូវ​បាន​ពង្រឹង​ឡើង មនុស្ស​ពេល​វ័យ​ក្នុង​សតវត្ស​ទី ២១ នេះ ភាគ​ច្រើន​ជា​អ្នក​គាំទ្រ​គណបក្ស​ប្រជាធិបតេយ្យ និង​អ្នក​រស់នៅ​តាម​តំបន់​ជាយ​ក្រុង​បាន​ងាក​មក​គាំទ្រ​គណបក្ស​ប្រជាធិបតេយ្យ​វិញ​ជា​ដើម។ ចំណុច​ទាំង​អស់​នេះ​មាន​ន័យ​ថា រឿងរ៉ាវ​កំពុង​ដំណើរការ​ល្អ​សម្រាប់​គណបក្ស​ប្រជាធិបតេយ្យ​របស់​យើង»។

ជ័យជម្នះ​របស់​លោក Doug Jones គឺ​ប្រាកដ​ណាស់​បាន​ធ្វើ​ឲ្យ​មាន​ការ​ភ្ញាក់ផ្អើល​ក្នុង​វិស័យ​នយោបាយ ស្រប​ពេល​ដែល​គណបក្ស​ទាំង​ពីរ​បាន​សម្លឹង​ឆ្ពោះ​ទៅ​កាន់​ការ​បោះ​ឆ្នោត​សភា​នា​ឆ្នាំ​ក្រោយ។ នេះ​បើ​តាម​ការ​បញ្ជាក់​របស់​លោក Larry Sabato ដែល​ជា​អ្នក​វិភាគ​មួយ​រូប​មក​ពី​សាកលវិទ្យាល័យ Virginia។

លោក Larry Sabato បាន​និយាយ​ថា៖ «ប្រសិន​បើ​ខ្ញុំ​ធ្វើ​យុទ្ធនាការ​ឃោសនា​បោះ​ឆ្នោត​ឲ្យ​គណបក្ស​សាធារណរដ្ឋ​សម្រាប់​ការ​បោះ​ឆ្នោត​ព្រឹទ្ធសភា រដ្ឋសភា អភិបាល​រដ្ឋ ឬ​ក៏​អង្គ​នីតិ​បញ្ញត្តិ​ប្រចាំ​រដ្ឋ ខ្ញុំ​នឹង​ប្រាកដ​ជា​បារម្ភ​យ៉ាង​ខ្លាំង ដោយសារតែ​អ្នក​គាំទ្រ​គណបក្ស​ប្រជាធិបតេយ្យ​កាន់តែ​មាន​ច្រើន​ឡើង»។

ស្រប​ពេល​នេះ​ដែរ អត្រា​គាំទ្រ​លោក Donald Trump នៅ​ក្នុង​ការ​ស្ទង់​មតិ​កន្លង​មក នៅតែ​មាន​កម្រិត​ទាប​ដដែល។

ការ​បាត់បង់​អាសនៈ​មួយ​នៅ​ក្នុង​ព្រឹទ្ធសភា អាច​ធ្វើ​ឲ្យ​គណបក្ស​សាធារណរដ្ឋ​មាន​ការ​លំបាក​ជាង​មុន​នៅ​ក្នុង​ការ​គ្រប់គ្រង។ នេះ​បើ​តាម​ការ​បញ្ជាក់​របស់​អ្នក​ជំនាញ​លោកស្រី Molly Reynolds នៃ​វិទ្យាស្ថាន Brookings ក្នុង​រដ្ឋធានី​វ៉ាស៊ីនតោន សហរដ្ឋ​អាមេរិក។

លោកស្រី Molly Reynolds បាន​និយាយ​ថា៖ «នៅ​ពេល​លោក Doug Jones ចូល​កាន់​តំណែង​ជា​សមាជិក​ព្រឹទ្ធសភា យើង​ឃើញ​ថា គណបក្ស​សាធារណរដ្ឋ​នឹង​មាន​អាសនៈ​តែ​ចំនួន ៥១ ប៉ុណ្ណោះ ជាជាង​អាសនៈ​ចំនួន ៥២ ដែល​ជា​សំឡេង​ភាគ​ច្រើន​នៅ​ក្នុង​ព្រឹទ្ធសភា។ ហើយ​ក្នុង​រយៈពេល​មួយ​ឆ្នាំ​កន្លង​មក​នេះ យើង​បាន​ឃើញ​ម្ដង​ហើយ​ម្ដង​ទៀត​ថា ទោះបីជា​មាន​អាសនៈ​ចំនួន ៥២ ក៏​ដោយ ក៏​គណបក្ស​សាធារណរដ្ឋ​នៅតែ​ពិបាក​គ្រប់គ្រង​លើ​ព្រឹទ្ធសភា។ ជាង​នេះ​ទៅ​ទៀត បញ្ហា​ប្រឈម​ទាំង​នោះ​នឹង​មិន​ងាយ​ស្រួល​ជាង​មុន​នោះ​ទេ នៅ​ពេល​ដែល​គណបក្ស​នេះ​បាត់បង់​អាសនៈ​មួយ​បន្ថែម​ទៀត​នោះ»។

មេដឹកនាំ​រដ្ឋសភា និង​ព្រឹទ្ធសភា​ខាង​គណបក្ស​សាធារណរដ្ឋ បាន​និយាយ​កាល​ពី​ថ្ងៃ​ពុធ​ទី ១៣ ខែ​ធ្នូ កន្លង​ទៅ​នេះ​ថា ពួកគេ​បាន​ឯកភាព​ចំពោះ​ទម្រង់​ច្បាប់​ចុង​ក្រោយ​មួយ​នៃ​ច្បាប់​កែ​ទម្រង់​ពន្ធដារ ដែល​នេះ​ជា​ការ​សន្យា​ដ៏​សំខាន់​មួយ​នៅ​ក្នុង​យុទ្ធនាការ​ឃោសនា​បោះ​ឆ្នោត​របស់​លោក Trump កាល​ពី​ឆ្នាំ​មុន។

គណបក្ស​សាធារណរដ្ឋ​សង្ឃឹម​ថា​នឹង​បញ្ចប់​កិច្ចការ​ពាក់ព័ន្ធ​នឹង​គម្រោង​កាត់​បន្ថយ​ពន្ធដារ មុន​ពេល​លោក Doug Jones ស្បថ​ចូល​កាន់​តំណែង​ជា​សមាជិក​ព្រឹទ្ធសភា​នៅ​ខែ​ក្រោយ៕

ប្រែ​សម្រួល​ដោយ ភី សុភាដា

XS
SM
MD
LG